ଏମକେସିଜି ଲିକ୍ୱିଡ ଅକ୍ସିଜେନ ପ୍ଲାଣ୍ଟ ଆଜି ଉଦଘାଟିତ ହେବ, କାଲିଠାରୁ ରୋଗୀଙ୍କୁ ଦିଆଯିବ ଅକ୍ସିଜେନ

ବ୍ରହ୍ମପୁର (ବାଘୁଆବାର୍ତ୍ତା): ଏମକେସିଜି ମେଡିକାଲ କଲେଜ ଓ ହସପିଟାଲ କ୍ୟାମ୍ପସରେ ଲିକ୍ୱିଡ ଅକ୍ସିଜେନ ପ୍ଳାଣ୍ଟ ଉଦଘାଟନ ହେବ । ଅକ୍ସିଜେନ ପ୍ରୋସେସିଂ ପ୍ଲାଣ୍ଟର କାର୍ଯ୍ୟ ପୂର୍ବରୁ ସରିଥିବା ବେଳେ ବୁଧବାର ସନ୍ଧ୍ୟା ସୁଦ୍ଧା ପିଏମଏସଏସୱାଇ କୋଠାକୁ ଅକ୍ସିଜେନ ପାଇପ ବିଛା ମଧ୍ୟ ସରିଛି । ଆଜି ସକାଳୁ ଅକ୍ସିଜେନ ପାଇପ ମେନିଫୋଲ୍ଡ ରୁମକୁ ସଂଯୋଗ କରାଯିବ ଏବଂ ଠିକ କାର୍ଯ୍ୟକରୁଛି କି ନାହିଁ ପରୀକ୍ଷା ହୋଇଛି । ସନ୍ଧ୍ୟା ୫ଟା୩୦ରେ ପ୍ଲାଣ୍ଟ ଉଦଘାଟନ କରିବାକୁ ନିଷ୍ପତ୍ତି ନିଆଯାଇଥିବା ଏମକେସିଜି ଅଧୀକ୍ଷକ ପ୍ରଫେସର ଡା.ସନ୍ତୋଷ କୁମାର ମିଶ୍ର କହିଛନ୍ତି । ଆଜି ହିଁ ଲିକ୍ୱିଡ ଅକ୍ସିଜେନ ଯାଜପୁରରୁ ଆସିବ । ସନ୍ଧ୍ୟାରେ ପ୍ଲାଣ୍ଟ ଉଦଘାଟନ ହେବା ପରେ ଶୁକ୍ରବାର ରୋଗୀଙ୍କୁ ଅକ୍ସିଜେନ ଦେବା ବ୍ୟବସ୍ଥା କରାଯାଉଛି ବୋଲି ଅଧୀକ୍ଷକ ପ୍ରଫେସର ଡା.ମିଶ୍ର କହିଛନ୍ତି । ୨୦ ହଜାର ଲିଟର କ୍ଷମତା ବିଶିଷ୍ଟ ଅକ୍ସିଜେନ ଟ୍ୟାଙ୍କର ଗତ ୭ ତାରିଖରୁ ଡେରାଡୁନରୁ ଏମକେସିଜିକୁ ଅଣାଯାଇଥିଲା । ୧୦ ତାରିଖ ମଧ୍ୟରେ ଟ୍ୟାଙ୍କର ସ୍ଥାପନ କରାଯିବା ସହ ପ୍ରୋସେସିଂ ମେସିନ ମଧ୍ୟ ଲଗାଯାଇଥିଲା । କିନ୍ତୁ ପାଇପ ବିଛାଇବାରେ କିଛିଟା ବିଳମ୍ବ ହୋଇଥିଲା । ବ୍ରହ୍ମପୁର ବିଧାୟକ ବିକ୍ରମ କୁମାର ପଣ୍ଡା, ଗଞ୍ଜାମ ଜିଲ୍ଲାପାଳ ବିଜୟ ଅମୃତ କୁଲାଙ୍ଗେ ଓ ଏମକେସିଜି ଅଧୀକ୍ଷକ ପ୍ରଫେସର ଡା.ସନ୍ତୋଷ କୁମାର ମିଶ୍ରଙ୍କ ଉଦ୍ୟମରେ ପ୍ଲାଣ୍ଟ କାର୍ଯ୍ୟକ୍ଷମ ହେବାକୁ ଯାଉଛି । ଗୁରୁବାର ସନ୍ଧ୍ୟାରେ ଉଦଘାଟନ କରାଯିବ ।