ମରାମତି ଆଳରେ ଥଣ୍ଡାପାନୀୟ ଜଳ ପ୍ରକଳ୍ପ ଉଭାନ

ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଖଣ୍ଡପଡ଼ା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପରିସରରେ ଅବସ୍ଥିତ ଥଣ୍ଡାପାନୀୟ ଜଳ ପ୍ରକଳ୍ପଟିକୁ ମରାମତି ଆଳରେ ଉଭାନ କରି ଦେବା ଭଳି ଘଟଣା ସାମନାକୁ ଆସିଛି । ଫଳରେ ସମୟ, ଅସମୟରେ ସ୍ୱଚ୍ଛ ପାନୀୟ ଜଳ ମୁନ୍ଦେ ସଂଗ୍ରହ ନିମନ୍ତେ ସ୍ୱାସ୍ଥ୍ୟକେନ୍ଦ୍ରକୁ ଆସୁଥିବା ଶହଶହ ରୋଗୀଙ୍କ ସଂପର୍କୀୟମାନେ ବହୁ ଅସୁବିଧାର ସମ୍ମୁଖିନ ହେଉଥିବା ଜଣାପଡିଛି । ପ୍ରକାଶଥାଉକି ୧ବର୍ଷ ତଳୁ ଉକ୍ତ ପାନୀୟ ଜଳ ପ୍ରକଳ୍ପଟି ଅଚଳ ହୋଇ ପଡିଥିଲା । ସ୍ୱାସ୍ଥ୍ୟକେନ୍ଦ୍ର କର୍ତୃପକ୍ଷ ମରାମତି କରିବା ଆଳରେ ଥଣ୍ଡାପାନୀୟ ଜଳ ମେସିନଟିକୁ ସେଠାରୁ ଅନ୍ୟତ୍ର ସ୍ଥାନାନ୍ତର କରି ନେଇଥିବା ବେଳେ ଏବେ ସ୍ୱାସ୍ଥ୍ୟକେନ୍ଦ୍ରର ଗୋଟିଏ ପ୍ରକୋଷ୍ଠରେ ଉକ୍ତ ମେସିନଟି ପଡି ରହି ଖତ ଖାଉଥିବା ଜଣାଯାଇଛି । ଏଥିପ୍ରତି କର୍ତୃପକ୍ଷ ନିଘା ନଥିବା ପରି ମନେହେଉଛି । ପ୍ରକାଶଥାଉକି କୋଭିଡ-୧୯ ପରିପ୍ରେକ୍ଷୀରେ ସ୍ୱାସ୍ଥ୍ୟକେନ୍ଦ୍ର ପରିସରରେ ଲକ୍ଷ ଲକ୍ଷ ଟଙ୍କା ବ୍ୟୟରେ ବିଭିନ୍ନ ଉନ୍ନୟନମୂଳକ କାର୍ଯ୍ୟ ଶେଷ ହୋଇଥିବା ବେଳେ ଉକ୍ତ ଥଣ୍ଡାପାନୀୟ ଜଳ ପ୍ରକଳ୍ପଟି ପ୍ରତି କେହି ଦୃଷ୍ଟି ନଦେବା ପରିତାପର ବିଷୟ । ସର୍ବସାଧାରଣଙ୍କ ହିତ ଦୃଷ୍ଟିରୁ ସ୍ୱାସ୍ଥ୍ୟ ବିଭାଗ ଉଚ୍ଚକର୍ତୃପକ୍ଷ ଏଥିପ୍ରତି ଦୃଷ୍ଟି ଦେଇ ଥଣ୍ଡା ପାନୀୟ ଜଳ ପ୍ରକଳ୍ପଟିକୁ ତୁରନ୍ତ କାର୍ଯ୍ୟକ୍ଷମ କରିବାକୁ ଦାବିହେଉଛି ।