ଲକ୍ଷନୌ (ବାଘୁଆବାର୍ତ୍ତା): କରୋନା ସମୟରେ ଉତ୍ତରପ୍ରଦେଶରୁ ଗୋଟିଏ ପରେ ଗୋଟିଏ ଅମାନବୀୟ ଘଟଣା ଦେଖିବାକୁ ମିଳୁଛି । କେତେବେଳେ ନଦୀରେ ଶବ ଫିଙ୍ଗା ହେଉଛି ତ ଆଉ କେବେ କରୋନା ପଜିଟିଭ ଶବକୁ ଏଣେତେଣେ ଫିଙ୍ଗା ଚାଲିଛି । ଇଏ ତ ସାଧାରଣ ଜନତାଙ୍କ କଥା । କିନ୍ତୁ ଆଇନର ରକ୍ଷକ ପୁଲିସ କର୍ମଚାରୀମାନେ ମଧ୍ୟ ଏଭଳି କିଛି କାର୍ଯ୍ୟ କରିଛନ୍ତି ଯାହା ପାଇଁ ସେମାନଙ୍କୁ ନିଲମ୍ବିତ କରିଛନ୍ତି ଉତ୍ତରପ୍ରଦେଶ ସରକାର । ଏହି ଘଟଣା ଘଟିଛି ରାଜ୍ୟରେ ବାଲ୍ଲିଆ ଜିଲ୍ଲାରେ । ଗଙ୍ଗା ଘାଟରେ ମୃତଦେହକୁ ଟାୟାର ଓ ପେଟ୍ରୋଲ ଯୋଗେ ପୋଡାଯାଉଛି । କିଛି ପୁଲିସ କର୍ମଚାରୀ ଅନ୍ତିମ ସଂସ୍କାର କାର୍ଯ୍ୟର ତଦାରଖ କରୁଛନ୍ତି । ସୋସିଆଲ ମିଡିଆରେ ଏହି ଭିଡିଓ ଭାଇରାଲ ହେବା ପରେ ପୁଣିଥରେ ଉତ୍ତର ପ୍ରଦେଶ ସରକାରଙ୍କ ଅପାରଗତା ପଦାରେ ପଡିଛି । ଏହି ଭିଡିଓରେ ଦେଖାଯାଉଛି ଯେ ଜଣେ ବ୍ୟକ୍ତି ନଦୀରୁ ବାହାର କରାଯାଇଥିବା ଏକ ଶବକୁ ପୋଡିବା ପାଇଁ ଜୁଇ ନିଆଁରେ ପେଟ୍ରୋଲ ପକାଉଛନ୍ତି ଓ ଗାଡ଼ି ଟାୟାର ମଧ୍ୟ ନିଆଁରେ ଜାଳୁଛନ୍ତି । ଆଉ ସେଠାରେ ଉପସ୍ଥିତ ରହି ଏହି ସମସ୍ତ ଘଟଣାକୁ ଦେଖୁଛନ୍ତି ବିଭାଗୀୟ ଅଧିକାରୀ । ସୂଚନା ଥାଉକି ନଦୀରେ ଶବ ଫିଙ୍ଗାଯାଉଥିବାରୁ ନଦୀକୂଳରେ ପେଟ୍ରୋଲିଂ କରିବା ପାଇଁ ରାଜ୍ୟ ପୁଲିସକୁ ନିର୍ଦ୍ଦେଶ ଦେଇଛନ୍ତି ଉତ୍ତରପ୍ରଦେଶ ସରକାର । ହେଲେ ପୁଲିସ ଉପସ୍ଥିତିରେ ଚାଲିଛି ଏମିତି ବେଆଇନ କାର୍ଯ୍ୟ । ଏହି ଘଟଣାରେ ୫ ଜଣ ପୁଲିସଙ୍କୁ ନିଲମ୍ବିତ କରାଯାଇଛି । ତା ସହିତ ଭାଇରାଲ ଭିଡିଓର ଯାଞ୍ଚ କରିବା ସହିତ ଘଟଣାର ତଦନ୍ତ ନିର୍ଦ୍ଦେଶ ଦିଆଯାଇଛି । ମିଳିଥିବା ସୂଚନା ଅନୁସାରେ ଦୁଇଦିନ ତଳେ ନଦୀ କୂଳରୁ ଦୁଇଟି ଶବ ମିଳିଥିଲା । ଖବର ମିଳିବା ପରେ ପୁଲିସକୁ ତୁରନ୍ତ ସେଠାରେ ପହଞ୍ଚି ଶବ ଉଦ୍ଧାର କରିବା ସହିତ ତୁରନ୍ତ ସଂସ୍କାର କାର୍ଯ୍ୟ ସାରିବାକୁ ଟାୟାର ଓ ପେଟ୍ରୋଲର ବ୍ୟବହାର କରିଥିଲା ।
ପାଞ୍ଚ ପୁଲିସ କର୍ମଚାରୀ ନିଲମ୍ବିତ, ଟାୟାର ଜାଳି କରୁଥିଲେ ଶବ ସଂସ୍କାର
