ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ପୋଲିସକୁ ବଡ ସଫଳତା। ଲକ୍ଷାଧିକ ଟଙ୍କାର ବାଣ ବିସ୍ଫୋରକ ଜବତ କରିବା ସହ ୫ଜଣ ଅଭିଯୁକ୍ତକୁ ଗିରଫ୍ କରିଛି ନୟାଗଡ଼ ସଦର ପୋଲିସ ଓ ଇଟାମାଟି ପୋଲିସ। ଗିରଫ ହୋଇଥିବା ଅଭିଯୁକ୍ତ ମାନେ ଇଟାମାଟି ଓ ସଦର ଥାନା ଅଞ୍ଚଳର ବୋଲି ସାମ୍ବାଦିକ ସମ୍ମିଳନୀରେ ନୟାଗଡ଼ ଆରକ୍ଷୀ ଅଧିକ୍ଷକ ଜ୍ୟୋତି ପ୍ରକାଶ ସମାନ୍ତରାୟ ପ୍ରକାଶ କରିଛନ୍ତି। ସୂଚନାନୁସାରେ, ନୟାଗଡ଼ ଜିଲ୍ଲା ନୂଆଗାଁ ଥାନା ଅନ୍ତର୍ଗତ କୋରଡ଼ା ଗାଁରେ ବେଆଇନ ବାଣ ଭିଡୁଥିବା ବେଳେ ବିସ୍ଫୋରଣ ଘଟିଥିଲା। ତେବେ ଏହି ବିସ୍ପୋରଣରେ ୬ଜଣ ଗୁରୁତର ଆହାତ ହୋଇଥିବା ବେଳେ ପୋଲିସର ମୁଣ୍ଡ ବିନ୍ଧାର କାରଣ ପାଲଟିଥିଲା।
ତେବେ ନୟାଗଡ଼ ଆରକ୍ଷୀ ଅଧିକ୍ଷକ ଏସ ସୁଶ୍ରୀଙ୍କ ନିର୍ଦ୍ଦେଶ କ୍ରମେ ଏକ ସ୍ୱତନ୍ତ୍ର ଟିମ୍ ଗଠନ କରି ଜିଲ୍ଲାର ବିଭିନ୍ନ ସ୍ଥାନରେ ଚଢାଉ ଜାରି ରଖିଥିବା ବେଳେ ଇଟାମାଟି ଥାନା ପୋଲିସ୍ ଓ ସଦର ଥାନା ପୋଲିସକୁ ସାମାନ୍ୟ ସଫଳତା ମିଳିଛି। ଇଟାମାଟି ପୋଲିସ ଇଟାମାଟି ଅଞ୍ଚଳରୁ ଅଢ଼େଇ ଲକ୍ଷ ଟଙ୍କାର ବେଆଇନ୍ ବାଣ ଜବତ୍ କରିବା ସହ ଇଟାମାଟି ତନ୍ତିସାହିର ନୀଳମାଧବ ସେନାପତି (୪୨), ରାମଚନ୍ଦ୍ର ସାହୁ (୬୫), ପ୍ରକାଶ ସାହୁ (୬୨) ଓ କୁମର ବାଇ (୫୦) ଗିରଫ୍ କରିଛି। ସେପଟେ ନୟାଗଡ଼ ସଦର ପୋଲିସ ମଧ୍ୟ ପଲ୍ଲିଶାସନ ଗାଁରେ ବେଆଇନ ବାଣ ଭିଡୁଥିବା ଖବର ପାଇ ଚଢ଼ାଉ କରିଥିଲା। ତେବେ ଚଢ଼ାଉ ସମୟରେ ଦେଢ଼ ଲକ୍ଷ ଟଙ୍କାର ବାଣ ଓ ବିଭିନ୍ନ ସାମଗ୍ରୀ ଜବତ କରିବା ସହ ଲଡୁକିଶୋର ଭଟ୍ଟ ବ୍ରହ୍ମା(୬୮) ଙ୍କୁ ଗିରଫ କରିଛି। ନୟାଗଡ଼ ଜିଲାରେ କୌଣସି ବ୍ୟକ୍ତି ବିଶେଷଙ୍କୁ ବାଣ ତିଆରି କରିବା ପାଇଁ ଲାଇସେନ୍ସ ଦିଆଯାଇ ନଥିବା ସୂଚନା ଦେଇଛନ୍ତି ଅତିରିକ୍ତ ଆରକ୍ଷୀ ଅଧିକ୍ଷକ ଶ୍ରୀଯୁକ୍ତ ସମାନ୍ତରାୟ। ଆଜିର ଏହି ସାମ୍ବାଦିକ ସମ୍ମିଳନୀରେ ଇଟାମାଟି ଆଇଆଇସି ପ୍ରିୟବ୍ରତ ରାଉତ, ନୟାଗଡ଼ ସଦର ଥାନା ଆଇଆଇସି ପ୍ରିୟତମା ପ୍ରଧାନ, ଏସଆଇ ମହମ୍ମଦ ଜର୍ଫୁଲା, ଏସଆଇ ସୁଶ୍ରୀ ସଙ୍ଗୀତା ମଙ୍ଗରାଜ, ଏଏସଆଇ ଧିରେନ୍ଦ୍ର ପାତ୍ର, ଏଏସଆଇ ସନ୍ତୋଷ କୁମାର ପ୍ରଧାନ ପ୍ରମୁଖ ଉପସ୍ଥିତ ଥିଲେ। ଉକ୍ତ ଅଭିଯୁକ୍ତ ମାନଙ୍କୁ ଆସନ୍ତାକାଲି ସ୍ୱାସ୍ଥ୍ୟ ପରୀକ୍ଷା ପରେ କୋର୍ଟ ଚାଲାଣ କଟାଯିବ ବୋଲି ଜଣାପଡ଼ିଛି।
