ପରିବା ଦର ଆକାଶ ଛୁଆଁ

ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ କରୋନା ମହାମାରୀ ଏବଂ ଲଗାଣ ବର୍ଷା ସହ କଳାବଜାରୀକୁ ବେଶ ସୁହାଇଛି । ଜିଲ୍ଲାର ଦୀର୍ଘ ଏକ ମାସ ହେବ ପରିବା ବଜାରରେ ସତେକି ନିଆଁ ଲାଗି ଯାଇଛି । ପ୍ରତ୍ୟେକ ସବୁଜ ପରିବା କେଜିକୁ ୫୦ ତଳକୁ ଦର ଖସୁନି । ଆଗକୁ ପାର୍ବଣ ଆସୁଥିବାରୁ ଏ ପରିସ୍ଥିତିକୁ କିଭଳି ମୁକାବିଲା କରାଯିବ ତାକୁ ନେଇ ଖାଉଟି ଚିନ୍ତାରେ ପଡ଼ିଛନ୍ତି । ନୟାଗଡ଼ ବଜାରରେ ଆଜି ରହିଥିବା ପରିବା ବଜାରକୁ ନଜର ଦେଲେ ଆଳୁ ଅଢ଼େଇ କେଜିକୁ ୯୦ ଟଙ୍କାରେ ବିକ୍ରି ହେଉଥିବା ବେଳେ ଟମାଟ ୫୦, ପିଆଜ ୫୦, ବାଇଗଣ ୪୦, ଭେଣ୍ଡି ୬୦, ଝୁଲଣ କେଜିକୁ ୭୦, କାଙ୍କଣ ୬୦, ବିନ୍ସ ୮୦, ସାରୁ ୩୦, ବନ୍ଧାକୋବି ୫୦, ଫୁଲକୋବି ୬୦, କାକୁଡ଼ି ୪୦, କଖାରୁ ୨୫, କଞ୍ଚାଲଙ୍କା ୧୫୦, ଦେଶୀ କାଙ୍କଣ ୧୪୦ ଟଙ୍କାରେ ବିକ୍ରି ହେଉଥିବା ଜଣାଯାଇଛି । ସେହିଭଳି ଭାବେ ଅଦା କେଜିକୁ ୧୦୦ ଟଙ୍କା ଏବଂ ରସୁଣ କେଜିକୁ ୧୨୦ ଟଙ୍କାରେ ବିକ୍ରି ହେଉଥିବା ଜଣାଯାଇଛି ।