ଭୁବନେଶ୍ୱର, (ବାଘୁଆବାର୍ତ୍ତା): କୋରାପୁଟ ପରେ ରାଜଧାନୀ ଭୁବନେଶ୍ୱରରେ ସୁଟିଂ କରିବେ ଚର୍ଚ୍ଚିତ ଫିଲ୍ମ ନିର୍ମାତା ଏସ୍ଏସ୍ ରାଜାମୌଲୀ । ଏନେଇ ସିନେମାର ପ୍ରମୁଖ ଷ୍ଟାର୍ ବଲିଉଡ୍ ଦେଶୀ ଗର୍ଲ ପ୍ରିୟଙ୍କା ଚୋପ୍ରା ଓ ତେଲୁଗୁ ସୁପର୍ଷ୍ଟାର୍ ମହେଶବାବୁ ମଧ୍ୟ ଭୁବନେଶ୍ୱର ଆସିବେ ବୋଲି ସୂଚନା ମିଳିଛି । ସିନେମା ଟିମ୍ ଭୁବନେଶ୍ୱର ଏବଂ ଏହାର ଆଖାପାଖରେ ସୁଟିଂ ନେଇ ଯୋଜନା କରିଛି । ବର୍ତ୍ତମାନ ପୂରା ଟିମ୍ ସିନେମା ଏସ୍ଏସ୍ଏମ୍ବି-୨୯ର ସୁଟିଂ ପାଇଁ କୋରାପୁଟରେ ଡେରା ପକାଇଛି । ସେମିଲିଗୁଡ଼ା ବ୍ଲକ୍ ତଳମାଳି ଅଞ୍ଚଳରେ ଫିଲ୍ମର ସୁଟିଂ ଜୋର୍ରେ ଆଗେଇ ଚାଲିଛି । ଲୋକପ୍ରିୟ ଷ୍ଟାର୍ମାନଙ୍କ ସହ ସୁଟିଂ ଦେଖିବାକୁ ସ୍ଥାନୀୟ ଅଞ୍ଚଳରେ ପ୍ରବଳ ଭିଡ଼ ଜମୁଛି । ଫିଲ୍ମର କାହାଣୀକୁ ଗୋପ ରଖାଯାଇଥିବାବେଳେ କ୍ୟାମ୍ପ୍ କରି ସୁଟିଂ ସେଟ୍ ଜଗିଛି ସିନେମା ନିର୍ମାଣଧୀନ ଟିମ୍ । ପାଖାପାଖି ୫୦୦ରୁ ଅଧିକ ସଦସ୍ୟ ଗତ ୮-୯ ତାରିଖରୁ ଆସି ସିନେମା ସୁଟିଂରେ ଲାଗିଛନ୍ତି । ଆଗ ନିର୍ଦ୍ଦେଶକ ରାଜାମୌଲୀ ଓ ଅଭିନେତା ମହେଶବାବୁ ଆସିଥିବାବେଳେ ପଛରେ ପହଞ୍ଚିଥିଲେ ଅଭିନେତ୍ରୀ ପ୍ରିୟଙ୍କା ଚୋପ୍ରା । ସମସ୍ତେ ଦେଓମାଳି କଟେଜ୍ରେ ରହୁଥିଲା ବେଳେ ଆସନ୍ତା ୨୯ ତାରିଖ ତଥା ମାର୍ଚ୍ଚ ଶେଷ ସୁଦ୍ଧା ସେଠାରେ ସମସ୍ତ ସୁଟିଂ ସରିବ । ଏହାପରେ ଟିମ୍ ଭୁବନେଶ୍ୱର ଅଭିମୁଖେ ଯାତ୍ରା କରି ପୂର୍ବରୁ ଠିକ୍ ହୋଇଥିବା ସ୍ଥାନରେ ସୁଟିଂ କରିବ ବୋଲି ସୂଚନା ମିଳିଛି । କିନ୍ତୁ ନିର୍ଦ୍ଦିଷ୍ଟ ଭାବରେ କେଉଁ ସ୍ଥାନରେ ହେବ ତା’ର ସୂଚନା ନଥିବା ବେଳେ ପ୍ରଯୋଜନା ସଂସ୍ଥା ପକ୍ଷରୁ ଘୋଷଣାକୁ ଅପେକ୍ଷା ରହିଛି ।
ରାଜଧାନୀ ସୁଟିଂ କରିବେ ଏସ୍ଏସ୍ ରାଜାମୌଲୀ, ଆସିବେ ପ୍ରିୟଙ୍କା, ମହେଶବାବୁ
