ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲାରେ ଅନେକ ପୁଲିସ ଅଧିକାରୀଙ୍କ ବ୍ୟବହାର, ନୀତିଗତିକୁ ନେଇ ଜନଅସନ୍ତୋଷ ସୃଷ୍ଟି ହେଉଥିବା ବେଳେ ଏନେଇ ଅନେକ ଅଭିଯୋଗ ଜିଲ୍ଲା ଆରକ୍ଷୀ ଅଧିକ୍ଷକଙ୍କ ନିକଟକୁ ଆସୁଛି । ଅନେକ ପୁଲିସ ଅଧିକାରୀଙ୍କ କିଭଳି ବଦଳି ହେବ ସେ ନେଇ ସାଧାରଣ ଲୋକଙ୍କଠାରୁ ନେତା ପର୍ଯ୍ୟନ୍ତ ଅନେକ ଲୋକ ଦିନ ଗଣୁଛନ୍ତି । ମାତ୍ର ଗତକାଲି ରାଜସୁନାଖଳା ଫାଣ୍ଡି ଅଧିକାରୀ ପ୍ରଦୀପ ସାମଲଙ୍କ ବଦଳି ବାତିଲ୍ କରିବା ଦାବିରେ ଫାଣ୍ଡି ସାମନାରେ ଶାନ୍ତିପୂର୍ଣ୍ଣ ଗଣଧାରଣା ଦିଆଯାଇଥିଲା । ୯ଟି ପଂଚାୟତର ଲୋକମାନେ ଏହି ଧାରଣାରେ ସାମିଲ ହୋଇଥିଲେ । ଦୀର୍ଘ ସମୟ ଧରି ଲୋକମାନେ ଧାରଣାରେ ବସିଥିବା ବେଳେ ଅପରାହ୍ନ ୧ଟା ବେଳକୁ ରଣପୁର ଥାନା ଅଧିକାରୀ ରଶ୍ମୀ ରଂଜନ ଦାଶ ରାଜସୁନାଖଳା ପାଣ୍ଡିରେ ପଂହଚି ଧାରଣା ଦେଇଥିବା ଲୋକଙ୍କ ସହ ଆଲୋଚନା କରିଥିଲେ । ଲୋକମାନେ ନିଜ ଜିଦ୍ରେ ଅଟଳ ଥିବାରୁ ଥାନା ଅଧିକାରୀ ଏକ ଦାବିପତ୍ର ଗ୍ରହଣ କରି ଫେରିଥିଲେ । ମାତ୍ର ଗତକାଲି ସଂନ୍ଧ୍ୟାରେ ନୂତନ ଏସ୍ଆଇ ଭୀମସେନ ମଲ୍ଲିକ ରାଜସୁନାଖଳା ପାଣ୍ଡିରେ ପଂହଚି କାର୍ଯ୍ୟରେ ଯୋଗ ଦେଇଛନ୍ତି । ଯାହାକୁ ନେଇ ରାଜସୁନାଖଳା ଅଂଚଳରେ ଜନ ଅସନ୍ତୋଷ ତୀବ୍ର ହୋଇଛି । ଆସନ୍ତାକାଲି ଅର୍ଥାତ ସୋମବାର ଏହି ଅଂଚଳବାସୀ ଖୋର୍ଦ୍ଧା ବଲାଙ୍ଗିରୀ ଜାତୀୟ ରାଜପଥ ଅବରୋଧ କରିବେ ବୋଲି ଜଣାଯାଇଛି ।
ରାଜସୁନାଖଳା ଫାଣ୍ଡିରେ ଯୋଗଦେଲେ ନୂଆ ଏସ୍ଆଇ, ସୋମବାର ରାସ୍ତାରୋକ
