ରାଉରକେଲା, (ବାଘୁଆବାର୍ତ୍ତା): ବନ୍ଦ ଘରେ ପଣବନ୍ଦୀ ରଖି ନାବାଳିକାକୁ ଗଣଦୁଷ୍କର୍ମ । ଦୁଇଦିନ ଯୌନ ଉତ୍ପୀଡ଼ନ ପରେ ଛାଡ଼ିଦେଲେ ତିନିଜଣ ଯୌନପିପାସୁ । ରାଉରକେଲାରେ ଘଟିଥିବା ଏଭଳି ଚାଞ୍ଚଲ୍ୟକର ଘଟଣା ଆଲୋଡ଼ନ ଖେଳାଇ ଦେଇଛି । ପୀଡ଼ିତାଙ୍କୁ ଦୁଷ୍କର୍ମକାରୀମାନେ ବିର୍ସା ଛକରେ ଛାଡ଼ି ଚମ୍ପଟ୍ ମାରିଛନ୍ତି । ଘଟଣା ଥାନାରେ ପହଞ୍ଚିବା ପରେ ପୁଲିସ୍ ଅଭିଯୁକ୍ତଙ୍କୁ ଧରିବା ଲାଗି ଚଢ଼ାଉ ଜାରି ରଖିଛି । ପୁଲିସ୍ ସୂଚନା ଅନୁଯାୟୀ, ସମ୍ପୃକ୍ତ ୧୫ ବର୍ଷୀୟା ନାବାଳିକାଙ୍କ ଘର ଉଦିତ୍ନଗର ଥାନାଞ୍ଚଳରେ । ତାଙ୍କ ମା’ବାପା ଦିନ ମଜୁରିଆ । ଗରିବ ପରିବାରର ହୋଇଥିବାରୁ ନାବାଳିକା ଜଣକ ବିଭିନ୍ନ ସ୍ଥାନରେ ବୁଲି ଖାଇବା ଯୋଗାଡ଼ କରିଥାଆନ୍ତି । ଘଟଣା ଦିନ ଅର୍ଥାତ୍ ଗତ ୧୭ ତାରିଖରେ ସେ ଷ୍ଟେସନ ଅଞ୍ଚଳରେ ବୁଲାବୁଲି କରୁଥିବାବେଳେ ଦୁଇଜଣ ଯୁବକ ଆସି ତାଙ୍କ ସହ ସମ୍ପର୍କ ଯୋଡ଼ିଥିଲେ । ଖାଇବାକୁ ଦେବାକୁ ପ୍ରଲୋଭିତ କରିଥିଲେ । ହେଲେ ସେମାନଙ୍କ ଉଦ୍ଦେଶ୍ୟ ଥିଲା ଅଲଗା । ନାବାଳିକାଙ୍କୁ ଜାଲରେ ଫସାଇ ଦୁଇ ଅଭିଯୁକ୍ତ ରାଉରକେଲାଠାରୁ ପ୍ରାୟ ୨୦ କିମି ଦୂରକୁ ନେଇଯାଇଥିଲେ । ଏକ ଝାଟିମାଟି ଘରେ ପଣବନ୍ଦୀ କରି ରଖିଥିଲେ । ଉକ୍ତ ଘରେ ରହୁଥିବା ଅନ୍ୟ ଜଣେ ବ୍ୟକ୍ତି ଏବଂ ଦୁଇ ଅଭିଯୁକ୍ତ ତାଙ୍କୁ ଦୁଇଦିନ ଧରି ପଣବନ୍ଦୀ ରଖି ଦୁଷ୍କର୍ମ କରିଥିଲେ । ନାବାଳିକା ଜଣକ ଘରକୁ ନ ଫେରିବାରୁ ମା’ ଖୋଜାଖୋଜି କରିଥିଲେ । ହେଲେ ପାଇ ନ ଥିଲେ । ଗୁରୁବାର ସକାଳେ ଜଣେ ଅଭିଯୁକ୍ତ ବାଇକ୍ରେ ଆଣି ନାବାଳିକାକୁ ବିର୍ସା ଛକରେ ଛାଡ଼ି ପଳାଇଥିଲେ । ଅସହାୟ ଅବସ୍ଥାରେ ବୁଲୁଥିବା ବେଳେ ପୀଡ଼ିତାଙ୍କୁ ଦେଖିଥିଲା ପୁଲିସ୍ । ପଚରାଉଚରା ପରେ ଘଟଣା ଜଣାପଡ଼ିଥିଲା । ପୁଲିସ୍ ପିସିଆର ଭ୍ୟାନ୍ରେ ତାଙ୍କୁ ଉଦିତନଗର ଥାନାକୁ ଆଣିଥିଲା । ସୂଚନା ପାଇ ତାଙ୍କ ମା’ ପହଞ୍ଚିଥିଲେ । ପୀଡ଼ିତାଙ୍କ ଏତଲା ପରେ ପୁଲିସ୍ ଦଫା ୭୦(୨) ବିଏନ୍ଏସ୍/ପୋକ୍ସୋ ଆକ୍ଟରେ ମାମଲା (ନଂ.୪୧୯/୨୪) ରୁଜୁ କରିଛି । ଏଭଳି ଜଘନ୍ୟକାଣ୍ଡ ଘଟାଇଥିବା ଅପରାଧୀଙ୍କୁ ଧରିବା ଲାଗି ପୁଲିସ୍ର ଏକ ଟିମ୍ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି । ସନ୍ଦେହରେ କେତେଜଣଙ୍କୁ ଥାନାକୁ ଆଣି ଅଟକ ରଖି ପଚରାଉଚରା କରୁଛି । ରାଉରକେଲାରେ ଗତ କିଛି ମାସ ମଧ୍ୟରେ ଏଭଳି ଏକାଧିକ ଲଜ୍ଜାଜକକ ଘଟଣା ଘଟିଲାଣି । ଯୌନପିପାସୁମାନେ ଅସହାୟ ନାବାଳିକାଙ୍କୁ ଟାର୍ଗେଟ କରି ଫସାଉଛନ୍ତି । ଇସ୍ପାତ ସହରକୁ ବଦନାମ କରୁଥିବା ଅଭିଯୁକ୍ତଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ନେବାକୁ ବୁଦ୍ଧିଜୀବୀ ମହଲରେ ଦାବି ହେଉଛି ।
