ନୟାଗଡ଼ (ବାଘୁଆବାର୍ତ୍ତା ବ୍ୟୁରୋ): ନୟାଗଡ଼ରୁ ଭୁବନେଶ୍ୱରକୁ ସିଧାସଳଖ ଟ୍ରେନ ଚଳାଚଳ ପାଇଁ ନୟାଗଡ଼ର ବିଭିନ୍ନ ସଂଗଠନ ପକ୍ଷରୁ ରେଳମନ୍ତ୍ରୀ ପିୟୁଷ ଗୋୟଲଙ୍କ ନିକଟରେ ଦାବି କରାଯାଇଛି । ଏ ନେଇ ଗତ ୨୮ ତାରିଖ ଦିନ ଭୁବନେଶ୍ୱର ଠାରେ ଓଡ଼ିଶାର କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ରେଳମନ୍ତ୍ରୀଙ୍କ ଉଦ୍ଦେଶ୍ୟରେ ୩ ପୃଷ୍ଠା ସମ୍ବଳିତ ଏକ ଦାବିପତ୍ର ପ୍ରଦାନ କରାଯିବାସହ ଶ୍ରୀଯୁକ୍ତ ପ୍ରଧାନ ଏଦିଗରେ ସହଯୋଗ କରିବା ପାଇଁ ଅନୁରୋଧ କରାଯାଇଥିଲା । ସୁଚନା ଯୋଗ୍ୟ ଯେ ଗତ ବର୍ଷ ଜୁନ ୧୯ ତାରିଖ ଦିନ ବହୁ ପ୍ରତୀକ୍ଷିତ ନିର୍ମାଣାଧିନ ଖୋର୍ଦ୍ଧା-ବଲାଙ୍ଗିର ରେଳପଥ ଅନ୍ତର୍ଗତ ନୟାଗଡ ଟାଉନ଼ ରେଳ ଷ୍ଟେସନ ଉଦଘାଟନ କେନ୍ଦ୍ର ରେଳାମନ୍ତ୍ରୀଙ୍କ ଦ୍ୱାରା ହୋଇଥିଲା । ଯଦ୍ଦ୍ୱାରା ନୟାଗଡ଼ବାସୀଙ୍କ ଦୀର୍ଘ ଦିନର ଆଶା ଆକାଂକ୍ଷା ପୂରଣ ହେବାସହ ନୟାଗଡ଼କୁ ଟ୍ରେନ ଚଳାଚଳର ଶୁଭାରମ୍ଭ ହୋଇଥିଲା ।
ତେବେ ଉଦଘାଟନ ଦିନଠାରୁ ଆଜି ପର୍ଯ୍ୟନ୍ତ କେବଳ ଦୁଇଟି ଟ୍ରେନ ନୟାଗଡ଼ଠାରୁ ପୁରୀ ପର୍ଯ୍ୟନ୍ତ ଯାତାୟତ କରୁଥିବା ବେଳେ ରାଜଧାନୀ ଭୁବନେଶ୍ୱରକୁ କୌଣସି ଟ୍ରେନ ଚଳାଚଳ କରିପାରି ନାହିଁ । ସକାଳ ୫ଟାରେ ଗୋଟିଏ ଟ୍ରେନ ଏବଂ ସାଢ଼େ ୯ଟାରେ ଅନ୍ୟ ଏକ ଟ୍ରେନ ପୁରୀ ଛାଡ଼ୁଥିବା ବେଳେ ଆଉ ଦିନଯାକ କୌଣସି ଟ୍ରେନ ନୟାଗଡ଼କୁ ଯା’ଆସ କରୁ ନାହିଁ । ନୟାଗଡ଼ ଜିଲ୍ଲାର ବିଭିନ୍ନ ପ୍ରାନ୍ତ ଯଥା ଦଶପଲ୍ଲା, ଓଡ଼ଗାଁ,ଖଣ୍ଡପଡ଼ା, କଣ୍ଟିଲୋ ଆଦି ଅଞ୍ଚଳରୁ ଭୁବନେଶ୍ୱର ଯିବା ପାଇଁ ଦୈନିକ ହଜାର ହଜାର ଯାତ୍ରୀ ଘରୋଇ ବସ ଉପରେ ନିର୍ଭର କରୁଛନ୍ତି । ଅନ୍ୟପକ୍ଷରେ ଖଡ଼ଗପୁରରୁ ଖୋର୍ଦ୍ଧାରୋଡ଼କୁ ଦୈନିକ ଯା’ଆସ କରୁଥିବା ଟ୍ରେନଟି ଖୋର୍ଦ୍ଧା ରୋଡ଼ଠାରେ ଅଟକି ରହୁଥିବା ବେଳେ ସେହି ଟ୍ରେନଟିକୁ ନୟାଗଡ଼ ପର୍ଯ୍ୟନ୍ତ ସଂପ୍ରସାରଣ କରାଯିବା ପାଇଁ ମଧ୍ୟ ଏହି ଦାବିପତ୍ରରେ ଅନୁରୋଧ କରାଯାଇଛି । ତେବେ ପ୍ରତିନିଧି ମଣ୍ଡଳୀକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏ ଦିଗରେ ପୂର୍ଣ୍ଣମାତ୍ରାରେ ସହଯୋଗ କରିବା ସହ ନୟାଗଡ଼-ଭୁବନେଶ୍ୱର ମଧ୍ୟରେ ଟ୍ରେନ ଚଳାଚଳ ପାଇଁ ଯଥାସାଧ୍ୟ ଉଦ୍ୟମ କରିବେ ବୋଲି ପ୍ରତିନିଧି ମଣ୍ଡଳୀକୁ ନିର୍ଭର ପ୍ରତିଶୃତି ପ୍ରଦାନ କରିଛନ୍ତି । ନୟାଗଡ଼ ଜିଲ୍ଲା ବରିଷ୍ଠ ନାଗରିକ ମଞ୍ଚ ନେତୃତ୍ୱରେ ଦିଆଯାଇଥିବା ଏହି ଦାବିପତ୍ରରେ ଭାରତ ବିକାଶ ପରିଷଦ, ନୟାଗଡ଼ ଶାଖା, ନୟାଗଡ଼ ଜିଲ୍ଲା ବାର ଆସୋସିଏସନ, ଘରୋଇ ବସ ଆସୋସିଏସନ, ନୟାଗଡ଼ ବିକାଶ ପରିଷଦ, କେସି କ୍ଲବ, ମୈତ୍ରୀ ଯୁବ ସଂସଦ, ସେବା ନୟାଗଡଙ୍କ଼ ସମେତ ବହୁ ବୁଦ୍ଧିଜୀବୀ, ବରିଷ୍ଠ ନାଗରିକ, ସାମ୍ବାଦିକ ତଥା ସାଧାରଣ ନାଗରିକ ଦସ୍ତଖତ କରିଛନ୍ତି ।
