ଓଡ଼ଗାଁ (ବାଘୁଆବାର୍ତ୍ତା ବ୍ୟୁରୋ): ଗୁରୁବାର ୨:୩୦ ସମୟରେ ଓଡଗାଁ ଥାନା ବାହାଡାଝୋଲା ଫାଣ୍ଡି ଅନ୍ତର୍ଗତ ନୂଆଗାଁ ବ୍ଲକ କାପ୍ତାପଲ୍ଲୀ ପଞ୍ଚାୟତ ଅଞ୍ଚଳରେ ଏକ ଡାଲା ପିକ୍ଅପ୍ ଭ୍ୟାନ ଓଲଟି ପଡିବାରୁ ଗାଡି ମାଲିକ ତଥା ଚାଳକ ଅନ୍ତର୍ଯ୍ୟାମୀ ନାୟକ(୨୭)ଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ୨ଜଣ ଆହତ ହୋଇଛନ୍ତି । ଘଟଣାରୁ ଜଣାଯାଏ ଓଡଗାଁ ଥାନା ଅନ୍ତର୍ଗତ କୁଶଢିପି ଗ୍ରାମର ଅନ୍ତର୍ଯ୍ୟାମୀ ନାୟକ ନିଜ ମହିନ୍ଦ୍ରା ପିକ୍ଅପ୍ ଭ୍ୟାନ୍ ଓଡି-୨୫ଏଫ୍-୭୯୩୯ ରେ ଆମ୍ବ ବୋଝେଇ କରି ଗାଁକୁ ଫେରୁଥିବା ବେଳେ ଭଣ୍ଡାରିବାରୀ ମୋଡରେ ଗାଡିଟି ଭାରସାମ୍ୟ ହରାଇ ଓଲଟି ପଡିଥିଲା ।
ଏଥିରେ ଅନ୍ତର୍ଯ୍ୟାମୀଙ୍କ ମୃତ୍ୟୁ ଘଟିଥିବା ବେଳେ ତାଙ୍କ ସହିତ ଥିବା କୁଶଢିପି ଗ୍ରାମର ମହେଶ୍ୱର ନାୟକ(୩୫) ଓ ସନ୍ତୋଷ ସାହୁ(୫୫) ଗୁରୁତର ଆହତ ହୋଇଥିଲେ । ଖବର ପାଇ ଓଡଗାଁ ଅଗ୍ନିଶମ ସଂସ୍ଥାର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ମୃତ ଯୁବକ ଓ ଆହତଙ୍କୁ ଉଦ୍ଧାର କରି ଓଡଗାଁ ମେଡିକାଲରେ ଭର୍ତି କରିଥିଲେ । ପୁଲିସ ଶବକୁ ଜବତ କରି ବ୍ୟବଛେଦ ପାଇଁ ପଠାଇଥିଲା । ଏଥି ସହିତ ଦୁର୍ଘଟଣାଗ୍ରସ୍ତ ଗାଡିକୁ ଜବତ କରି ୯୬/୧୮ରେ ଏକ ମାମଲା ରୁଜୁ କରି ତଦନ୍ତ ଚାଲୁ ରଖିଛି ।
