କେନ୍ଦ୍ରାପଡ଼ା, (ବାଘୁଆବାର୍ତ୍ତା): ପବିତ୍ର ଦୁର୍ଗାଷ୍ଟମୀରେ ମା’ଙ୍କ ପୂଜାର୍ଚ୍ଚନା ଚାଲିଥିବା ବେଳେ ଗହଳି ଅଭିଯୋଗରେ ପୁଲିସର ଜୁଲମ ସର୍ବସାଧାରଣ ତଥା ଶ୍ରଦ୍ଧାଳୁଙ୍କୁ ରୁଷ୍ଟ କରିଛି । ପୂଜା ସମୟରେ ଅତ୍ୟଧିକ ଭିଡ଼ ଅଭିଯୋଗ ଆଣି ପୁଲିସ ପୂଜା ମଣ୍ଡପରେ ତାଲା ପକାଇ ଦେଇଥିଲା । ଯାହାକୁ ନେଇ ଶ୍ରଦ୍ଧାଳୁ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି । କେନ୍ଦ୍ରାପଡ଼ା ସହର ମଢ଼ିଆଳ ବଜାରରେ ଆଜି ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି । ଉତ୍ତ୍ୟକ୍ତ ଲୋକ ପ୍ରତିବାଦ ଜଣାଇବାକୁ ଯାଇ ରାସ୍ତାରୋକ କରିଥିଲେ । ଜନାକ୍ରୋଶ ବଢ଼ୁଥିବା ଦେଖି ଅନ୍ୟ କିଛି ଉପାୟ ନପାଇ ଟାଉନ୍ ଥାନା ପୁଲିସ ଶେଷରେ ତାଲା ଖୋଲିବା ସହ ପୂଜା ମଣ୍ଡପରୁ ଉଠାଇ ନେଇଥିବା ପୂଜକଙ୍କୁ ଛାଡ଼ି ଦେଇଥିଲା । ପୂଜାମଣ୍ଡପ ପାଖରେ ଭିଡ଼ ନିୟନ୍ତ୍ରଣ ପାଇଁ ବ୍ୟବସ୍ଥା କରିବା ଓ ଲୋକଙ୍କୁ ସଚେତନ କରିବା ବଦଳରେ ପୁଲିସର ଦମନଲୀଳା ଶ୍ରଦ୍ଧାଳୁଙ୍କ ମନରେ ଧର୍ମୀୟ ଆଘାତ ପହଞ୍ଚାଇଥିବା ଅଭିଯୋଗ ହୋଇଛି । ସୋସିଆଲ ମିଡିଆରେ ପୁଲିସ କାର୍ୟ୍ୟକଳାପକୁ ସମାଲୋଚନା କରାଯାଇଛି । ମିଳିଥିବା ସୂଚନା ଅନୁସାରେ କେନ୍ଦ୍ରାପଡ଼ା ସହର ମଢ଼ିଆଳରେ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ମଣ୍ଡପରେ ମା’ ଦୁର୍ଗାଙ୍କ ପୂଜାର୍ଚ୍ଚନା ହେଉଥିଲା । ଆଜି ଦୁର୍ଗାଷ୍ଟମୀ ଥିବା ବେଳେ ବ୍ରତଧାରୀମାନେ ମଣ୍ଡପ ପାଖରେ ମା’ଙ୍କ ପାଖରେ ପ୍ରସାଦ ଲଗାଇବାକୁ ଆସିଥିଲେ । ମଣ୍ଡପ ବାହାରେ ବ୍ରତଧାରୀ ମହିଳା, ପୁରୁଷ ଶ୍ରଦ୍ଧାଳୁମାନେ ଧାଡ଼ିରେ ରହିଥିଲେ । ତେବେ ମଣ୍ଡପ ବାହାରେ ଗହଳି ଦେଖି ପୁଲିସ ଭିଡିଓ ଉତ୍ତୋଳନ କରି ନେବା ପରେ ଭ୍ୟାନ୍ ପଠାଇ ପୂଜକଙ୍କୁ ଉଠାଇ ନେଇଥିଲା । ପରେ ପୁଲିସ କର୍ମଚାରୀ ମଣ୍ଡପରେ ତାଲା ପକାଇ ଦେଇଥିଲେ । ଯାହାକୁ ନେଇ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିଲା । ଉତ୍ତ୍ୟକ୍ତ ଲୋକେ ଓ ଶ୍ରଦ୍ଧାଳୁ ତିନିମୁହାଣି-ଅଙ୍ଗୁଳାଇ ରାସ୍ତାର ମଢ଼ିଆଳ ନିକଟରେ ରାସ୍ତାରୋକ କରି ପ୍ରତିବାଦ କରିଥିଲେ । ଫଳରେ କିଛି ଘଣ୍ଟା ଲାଗି ଯାତାୟାତ ବାଧାପ୍ରାପ୍ତ ହେବା ଓ ଜନାକ୍ରୋଣ ବଢ଼ିବାରୁ ପୁଲିସ ବାଧ୍ୟ ହୋଇ ନରମି ଥିଲା ଓ ପୂଜକଙ୍କୁ ଛାଡ଼ିଦେଇଥିଲା । ଭବିଷ୍ୟତରେ ପୁନର୍ବାର ଗହଳି ହେଲେ ପୂଜକ ଦାୟୀ ରହିବେ ବୋଲି ଲେଖି ଆସିବା ପରୋ ପୁଲିସ ତାଙ୍କୁ ଛାଡ଼ି ଦେଇଥିଲା । ପରେ ପୂଜା କମିଟି ସଦସ୍ୟଙ୍କ ହାତରେ ମଣ୍ଡପ ଚାବି ଦେଇ ପଠାଇଥିଲା । ପୂଜାକମିଟି ସମ୍ପାଦକ ମନ୍ମଥ ସିଂହଙ୍କ ଅଭିଯୋଗ ଯେ ପୂଜାକମିଟି ତରଫରୁ ସ୍ୱେଚ୍ଛାସେବୀଙ୍କ ଜରିଆରେ ଭିଡ଼କୁ ନିୟନ୍ତ୍ରଣ ରଖିବା ପାଇଁ ଯଥାସମ୍ଭବ ଉଦ୍ୟମ ହୋଇଥିଲା । ତେବେ ସେଠାରେ ପୁଲିସ ତରଫରୁ କୌଣସି କର୍ମଚାରୀ ମୁତୟନ କରାଯାଇନଥିଲା । କେବଳ ମଢ଼ିଆଳ ବଜାର ନୁହେଁ, ସହରର ଅନ୍ୟ ଯେଉଁ ସ୍ଥାନରେ ମା’ଙ୍କର ପୂଜାର୍ଚ୍ଚନା ହେଉଥିଲା ସୁରକ୍ଷା ଦୃଷ୍ଟିରୁ ସେଠାରେ ପୁଲିସ କର୍ମଚାରୀ ଉପସ୍ଥିତ ରହିବା କଥା । ଆଉ ଶ୍ରଦ୍ଧାଳୁମାନଙ୍କ ମନରେ ଧର୍ମୀୟ ଭାବନାକୁ ଆଘାତ ଦେଇ ପୂଜା ମଣ୍ଡପରେ ପୁଲିସ ଦମନଲୀଳା ଚଳାଇଥିଲା । ଆମକୁ ଏନେଇ ପୂର୍ବରୁ ସୂଚିତ କରାଯାଇନଥିଲା । ମା’ଙ୍କ ପୂଜା କାର୍ୟ୍ୟରେ ପୁଲିସ ବିଘ୍ନ ସୃଷ୍ଟି କରି ମଣ୍ଡପରେ ତାଲା ପକାଇ ଦେଇଥିଲା ଓ ପୂଜକଙ୍କୁ ଉଠାଇନେଇଥିଲା ବୋଲି ସମ୍ପାଦକ ଶ୍ରୀ ସିଂହ କହିଛନ୍ତି । କେନ୍ଦ୍ରାପଡ଼ା ଟାଉନ୍ ପୁଲିସ କହିବା କଥା ମଣ୍ଡପରେ ଭିଡ଼ ନିୟନ୍ତ୍ରଣ କରିବା ଦାୟିତ୍ୱ ପୂଜା କମିଟିର । ସେମାନେ ଲୋକଙ୍କୁ ବାରଣ ନ କରି ଗହଳିକୁ ଅଧିକ ପ୍ରୋତ୍ସାହିତ କରିଚାଲିଥିଲେ । କୋଭିଡ୍ କଟକଣା ଖିଲାପ ହେବାରୁ ବାଧ୍ୟ ହୋଇ ଆମକୁ ପଦକ୍ଷେପ ଗ୍ରହଣ କରିବାକୁ ପଡ଼ିଲା । ଯାହା ପଦକ୍ଷେପ ଗ୍ରହଣ କରାଯାଇଛି ଆଇନତଃ କରାଯାଇଛି ବୋଲି ପୁଲିସ କହିଛି ।
