ଚାଷୀ ଆନ୍ଦୋଳନରେ ସାମିଲ ହେବାକୁ ଆସିଥିବା ଯୁବତୀଙ୍କୁ ଦୁଷ୍କର୍ମ, ପରେ କରୋନାରେ ଚାଲିଗଲା ଜୀବନ

ନୂଆଦିଲ୍ଲୀ (ବାଘୁଆବାର୍ତ୍ତା): ଚାଷୀ ଆନ୍ଦୋଳନରେ ଭାଗନେବାକୁ ଆସିଥିବା ଜଣେ ଯୁବତୀଙ୍କୁ ଦୁଷ୍କର୍ମ କରାଯାଇଥିବା ଖବର ସାମ୍ନାକୁ ଆସିଛି । ଯୁବତୀଙ୍କ ବାପା ଏ ନେଇ ଶହର ଥାନାରେ ଅଭିଯୋଗ କରିବା ପରେ ତଦନ୍ତ ଆରମ୍ଭ କରିଛି ପୋଲିସ । ତୁରନ୍ତ କାର୍ଯ୍ୟାନୁଷ୍ଠାନ ପୂର୍ବକ ଟିକରୀ ସୀମାରେ କିଷାନ ସ୍ପେଶାଲ ଆର୍ମି ଚଳାଉଥିବା ଅନୁପ ଏବଂ ଅନିଲ ମଲ୍ଲିକ ସମେତ ୬ ଜଣଙ୍କ ବିରୋଧରେ ମାମଲା ରୁଜୁ କରିଛି ପୋଲିସ । ଏହା ସହିତ ଖୁବଶୀଘ୍ର ଅଭିଯୁକ୍ତମାନଙ୍କୁ ଧରାଯିବ ବୋଲି ପୋଲିସ ଆଶ୍ୱାସନା ଦେଇଛି । ସୂଚନାନୁସାରେ, ଯୁବତୀ ଜଣକ କିଛି ଯୁବକଙ୍କ ସହିତ ଚାଷୀ ଆନ୍ଦୋଳନରେ ଭାଗନେବାକୁ ପଶ୍ଚିମବଙ୍ଗରୁ ଦିଲ୍ଲୀ ଆସିଥିଲେ । ତେବେ ଦିଲ୍ଲୀରେ ପହଁଞ୍ଚିବା ପରେ ଅଭିଯୁକ୍ତମାନେ କୌଣସି ଏକ ସ୍ଥାନକୁନେଇ ଯୁବତୀଙ୍କୁ ଦୁଷ୍କର୍ମ କରିଥିଲେ । ଦୁଃଖଦ କଥା ହେଉଛି ଏପ୍ରିଲ ୩୦ ତାରିଖରେ କରୋନାରେ ସଂକ୍ରମିତ ହୋଇ ଯୁବତୀଙ୍କର ମୃତ୍ୟୁ ଘଟିଥିଲା । ମୃତ୍ୟୁର ୪ ଦିନ ପୂବ ର୍ରୁ ଯୁବତୀଙ୍କୁ ଶିବମ ହସ୍ପିଟାଲରେ ଭର୍ତ୍ତି କରାଯାଇଥିଲା । ସେଠାରେ କରୋନା ସଂକ୍ରମଣ ହୋଇଥିବା ଚିହ୍ନଟ ହେବାପରେ ଚିକିତ୍ସିତ ଅବସ୍ଥାରେ ହିଁ ତାଙ୍କର ମୃତ୍ୟୁ ଘଟିଥିଲା । ଯୁବତୀଙ୍କ ପିତାଙ୍କ ଅଭିଯୋଗ ଆଧାରରେ ଆପିସିର ଧାରା ୩୬୫, ୩୪୨, ୩୫୪, ୩୭୬ ଏବଂ ୧୨୦ ଅନୁଯାୟୀ ମାମଲା ରୁଜୁ କରିଛି ପୋଲିସ । ସମ୍ବେଦନଶୀଳ ଘଟଣା ହୋଇଥିବାରୁ ଜଣେ ଡିଏସପିଙ୍କ ନେତୃତ୍ୱରେ ୩ ଜଣ ଇନସ୍ପେକ୍ଟର ଏବଂ ସାଇବର ସେଲକୁ ନେଇ ସ୍ୱତନ୍ତ୍ର ଟିମ ଗଠନ କରାଯାଇ ତଦନ୍ତ ଆରମ୍ଭ ହୋଇଛି । ପୋଲିସ ବର୍ତ୍ତମାନ ୪ ଜଣ ଚାଷୀ ନେତା ଏବଂ ଆନ୍ଦୋଳନ ସହ ଜଡିତ ୨ଜଣ ମହିଳାଙ୍କ ବିରୁଦ୍ଧରେ ମଧ୍ୟ ମାମଲା ରୁଜୁ କରିଛି ।