ଭୁବନେଶ୍ବର, (ବାଘୁଆବାର୍ତ୍ତା): ଆସନ୍ତା ବର୍ଷ ଏପ୍ରିଲ ମାସରୁ ବିଧିବଦ୍ଧ ଭାବେ ଦେଶରେ ଜନଗଣନା ଆରମ୍ଭ ହେବ । ଏଥିପାଇଁ କେନ୍ଦ୍ର ସରକାର ପ୍ରସ୍ତୁତି ଆରମ୍ଭ କରିବା ସହ ରାଜ୍ୟଗୁଡ଼ିକ ପ୍ରସ୍ତୁତ ରହିବାକୁ ପରାମର୍ଶ ଦେଇଛନ୍ତି । ଯଦି କରୋନା ଅତି ଗୁରୁତର ପରିସ୍ଥିତି ଛିଡ଼ା ନକରାଏ ତେବେ ୨୦୨୨ ଏପ୍ରିଲରେ ଜନଗଣନା ହେବ ବୋଲି ସରକାରୀ ଭାବେ ସୂଚନା ମିଳିଛି । ଆଗକୁ ଯଦି କରୋନାର ତୃତୀୟ ଲହର ନଆସେ ତେବେ ଜନଗଣନା ପ୍ରକ୍ରିୟା ଆରମ୍ଭ ହେବ । ତେଣୁ ଯଦି ରାଜ୍ୟ ସରକାର ଜିଲ୍ଲା, ଉପଖଣ୍ଡ, ତହସିଲ, ରାଜସ୍ୱ ଗ୍ରାମ କିମ୍ବା ପୌରାଞ୍ଚଳର ପ୍ରଶାସନିକ ସୀମା ପରିବର୍ତ୍ତନ କରିବାକୁ ଚାହୁଁଛନ୍ତି ତେବେ ଡିସେମ୍ବର ୩୧ ସୁଦ୍ଧା ସାରିବେ । ଜନଗଣନା କମିଶନର ଓ ରେଜିଷ୍ଟ୍ରାର ଜେନେରାଲ ଏ ସଂପର୍କରେ ରାଜ୍ୟ ସରକାରଙ୍କୁ ଅବଗତ କରାଇବା ପରେ ରାଜସ୍ୱ ବିଭାଗ ଏ ସଂକ୍ରାନ୍ତରେ ଏକ ବିଜ୍ଞପ୍ତି ଜାରି କରିଛି । ତ୍ରୁଟିଶୂନ୍ୟ ଜନଗଣନା ପାଇଁ ସୀମା ନିର୍ଦ୍ଧାରଣ କାମ ପରେ ଜାନୁଆରୀ ମାସରୁ ତାଲିମ କାର୍ୟ୍ୟକ୍ରମ ଆରମ୍ଭ ହେବ । ଗୋଟିଏ ଗୋଟିଏ ଟିମରେ ୬୫୦ରୁ ୮ଶହ ଶିକ୍ଷକ ରହିବେ । ୧୬ ଏପ୍ରିଲରୁ ମେ ୩୧ ଯାଏ ଘର ଗଣନା ପ୍ରଥମ ପର୍ୟ୍ୟାୟରେ ହେବ । ଏହାପରେ ଜନଗଣନା ଆରମ୍ଭ ହେବ ବୋଲି ସୂଚନା ମିଳିଛି । ଉଲ୍ଳେଖଯୋଗ୍ୟ, ୨୦୨୦ରେ ଜନଗଣନା ପାଇଁ ପ୍ରସ୍ତୁତି ଆରମ୍ଭ ହେବାକୁ ଯାଉଥିଲା ବେଳେ ମାର୍ଚ୍ଚରେ କରୋନା ଆସିଲା । ତେଣୁ ଜନଗଣନା କାମ ସ୍ଥଗିତ ରହିଛି । ପ୍ରଥମ ଥର ପାଇଁ ଏହି କାମ ବାଧାପ୍ରାପ୍ତ ହୋଇଛି । ଯଦି କରୋନା ସ୍ଥିତି ବିଶେଷ ପ୍ରତିବନ୍ଧକ ନଆଣେ ତେବେ ଆସନ୍ତା ବର୍ଷ ଏପ୍ରିଲରୁ ଜନଗଣନା ଆରମ୍ଭ ହେବ।
