ନୟାଗଡ଼, (ବାଘୁଆବାର୍ତ୍ତା) : ମହାନଦୀ ଅଥଳ ଜଳରାଶିରେ ବୁଡ଼ି ରହିଥିବା ମନ୍ଦିର ଏବଂ ରଣପୁର ଘଞ୍ଚ ଜଙ୍ଗଲରେ ପୁରାତନ ଭଗ୍ନ ମନ୍ଦିର ପରେ ଏବେ ସାମନାକୁ ଆସିଛି ଏକ ରହସ୍ୟମୟ ଗୁମ୍ପା । ଏହି ଗୁମ୍ପାଟି ରଣପୁର ବ୍ଲକ ନରେନ୍ଦ୍ରପୁର ପଂଚାୟତର ମେଲାତଇଲା ପାହାଡ଼ରେ ଦେଖିବାକୁ ମିଳିଛି । ଏହାକୁ ନେଇ ଅନେକ ଚର୍ଚ୍ଚା ସୃଷ୍ଟି ହୋଇଛି । ସୂଚନାନୁସାରେ, ଏହି ଗୁମ୍ପାଟି ବହୁ ପୂରାତନ ହୋଇଥିବା ବେଳେ ଏହା ଏବେ ଜଣେ ଛେଳି ଜଗୁଆଳିଙ୍କ ଦ୍ୱାରା ସାମନାକୁ ଆସିଛି । ଏହି ଗୁମ୍ଫା ଭିତରକୁ ଏକ ଛେଳି ପଶି ଯିବାରୁ ଛେଳିକୁ ଖୋଜିବାକୁ ଯାଇ ଏହା ସାମନାକୁ ଆସିଛି । ସ୍ଥାନୀୟ ଲୋକେ ଗୁମ୍ଫାରେ ପୂଜାର୍ଚ୍ଚନା କରୁଥିବା ଜଣାପଡ଼ିଛି । ସ୍ଥାନୀୟ ଲୋକଙ୍କ କହିବାନୁସାରେ, ଏହି ଗୁମ୍ଫା ବହୁ ପୂରାତନ ଅଟେ । ଏହି ଗୁମ୍ଫା ଭିତରେ ବଡ଼ ବଡ଼ ୭ଟି ଘର ରହିଥିବା ଲୋକେ ଆଲୋଚନା କରୁଥିବା ବେଳେ ଏହାର ଏକ ସ୍ୱତନ୍ତ୍ର ସର୍ଭେ କରାଗଲେ ପ୍ରକୃତ ଘଟଣା ସାମନାକୁ ଆସିବ ବୋଲି ଜଣାଯାଇଛି । ସ୍ଥାନୀୟ କିଛି ଲୋକ ଗୁମ୍ଫା ଭିତରକୁ ଯିବାକୁ ଚେଷ୍ଟା କରିଥିବା ବେଳେ ସଫଳ ହୋଇନଥିବା ଜଣାଯାଇଛି । ସରକାର ଏବଂ ପ୍ରଶାସନ ଏହି ଗୁମ୍ଫାର ରହସ୍ୟ ଭେଦ କରିବା ପାଇଁ ସ୍ୱତନ୍ତ୍ର ବ୍ୟବସ୍ଥା କରିବାକୁ ଦାବି ହେଉଛି ।
