ନୟାଗଡ଼, (ବାଘୁଆବାର୍ତ୍ତା): ରାଜ୍ୟ ସରକାର ପ୍ରବାସୀଙ୍କୁ ଫେରିବାକୁ ଅନୁମତି ଦେବା ପରେ ବିଭିନ୍ନ ବସ୍ ଓ ଟ୍ରେନ ଯୋଗେ ଜିଲ୍ଲାକୁ ଅନେକ ପ୍ରବାସୀ ଫେରୁଥିବା ବେଳେ କିଛି ପ୍ରବାସୀ କୈାଣସି ସୁବିଧା ନପାଇ ଚାଲି ଚାଲି ତଥା ବାଇକ୍ ଯୋଗେ ଫେରୁଥିବା ଜଣାଯାଇଛି । ଏହି ପ୍ରରିପ୍ରେକ୍ଷିରେ ନୟାଗଡ଼ ଜିଲ୍ଲା ଦଶପଲ୍ଲା ଅଂଚଳର କିଛି ପ୍ରବାସୀ ଶ୍ରମିକ ୬୫୦ କିମି ଚାଲି ଚାଲି ଆସିବା ପରେ ପ୍ରଶାସନ ଖବରପାଇ ସେମାନଙ୍କୁ ଆଣିବା ପାଇଁ ଗାଡ଼ି ପଠାଇଥିବା ଜଣାଯାଇଛି । ସୂଚନାନୁସାରେ, ନୟାଗଡ଼ ଜିଲ୍ଲା ଦଶପଲ୍ଲା ଅଂଚଳର ୧୪ ଜଣ ଏବଂ ନୟାଗଡ଼ର ଜଣେ ଆନ୍ଧ୍ରପ୍ରଦେଶର କ୍ରିଷ୍ଣା ଜିଲ୍ଲା ବିଜୟୱାଡ଼ା ନିକଟବର୍ତ୍ତୀ ବାପୁଲାପାଡ଼ୁଠାରେ ଅବସ୍ଥିତ ସୂତାକଳରେ କାମ କରୁଥିଲେ । କରୋନା ମହାମାରୀ ଏବଂ ଲକ୍ଡାଉନ୍ ପାଇଁ ସେଠାରେ କାମ ବନ୍ଦ ହୋଇଯାଇଥିବା ବେଳେ ନାନାଦି ଅସୁବିଧାର ସମ୍ମୁଖୀନ ହୋଇଥିବା ଏହି ବ୍ୟକ୍ତିମାନେ ଚଳିତମାସ ୯ ତାରିଖରେ ଘରକୁ ଫେରିବା ପାଇଁ ବାହାରିଥିଲେ । ସେମାନେ ଦୀର୍ଘ ୫ ଦିନରେ ୬୫୦ କିଲୋମିଟର ବାଟ ଅତିକ୍ରମ କରି ଆସିବା ପରେ ଆଜି ବ୍ରହ୍ମପୁର ନିକଟସ୍ଥ ଗୋଳମଥରା ଥାନାଠାରେ ପଂହଚି ଦଶପଲ୍ଲା ବ୍ଲକ ମଧ୍ୟଖଣ୍ଡ ସରପଂଚ ଗଣେଶ୍ୱର ନାୟକଙ୍କୁ ଯୋଗାଯୋଗ କରିଥିଲେ । ସ୍ଥାନୀ ୟସରପଂଚ ଏନେଇ ଦଶପଲ୍ଲା ବିଡିଓଙ୍କୁ ଜଣାଇବା ପରେ ବିଡିଓ ନୟାଗଡ଼ ଉପଜିଲ୍ଲାପାଳଙ୍କୁ ଅବଗତ କରିଥିଲେ । ଫଳରେ ଉପଜିଲ୍ଲାପାଳ ଲଗ୍ନଜିତ ରାଉତ ଏହି ପ୍ରବାସୀଙ୍କ ସହ ଯୋଗାଯୋଗ କରି ସେମାନଙ୍କୁ ସେଠାରେ ଅପେକ୍ଷା କରିବାକୁ କହିବା ସହ ସ୍ଥାନୀୟ ପୁଲିସକୁ ଦେଖାରଖା କରିବା ଦାୟିତ୍ୱ ଦେଇଥିଲେ । ପରେ ନୟାଗଡ଼ ଜିଲ୍ଲାରୁ ଏକ ସ୍ୱତନ୍ତ୍ର ଗାଡ଼ି ଏହି ପ୍ରବାସୀଙ୍କୁ ଫେରାଇ ଆଣିବାକୁ ପଠାଯାଇଥିବା ଜଣାପଡ଼ିଛି । ସେମାନେ ନୟାଗଡ଼ ଫେରିବା ପରେ ସେମାନଙ୍କୁ କ୍ୱାରେଣ୍ଟାଇନ୍ରେ ରଖାଯିବ ବୋଲି ସୂଚନା ମିଳିଛି ।
