ଆନ୍ଧ୍ର ସୀମାନ୍ତ ଶୁଙ୍କିରେ ରାସ୍ତା ଉପରେ ବନ୍ୟା ପାଣି ପ୍ରବାହିତ ହୋଇ ପାହାଡ଼ ଧସି ରାସ୍ତା ଜାମ

କୋରାପୁଟ, (ବାଘୁଆବାର୍ତ୍ତା): କୋରାପୁଟ ଜିଲ୍ଲାରେ ବାତ୍ୟା ଗୁଲାବ ପ୍ରଭାବରେ ଗତ ରାତିଠାରୁ ବର୍ଷା ଜାରି ରହିଛି। ଫଳରେ ଜିଲାର ଅଧିକାଂଶ ରାସ୍ତା ଉପରେ ପାଣି ପ୍ରବାହିତ ହେଉଛି। ପବନରେ ଗଛ ଭାଙ୍ଗି ରାସ୍ତା ଅବରୋଧ ହୋଇଛି। ପାହାଡରୁ ମାଟି ଧସି ରାସ୍ତା ଜାମ ହୋଇଛି। ଏନଡିଆରଏଫ ଟିମ ଓ ଦମକଳ ବାହିନୀ ପହଞ୍ଚି ରାସ୍ତା ଉପରୁ ଗଛ ସଫା କରୁଛନ୍ତି। ଜିଲ୍ଲାର କୋରାପୁଟ ସମେତ ବନ୍ଧୁଗାଁ, ନାରାୟଣପାଟଣା, ଲକ୍ଷ୍ମୀପୁର, ସେମିଳିଗୁଡା, ପଟାଙ୍ଗିରେ ପ୍ରବଳ ବର୍ଷା ହେଉଛି। ଆନ୍ଧ୍ର ସୀମାନ୍ତ ଶୁଙ୍କିରେ ରାସ୍ତା ଉପରେ ବନ୍ୟା ପାଣି ପ୍ରବାହିତ ହୋଇ ପାହାଡ଼ ଧସି ରାସ୍ତା ଜାମ ହୋଇଛି। ଘଟଣା ସ୍ଥଳରେ କୋରାପୁଟ ଜିଲ୍ଲାପାଳ ରହି ସ୍ଥିତି ତଦାରଖ କରୁଛନ୍ତି। ୨୬ ନଂ ଜାତୀୟ ରାଜପଥର କୁନ୍ଦୁଲି ଓ ମାଳିପୁଟ ନିକଟରେ ଗଛ ପଡି ରାସ୍ତା ଅବରୋଧ ହୋଇଛି। ଦମକଳ ବାହିନୀ ଘଟଣା ସ୍ଥଳରେ ପହଞ୍ଚି ଗଛକାଟି ରାସ୍ତା ସଫା କରୁଛନ୍ତି ।ଶୁଙ୍କି ନିକଟ ବଡ ନାଳରେ ବନ୍ୟା ଜଳ ରାସ୍ତା ଉପରେ ପ୍ରବାହିତ ହେଉଛି। ଘାଟିରେ ମାଟି ଅତଡ଼ା ଖସି ରାସ୍ତା ଅବରୋଧ ହୋଇଥିବା ବେଳେ ଏନଡିଆରଏଫର ଏକ ଟିମ୍ ଘଟଣାସ୍ଥଳରେ ରହି ଉଦ୍ଧାର କାର୍ୟ୍ୟ ଜାରି ରଖିଛି । ଅନ୍ୟ ପଟେ ତହସିଲଦାର ବାତ୍ୟା ପରେ ସବୁ କ୍ଷୟକ୍ଷତି ଆକଳନ କଲାପରେ ସରକାରୀ ନିୟମ ଅନୁସାରେ କ୍ଷତିପୂରଣ ଦିଆଯିବ ବୋଲି କହିଛନ୍ତି।