ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଟାଉନ ଷ୍ଟେସନରେ ବୋମା ଆଶଙ୍କା ନେଇ ପୁଲିସ ଓ ବୋମା ନିଷ୍କ୍ରିୟକାରୀ ଦଳ ଛାନଭିନ୍ କରିଛନ୍ତି । ଭଦ୍ରକରୁ ଦଶପଲ୍ଲା ଅଭିମୂଖେ ଆସୁଥିବା ଟ୍ରେନ ଏବଂ ପୂରା ଷ୍ଟେସନକୁ ଛାନଭିନ୍ କରାଯାଇଛି । ଭାରତ ପାକିସ୍ତାନ ଯୁଦ୍ଧକୁ ନେଇ ଆଜି ନୟାଗଡ଼ ଜିଲ୍ଲା ପୁଲିସ ପକ୍ଷରୁ କଡ଼ାକଡ଼ି ଯାଞ୍ଚ କରାଯାଇଛି ।
ଯଦି ଟାଉନ ଷ୍ଟେସନରେ ବୋମା କିମ୍ବା କୈାଣସି ଡ୍ରୋନ ଆକ୍ରମଣ ହୁଏ, ତାହାକୁ ପ୍ରତିହତ କରିବା ପାଇଁ କିଭଳି ପଦକ୍ଷେପ ନିଆଯିବ, ସେ ନେଇ ଜିଲ୍ଲା ପୁଲିସ ସତର୍କତାର ଯାଞ୍ଚ କରୁଛି । ଭଦ୍ରକ ଟ୍ରେନରେ ଆସିଥିବା ସମସ୍ତ ଯାତ୍ରୀଙ୍କ ଲଗେଜକୁ ଯାଞ୍ଚ କରାଯିବା ସହ ଆବଶ୍ୟକ ପଦକ୍ଷେପ ଗ୍ରହଣ କରାଯାଇଛି ।
ନୟାଗଡ଼ ଏସପି ଏସ୍ ସୁଶ୍ରୀଙ୍କ ନିର୍ଦ୍ଦେଶରେ ପୁଲିସ ଓ ବୋମା ନିଷ୍କ୍ରିୟକାରୀ ଦଳ ଛାନଭିନ୍ କରୁଛନ୍ତି । ସେହିଭଳି ଭାବେ ନୟାଗଡ଼ ସହରରେ ବିଭିନ୍ନ ଗାଡି ମୋଟର ଯାଞ୍ଚ କରାଯାଇଛି । ଘରୋଇ ବସ ଏବଂ ବିଭିନ୍ନ ଯାନ ବାହାନକୁ ପୁଲିସ ଓ ବୋମା ନିଷ୍କ୍ରିୟକାରୀ ଦଳ ତନ୍ନତନ୍ନ କରି ଯାଞ୍ଚ କରିଛନ୍ତି ।
