ଉଦ୍ଘାଟନ କଲେ ମନ୍ତ୍ରୀ
ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ସହରର ବଲାଙ୍ଗୀ ବନ୍ଧଠାରେ ଅନ୍ତଜାତୀୟସ୍ତରର ପାର୍କ ନିର୍ମାଣ କାର୍ଯ୍ୟ ଚାଲୁ ରହିଥିବା ବେଳେ ସହର ମଧ୍ୟରେ ଥିବା ଜଜାଙ୍ଗୀ ପାହାଡ଼ ଉପରେ ଏକ ପିକିନିକ୍ ସ୍ଥଳୀ ନିର୍ମାଣ ହୋଇଛି । ଉଦ୍ୟମୀ ଯୁବକଙ୍କ ସହଯୋଗରେ ଏହି ପିକନିକ ସ୍ଥଳୀ ନିର୍ମାଣ ହୋଇଥିବା ବେଳେ ଏହାକୁ ନୟାଗଡ଼ ବିଧାୟକ ତଥା ମନ୍ତ୍ରୀ ଡ. ଅରୁଣ କୁମାର ସାହୁ ନଡ଼ିଆ ଭାଙ୍ଗି ଉଦ୍ଘାଟନ କରିଛନ୍ତି । ଯାହାକୁ ନେଇ ସହରବାସୀଙ୍କ ମଧ୍ୟରେ ଏକ ଖୁସିର ବାତାବରଣ ଖେଳିିଯାଇଛି ।
ସୂଚନାନୁସାରେ, ପାହାଡ଼ ପର୍ବତଘେରା ନୟାଗଡ଼ ସହରରେ ବଣଭୋଜି ପାଇଁ କୈାଣସି ନିଦ୍ଧିଷ୍ଟ ସ୍ଥାନ ନାହିଁ । ସହରବାସୀ ପୁରୁଣାସହରଠାରୁ ପାହାଡ଼ ଚଢ଼ି ଟାସେରା ନିକଟରେ ଭୋଜିଭାତ କରୁଥିବା ବେଳେ ଏହା ଅତ୍ୟନ୍ତ କଷ୍ଟଦାୟକ ହୋଇଥାଏ । ଏଣୁ ସ୍ଥାନୀୟ ୧୩ ନଂ ୱାର୍ଡ଼ର କିଛି ଉତ୍ସାହୀ ଯୁବକ ତଥା ସ୍ୱେଚ୍ଛାସେବୀ ଓ ଦିବ୍ୟଜ୍ୟୋତି କ୍ଲବର ସଦସ୍ୟମାନଙ୍କ ଦ୍ୱାରା ଏହି ଜଜାଙ୍ଗୀ ପାହାଡ଼ର ଉପରିଭାଗକୁ ସଫାସୁତରା କରାଯାଇ କରି ପିକିନିକ୍ ସ୍ଥଳୀ ନିର୍ମାଣ କରିବା ପାଇଁ ଚିନ୍ତାକରି ନିଜ ନିଜ ଭିତରେ ଚାନ୍ଦା କରି ଏହି ପାହାଡ଼କୁ ପାହାଚ ନିର୍ମାଣ କରିଛନ୍ତି । ଏଥିସହିତ ଶ୍ରମ ଦାନ କରି ପାହାଡ଼ ଉପରେ ସଫା ସୁତରା କରିବା ସହ ବଣଭୋଜି ନିମନ୍ତେ ବ୍ୟବସ୍ଥା କରିଛନ୍ତି । ଭୁପୃଷ୍ଠରୁ ଏକ ଉଚ୍ଚ ସ୍ଥାନରେ ସହରର ସୁନ୍ଦରତାକୁ ପରଖିବା ସହ ଏଠାରେ ବଣଭୋଜି କରିବା ଏକ ନିଆରା ଆନନ୍ଦ ଦେବ ବୋଲି ସେମାନେ ଆଶା ବାନ୍ଧିଛନ୍ତି । ଏଠାରେ ପାନୀୟ ଜଳର ବନ୍ଦୋବସ୍ତ, ଆଲୋକିକରଣ ମଧ୍ୟ କରାଯାଇଛି । ଏହି ଉଦ୍ଘାଟନ କାର୍ଯ୍ୟକ୍ରମରେ ମନ୍ତ୍ରୀଙ୍କ ସହ ସତ୍ୟବାଦୀ ବିଧାୟକ ଉମାକାନ୍ତ ସାମନ୍ତରାୟ, ବିଜୁ ଶ୍ରମିକ ସାମ୍ମୁଖ୍ୟ ନେତା ଶ୍ରୀକାନ୍ତ ପଟ୍ଟନାୟକ, ବିଜୁ ଯୁବ ଜନତା ଦଳ ସଭାପତି ରମେଶ ଚନ୍ଦ୍ର ସାହୁ, ୧୩ନଂ ୱାର୍ଡ଼ ପୂର୍ବତନ କାଉନଂସେଲର ଅଖିଳ କୁମାର ସ୍ୱାଇଁ ଯୋଗ ଦେଇଥିଲେ ।
