ମୁମ୍ବାଇ (ବାଘୁଆବାର୍ତ୍ତା): ଦେଶରେ କରୋନା ଦ୍ୱିତୀୟ ଲହର ସହିତ ଅକ୍ସିଜେନ ସିଲିଣ୍ଡର, ବେଡ ଏବଂ ଔଷଧ ଅଭାବ ମଧ୍ୟ ଦେଖାଯାଉଛି । ଏହି କଠିନ ସମୟରେ ଅନେକ ଷ୍ଟାର ସାହାଯ୍ୟ କରିବାକୁ ଆଗକୁ ଆସିଛନ୍ତି ଏବଂ ନିଜ ନିଜ ସ୍ତରରେ ରୋଗୀଙ୍କୁ ସାହାଯ୍ୟ କରିବାକୁ ଚେଷ୍ଟା କରୁଛନ୍ତି । ବର୍ତ୍ତମାନ ପ୍ରଭାସ ଏବଂ ପୂଜା ହେଗେଡେଙ୍କ ଅଭିନୀତ ଫିଲ୍ମ ‘ରାଧେ ଶ୍ୟାମ’ ର ନିର୍ମାତା ସହାୟତାର ହାତ ବଢ଼ାଇଛନ୍ତି । ସୂଚନା ଅନୁଯାୟୀ, ନିର୍ମାତା ହାଇଦ୍ରାବାଦରେ ନିର୍ମିତ ଫିଲ୍ମ ସେଟର ସମ୍ପୂର୍ଣ୍ଣ ପ୍ରପର୍ଟିକୁ ଏକ ଘରୋଇ ଡାକ୍ତରଖାନାକୁ ଦାନ କରିଛନ୍ତି । ଏହାର ମୂଲ୍ୟ ୬ କୋଟି ବୋଲି କୁହାଯାଉଛି । ପ୍ରକୃତରେ ଫିଲ୍ମରେ ଇଟାଲୀର ଏକ ହସ୍ପିଟାଲ ପ୍ରଦର୍ଶନ କରିବାକୁ ସେଟ ପ୍ରସ୍ତୁତ ହୋଇଥିଲା । ଯେଉଁଥିରେ ୫୦ଟି ବେଡ, ବ୍ୟକ୍ତିଗତ ପ୍ରତିରକ୍ଷା ଉପକରଣ, ସ୍ୱାସ୍ଥ୍ୟ ଉପକରଣ ଷ୍ଟାଣ୍ଡ, ଷ୍ଟ୍ରେଚର ଏବଂ ଅକ୍ସିଜେନ ସିଲିଣ୍ଡର ଅନ୍ତର୍ଭୁକ୍ତ ଥିଲା । ନିର୍ମାତା ଏହାକୁ ଏକ ଘରୋଇ ଡାକ୍ତରଖାନାକୁ ଦାନ କରିଛନ୍ତି । ଫିଲ୍ମର ପ୍ରଡକ୍ସନ ଡିଜାଇନର ରବିନ୍ଦର ରେଡ୍ଡୀ ଡେକାନ କ୍ରୋନିକଲ୍କୁ କହିଛନ୍ତି ଯେ ସେ ଏକ ଘରୋଇ ହସ୍ପିଟାଲର ସିଇଓଙ୍କୁ ଭେଟିଥିଲେ ଯାହା ପରେ ଧାରଣା ଆସିଥିଲା । ସିଇଓ କହିଥିଲେ ଯେ ତାଙ୍କ ପାଖରେ ବେଡ ନାହିଁ ଏବଂ ଏହି ସମୟରେ ସମସ୍ତେ ଏକ କଠିନ ପର୍ଯ୍ୟାୟ ଦେଇ ଗତି କରୁଛନ୍ତି । ରବିନ୍ଦର କହିଛନ୍ତି ଯେ ପ୍ରଭାସ ଏବଂ ‘ରାଧେ ଶ୍ୟାମ’ର ସମସ୍ତ ୟୁନିଟ ଏହି ନିଷ୍କତ୍ତିରେ ବହୁତ ଖୁସି ଯେ ଡାକ୍ତରଖାନା ସେଟ ଏବଂ ଅନ୍ୟାନ୍ୟ ଉପକରଣ କୋଭିଡ ୧୯ ର ରୋଗୀଙ୍କୁ ସାହାଯ୍ୟ କରିବ । ‘ରାଧେ ଶ୍ୟାମ’ର ମେକର୍ସଙ୍କ ଏହି ନିସ୍ପତ୍ତି ପରେ ସୋସିଆଲ ମିଡିଆରେ ଖୁବ ପ୍ରତିକ୍ରିୟା ମିଳୁଛି ।
