ଭୁବନେଶ୍ୱରର ସୁବିଧା ନୟାଗଡ଼ରେ, ଉପଭୋଗ କରିବେ ଯୁବପିଢି

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ସହରରେ ରାଧାକୃଷ୍ଣ ସିନେମ୍ୟାସ୍କ ଆଜି ଉଦଘାଟିତ ହୋଇଯାଇଛି। ନୟାଗଡ଼ ବିଧାୟକ ଡ. ଅରୁଣ କୁମାର ସାହୁ, ପୌର ପରିଷଦ ଅଧ୍ୟକ୍ଷା ନିରୂପମା ଖଟେଇ, ଏସପି ରାହୁଲ ଜୈନ ଅତିଥି ଭାବେ ଯୋଗଦେଇ ଏହାକୁ ଉଦଘାଟନ କରିଥିଲେ। ଏହି ଅବସରରେ ପୌର ପରିଷଦ ଅଧ୍ୟକ୍ଷା ନିରୂପମା ଖଟେଇ ଗଣମାଧ୍ୟମକୁ ପ୍ରତିକ୍ରିୟା ଦେଇ ଭୁବନେଶ୍ୱର ସୁବିଧା ନୟାଗଡ଼ରେ ମିଳିବ ବୋଲି କହିଛନ୍ତି। ଦୀର୍ଘଦିନ ଧରି ଅବହେଳିତ ହୋଇ ପଡ଼ିଥିବା ସିନେମା ହଲ ଜିଲ୍ଲାପାଳ ଓ ବିଧାୟକଙ୍କ ସହଯୋଗରେ କାର୍ଯ୍ୟକ୍ଷମ ହୋଇପାରିଛି। ଫଳରେ ମନଖୁସି କରିବା ପାଇଁ ଭୁବନେଶ୍ବର ଯାଉଥିବା ଯୁବ ପିଢ଼ି ଏବେ ନୟାଗଡ଼ରେ ଅତ୍ୟାଧୁନିକ ବ୍ୟବସ୍ଥା ସହ ସିନେମା ଦେଖିବାର ସୁଯୋଗ ପାଇବେ ବୋଲି କହିଛନ୍ତି। ଏହା ସହ ସିନେମା ହଲ ପ୍ରତିଷ୍ଠାତା ବେଣୁଧର ମହାପାତ୍ର ସିନେମା ହଲ ନୂଆ ସୁବିଧା ଦର୍ଶକଙ୍କୁ ଆକର୍ଷିତ କରିବ ବୋଲି କହିଛନ୍ତି। ନୟାଗଡ଼ରେ ଏଭଳି ଏକ ସିନେମା ହଲ ଆଶାଠାରୁ ଅଧିକ ବୋଲି ସମାଜସେବୀ ଧିରେନ୍ଦ୍ର ପଟ୍ଟନାୟକ କହିଛନ୍ତି। ବଲାଙ୍ଗୀପାର୍କ ପରିସରରେ ମୁକ୍ତାକାଶ ରଙ୍ଗମଞ୍ଚ ନୟାଗଡ଼ ପାଇଁ ସ୍ଵତନ୍ତ୍ର ଖ୍ୟାତି ଆଣିଥିବା ବେଳେ ଅନେକ କାର୍ଯ୍ୟ ନୟାଗଡ଼କୁ ବିକାଶ ମୁଖୀ କରୁଛି।