କେନ୍ଦୁଝର (ବାଘୁଆବାର୍ତ୍ତା): ନିୟମ ହୋଇଛି କଡାକଡି । ବାହାର ଲୋକଙ୍କ ପ୍ରବେଶକୁ ବାରଣ କରାଯାଇଛି । ଯିଏ ଆସୁଛନ୍ତି ଅଲଗା ସଂଗରୋଧରେ ରହିବାକୁ ବାଧ୍ୟ । ଏବେ ସମଗ୍ର ବିଶ୍ୱ କରୋନାର କବଳରେ କବଳିତ ହୋଇଥିବା ବେଳେ କେନ୍ଦୁଝର ଜିଲ୍ଲାର ଦୁର୍ଗମ ବଣ ପାହାଡ ଘେରା ଆଦିବାସୀ ବହୁଳ କେ.ବାଲିଆପାଳ ପଞ୍ଚାୟତକୁ ଆଜି ପର୍ଯ୍ୟନ୍ତ କରୋନା ଛୁଇଁ ପାରିନି । ଫଳରେ ଏ ପର୍ଯ୍ୟନ୍ତ ସମଗ୍ର ପଞ୍ଚାୟତର ଜଣେ ବି ବ୍ୟକ୍ତି କରୋନା ଆକ୍ରାନ୍ତ ଚିହ୍ନଟ ହୋଇ ନାହାନ୍ତି । ଯାହା ସମଗ୍ର ରାଜ୍ୟ ପାଇଁ ଉଦାହରଣ ପାଲଟିଛି । କେନ୍ଦୁଝର ଜିଲ୍ଲାର ହାଟଡିହି ବ୍ଳକର କେ ବାଲିଆପାଳ ପଞ୍ଚାୟତ । ହିତାଧିକାରୀ ମାନଙ୍କୁ ବଣ୍ଟନ କରାଯାଉଛି ଭତ୍ତା । ହେଲେ ଏଠାରେ ହିତାଧିକାରୀ ମାନେ ମାସ୍କ ପରିଧାନ ସହ ସାମାଜିକ ଦୂରତା ଅବଲମ୍ବନ କରି ଭତ୍ତା ନେଉଛନ୍ତି । କେବଳ ଏତିକି ନୁହଁ ଏଠାକାରେ ଲୋକେ ଗତ ଦୁଇ ମାସ ହେଲା କରୋନା କଟକଣାକୁ କଡାକଡି ଭାବେ ପାଳନ କରୁଛନ୍ତି । ଫଳରେ ଏଠାକାର ଲୋକ ମାନଙ୍କୁ ଆଜି ଯାଏଁ କରୋନା ଛୁଇ ଁ ପାରିନି । କେ ବାଲିଆପାଳ ପଞ୍ଚାୟତରେ ୭ଟି ଗାଁ ଥିବାବେଳେ ପାଞ୍ଚ ହଜାରରୁ ଉଦ୍ଧ୍ୱର୍ ଲୋକ ବସବାସ କରନ୍ତି । ଏହି ପଞ୍ଚାୟତକୁ ଚାରିପଟୁ ପାହାଡ ଓ ଜଙ୍ଗଲ ଘେରି ରହିଛି । ଅଧିକାଂଶ ଲୋକ ଜଙ୍ଗଲଜାତ ପଦାର୍ଥ ଉପରେ ଭରସା କରି ଚଳିବା ସହ ବାଡିରେ ପନିପରିବା ଚାଷ କରି ଚାଲିଥାନ୍ତି । ଏଥି ସହ ପଞ୍ଚାୟତରୁ ଚାଉଳ ଗହମ ଓ କିରାସିନି ଆଦି ମିଳିଥାଏ । ଯାହାଦ୍ୱାରା କି ସେମାନେ ବିଶେଷ ଘରୁ ବାହାରକୁ ଯାଇ ନଥାନ୍ତି । ଆଶା, ଅଙ୍ଗନବାଡି କର୍ମୀ, ସରପଞ୍ଚ ଓ ପଂଚାୟତ ଅଧିକାରୀ କରୋନା ସମ୍ପର୍କରେ ସଚେତନ କରିବା ସହ ଲୋକଙ୍କୁ ମାସ୍କ, ସାବୁନ ଆଦି ବଣ୍ଟନ କରି ଘରେ ରୁହ ସୁସ୍ଥ ରୁହ ବୋଲି ସଚେତନ କରାଉଛନ୍ତି । ଗତ ଦୁଇମାସ ହେଲା ଲୋକମାନେ ଏହାକୁ କଡାକଡି ପାଳନ କରିଥିବାରୁ ଗାଁ ଗୁଡ଼ିକ ଭିତରକୁ ଆଜିଯାଏ କରୋନା ପଶି ପାରିନି ।
