ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ପୌରପରିଷଦ ପକ୍ଷରୁ ଆଜି ସ୍ଥାନୀୟ ପଠାଣି ସାମନ୍ତ ଅଡିଟୋରିୟମ ପରିସରରେ ବଡ଼ଖାନା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଜିଲ୍ଲାପାଳ ତଥା ପୌରପରିଷଦର ପ୍ରଶାସକ ଡା. ପୋମା ଟୁଡୁ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ନୟାଗଡ଼ ପୌରପରିଷଦର ନିର୍ବାହୀ ଅଧିକାରୀ ସନ୍ତୋଷ କୁମାର ଜେନା ଅଧ୍ୟକ୍ଷତା ଆୟୋଜିତ ହୋଇଥିବା ‘ବଡ଼ଖାନା’ ଉତ୍ସବରେ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ସୁବାଷ ଚନ୍ଦ୍ର ରାୟ, ନୟାଗଡ଼ ତହସିଲଦାର ଭିକାରୀ ଚନ୍ଦ୍ର ସାହୁ ସମ୍ମାନୀତ ଅତିଥିଭାବେ ଯୋଗେଦଇ ଆତ୍ମସମ୍ମାନ ଓ ସଂହତି ରକ୍ଷା ଦିଗରେ ନୟାଗଡ଼ ପୌରପରିଷଦ କାର୍ଯ୍ୟ କରୁଥିବାରୁ ସଫେଇ କର୍ମଚାରୀ ଅଧିକ ଉତ୍ସାହିତ ହେବେ ବୋଲି ମତବ୍ୟକ୍ତ ରଖିଥିଲେ । ପରିମଳ କର୍ମଚାରୀ ଓ ସହଯୋଗୀ କର୍ମଚାରୀଙ୍କ ଅବଦାନକୁ ଜିଲ୍ଲାପାଳ ପ୍ରଶଂସା କରିବା ସହ ନବନିର୍ମିତ ବର୍ଜୀବସ୍ତୁ ପୃଥିକୀକରଣ କେନ୍ଦ୍ର ଓ ଜୈବିକ ଖତ ପ୍ରସ୍ତୁତ କେନ୍ଦ୍ରରେ କାର୍ଯ୍ୟ କରିବାକୁ ଚୟନ ହୋଇଥିବା ମହିଳା ସ୍ୱୟଂ ସହାୟକ ଗୋଷ୍ଠୀଙ୍କ ସହିତ ଜିଲ୍ଲାପାଳ କରିଥିବା ଚୁକ୍ତିନାମା ଆଜି କାର୍ଯ୍ୟକ୍ରମରେ ପ୍ରଦାନ କରାଯାଇଛି । ସଂପୃକ୍ତ ମହିଳା ଗୋଷ୍ଠୀଙ୍କୁ ନିର୍ଦ୍ଧାରିତ ସମପୋଷାକ ଓ ବ୍ୟକ୍ତିଗତ ସୁରକ୍ଷା ସରଞ୍ଜାମ ପ୍ରଦାନ କରାଯାଇଥିଲା । ଏହା ସହିତ ୩୦ଜଣ ସଫେଇ କର୍ମଚାରୀ ଓ ସ୍ୱଚ୍ଛସାଥି ଏବଂ ସ୍ୱଚ୍ଛ ସୁପରଭାଇଜରଙ୍କ ପ୍ରଶଂସା ପତ୍ର ବଣ୍ଟନ କରାଯାଇଥିଲା । ସେହିପରି ୧୩ଟି ପରିବାରକୁ ‘ସ୍ୱଚ୍ଛଗୃହ’ ସମ୍ମାନରେ ସମର୍ଦ୍ଧିତ କରାଯାଇଥିଲା । ସ୍ୱଚ୍ଛ ଭାରତ ମିଶନ ଯୋଜନା ଓ ଗୃହନିର୍ମାଣ, ନଗର ଉନ୍ନୟନ ବିଭାଗ ତରଫରୁ ଏହାର ଆୟୋଜନ କରାଯାଇଥିଲା । ପରିମଳ ବିଶେଷଜ୍ଞ ବିବେକାନନ୍ଦ ପ୍ରଧାନ, ଧିରେନ୍ଦ୍ର କୁମାର ପରିଚାଳନା କରିଥିବା ବେଳେ ନୋଡାଲ ଅଫିସର ଲକ୍ଷ୍ମୀଧର ମହାପାତ୍ର ଧନ୍ୟବାଦ ଅର୍ପଣ କରିଥିଲେ ।
