ଦଶପଲ୍ଲା (ବାଘୁଆବାରର୍ତ୍ତା): : ଦୁର୍ଦ୍ଦାନ୍ତ ଅପରାଧି ବିକାଶ ବେହେରାକୁ ପୁଲିସ ଗିରଫ କରିଛି । ଦଶପଲ୍ଲା ବ୍ଲକ୍ ମଧ୍ୟଖଣ୍ଡ ଫାଣ୍ଡି ମହାନ୍ତିପଲ୍ଲୀ ଗାଁରେ ଗତ ୩୦ ଅଗଷ୍ଟ ୨୦୧୯ରିଖରେ ମଧ୍ୟଖଣ୍ଡ ପଞ୍ଚାୟତ ନିର୍ବାହୀ ଅଧିକାରୀ ମୂରଲରଧର ବାରିକୀ ଗାଁରେ ପଲ୍ଲିସଭା କରିବାକୁ ପ୍ରସ୍ତୁତ ହେଉଥିବା ବେଳେ ବିକାଶ ସାମାନ୍ୟ କଥା କଟାକଟିକୁ କେନ୍ଦ୍ରକରି ମୂରଲୀଧରଙ୍କ ଗୋଡକୁ ଗୁଳିମାରି ଫେରାର୍ ହୋଇଯାଇଥିଲା । ଏ ସମ୍ପର୍କରେ ଦଶପଲ୍ଲା ଥାନାରେ ଏକ ମୋକଦ୍ଦମା ରୁଜୁ ହୋଇଥିଲା । ଅପରାଧୀ ବିକାଶକୁ ଖୋର୍ଦ୍ଧା ପୁଲିସ ହଳଦିଆ ନିକଟସ୍ଥ କୁଆପୁର ଗାଁରୁ ଗିରଫ କରିବା ପରେ ଦଶପଲ୍ଲା ପୋଲିସ ଖୋର୍ଦ୍ଧାରେ ପହଞ୍ଚି ରିମାଣ୍ଡରେ ଆଣିବାକୁ ଆବେଦନ କରିଛି ବୋଲି ଥାନା ଭାରପ୍ରାପ୍ତ ଅଧିକାରୀ ବିଶ୍ୱଜିତ୍ ରାଉତ୍ତରାୟ ପ୍ରକାଶ କରିଛନ୍ତି । ବିକାଶର ଅପରାଧୀକ ପୃଷ୍ଠଭୂମି ଖୁବ୍ ଲମ୍ବା । ସେ ପୂର୍ବରୁ ତମାଣ୍ଡୋ, ଜଙ୍କିଆ, ଖୋର୍ଦ୍ଧା ଥାନା ଅଞ୍ଚଳରେ ମଧ୍ୟ ବହୁ ଅପରାଧ ଘଟାଇ ଫେରାର୍ ଥିଲା । ଗତ ଦୁଇମାସ ପୂର୍ବେ ପୁଲିସ୍କୁ ଚକ୍ମା ଦେଖାଇ ହଳଦିଆ ନିକଟରୁ ଚମ୍ପଟ ମରିବାରେ ସକ୍ଷମ ହୋଇଥିଲା । ତାର ଜଣେ ସହଯୋଗୀକୁ ପୋଲିସ ଗିରଫ କରିଥିଲା । ଗତ ଅକ୍ଟୋବର ୨୪ ତାରିଖ ଦିନ ବିକାଶ ଗୋଟିଏ ବାଇକ୍ ଯୋଗେ କନ୍ଧମାଳରୁ ଆସୁଥିବା ସମୟରେ ଖଜୁରିପଡା ନିକଟରେ ଦୁର୍ଘଟଣା ଘଟି ବିକାଶ ଆହତ ହୋଇଥିଲା । ଏହାପରେ ବ୍ରହ୍ମପୁର ବଡ ମେଡିକାଲରେ ଚିକିତ୍ସିତ ହେଉଥିଲା । ପୋଲିସ ପିଛା କରୁଥିବା ଖବର ପାଇ ଅର୍ଦ୍ଧଚିକିତ୍ସା ଅବସ୍ଥାରେ ନିଜ ମାମୁଁ ଶ୍ୱଶୁର ଗାଁ କୁଆପୁରରେ ଆସି ଜଡିବୁଟି, ଚେରମୂଳି ଦେଶୀ ଚିକିତ୍ସା ହେଉଥିଲା । ସୂଚନାଯୋଗ୍ୟ ଯେ, ଅପରାଧୀ ବିକାଶକୁ ଗିରଫ କରିବା ନିମନ୍ତେ ଦଶପଲ୍ଲା ବ୍ଲକ୍ ସମେତ ନୟାଗଡ଼ ଜିଲ୍ଲାର ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀମାନେ ଏକ ସପ୍ତାହ ଧରି ଅନଶନ, ଧାରଣା ଜାରି ରଖିଥିଲେ । ପୁଲିସ୍ ଖୁବ୍ ଶୀଘ୍ର ଅପରାଧୀକୁ ଧରାଯିବ ବୋଲି ପ୍ରତିଶ୍ରୁତି ଦେଇଥିଲେ ଏବଂ ବର୍ତ୍ତମାନ ତାହା ଅନ୍ତ ଘଟିଛି ।
