ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ସଦରଥାନା ଅନ୍ତର୍ଗତ ମାଳିସାହି, ଢେଙ୍କେଣା, ଖଣ୍ଡୁଗାଁ, ଚାହାଳୀ ପଞ୍ଚାୟତର ୧୭ ଖଣ୍ଡ ମୈାଜାବାସୀ ରାସ୍ତା ନିର୍ମାଣ ଦାବିରେ ଆସନ୍ତା ୨୫ ତାରିଖ ଖୋର୍ଦ୍ଧା ବଲାଙ୍ଗୀର ଜାତୀୟ ରାଜପଥ ଅବରୋଧ କରିବେ । ଏନେଇ ପ୍ରସ୍ତୁତି ଚାଲିଥିବା ସୂଚନା ମିଳିଛି । ଗାଁ ଗାଁ ବୁଲି କ୍ରିୟାନୁଷ୍ଠାନ କମିଟି ଲୋକଙ୍କୁ ସଚେତନ କରିବା ସହ ଆନ୍ଦୋଳନରେ ସାମିଲ ହେବାକୁ ଆହ୍ୱାନ ଦେଉଛି । ଦୀର୍ଘ ୧୦ ବର୍ଷ ଧରି ୧୭ ଖଣ୍ଡ ମୈାଜା ଓ ଗୁଡ଼ୁପାଙ୍ଗୀ ମଧ୍ୟରେ ରାସ୍ତା ପାଇଁ ବିବାଦ ଲାଗି ରହିଛି । ପ୍ରଧାନମନ୍ତ୍ରୀ ସଡ଼କ ନିର୍ମାଣ ଅଧାପନ୍ତରିଆ ଅବସ୍ଥାରେ ରହିଛି । ୧୭ ଖଣ୍ଡ ମୈାଜାବାସୀ ବଳଭଦ୍ରପୁର ଢିପାମାଳ ରାସ୍ତାକୁ ସଦାବନ୍ଧ ଛକ ଦେଇ ନିର୍ମାଣ କରିବାକୁ ଦାବି କରୁଥିବା ବେଳେ ଗୁଡ଼ୁପାଙ୍ଗୀ ଏହାକୁ ବିରୋଧ କରୁଛି । ଗୁଡ଼ୁପାଙ୍ଗୀ ରାସ୍ତା ତାଙ୍କ ଗ୍ରାମ ଦେଇ ନିର୍ମାଣ କରିବା ଜିଦରେ ଅଟଳ ରହିଛି । ଏହି ବିବାଦକୁ ନେଇ ବିଗତ ଦିନରେ ଅନେକ ରାସ୍ତାରୋକ, ପ୍ରଜାମେଳି ହୋଇଥିଲେ ମଧ୍ୟ କୈାଣସି ସୁଫଳ ମିଳିନାହିଁ । ଅନେକ ପ୍ରୟାସ ପରେ ବି ରାସ୍ତା ନିର୍ମାଣ ହୋଇପାରୁନାହିଁ । ମାଳିସାହି ପଞ୍ଚାୟତର ୫ ଖଣ୍ଡ ଆଦିବାସୀ ଗ୍ରାମ ଏବଂ ଦେଉଳି ଗାଇଚରା ପଡ଼ିଆ ସଂଯୋଗ କରୁଥିବା ଏହି ରାସ୍ତା ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ଆରମ୍ଭ ହୋଇଥିଲା । ଏହାକୁ ବିରୋଧ କରି ଗୁଡ଼ୁପାଙ୍ଗୀ ୨୦୧୪ ମସିହାରେ ଲଙ୍କାକାଣ୍ଡ ସୃଷ୍ଟି କରିଥିଲା । ଠିକା ସଂସ୍ଥାର ଅନେକ ମେସିନ ପୋଡ଼ି ଦେବା ସହ ପୁଲିସକୁ ଆକ୍ରମଣ କରିଥିଲା । ଯାହାକୁ ନେଇ ରାସ୍ତାର ଗତିପଥ ପରିବର୍ତ୍ତନ କରାଯାଇ ଗୁଡ଼ୁପାଙ୍ଗୀ ଗ୍ରାମ ଦେଇ ନିର୍ମାଣ କରାଯାଇଥିଲା । ଉକ୍ତ ରାସ୍ତା ନିର୍ମାଣ ଅଧାପନ୍ତରିଆ ଭାବେ ରହିଥିବା ବେଳେ ୧୭ ଖଣ୍ଡ ବାସୀ ବଳଭଦ୍ରପୁର ଦେଇ ରାସ୍ତା ନିର୍ମାଣ ପାଇଁ ଦାବି କରି ଆସୁଛନ୍ତି । ଏହାକୁ ନେଇ ପୂର୍ବରୁ ପ୍ରଜା ଆନ୍ଦୋଳନଠାରୁ ଆରମ୍ଭ କରି ଅନେକ ଘଟଣା ଘଟି ଯାଇଛି । ବିବାଦ ସମାଧାନ କରିବା ପାଇଁ ଜିଲ୍ଲାପାଳ ସବୁ ଚେଷ୍ଟା କରିଛନ୍ତି । ଶାନ୍ତି କମିଟିଠାରୁ ଆରମ୍ଭ କରି ଅନେକ ପ୍ରୟାସ କରାଯାଇଥିବା ବେଳେ ଗୁଡ଼ୁପାଙ୍ଗୀ ସମାଧାନ ପାଇଁ ଆଗେଇ ପାରି ନାହିଁ । ରାସ୍ତା ନିର୍ମାଣକୁ ବିରୋଧ କରି ଜାତୀୟ ଗ୍ରୀନ ଟ୍ରିବ୍ୟୁନାଲ ପର୍ୟ୍ୟନ୍ତ ମାମଲା ଯାଇଛି । ସେଠାରୁ ଫେଲ ମାରିବା ପରେ ବି ବଳଭଦ୍ରପୁର ଦେଇ ରାସ୍ତା ନିର୍ମାଣକୁ ଗୁଡ଼ୁପାଙ୍ଗୀ ବିରୋଧ କରିଛି। ଫଳରେ ୫ ଖଣ୍ଡ ଆଦିବାସୀ ଗାଁ ବାସିନ୍ଦା ଜଙ୍ଗଲ ପରିସରରୁ ବାହାରକୁ ବାହାରିବା ପାଇଁ ଯନ୍ତ୍ରଣା ଭୋଗୁଛନ୍ତି । ବିଗତ ଦିନରେ ଜିଲ୍ଲାପାଳ ୪୦ ଲକ୍ଷ ଟଙ୍କା ମଞ୍ଜୁର କରି ପୁଲିସ ଫୋର୍ସ ଉପସ୍ଥିତିରେ ମାଟି ରାସ୍ତା ନିର୍ମାଣ କରିଥିଲେ । ତାହା ଅଧପନ୍ତରିଆ ହୋଇ ରହିଥିବା ବେଳେ ତୁରନ୍ତ ନିର୍ମାଣ କାର୍ଯ୍ୟ ତ୍ୱରାନ୍ୱିତ କରିବାକୁ ଦାବି ହେଉଛି । ୧୭ ଖଣ୍ଡ ମୈାଜାବାସୀ ଜାତୀୟ ରାଜପଥ ଅବରୋଧ କରିବା ସହ ଜେଲଭର ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି ।
ରାସ୍ତା ବିବାଦ ; ଜାତୀୟ ରାଜପଥ ଅବରୋଧ କରିବେ ୧୭ ଖଣ୍ଡ ମୈାଜାବାସୀ
