ଏକତରଫା ପ୍ରେମର କରୁଣ ପରିଣତି, ଯୁବତୀଙ୍କ ଗଳାକାଟି ହତ୍ୟା କଲେ ଯୁବକ

ଦେବଗଡ଼, (ବାଘୁଆବାର୍ତ୍ତା): ଏକତରଫା ପ୍ରେମରୁ ହତ୍ୟା । ଯୁବତୀଙ୍କ ଗଳାକାଟି ହତ୍ୟା କଲେ ଜଣେ ବିବାହିତ ଯୁବକ । ଘଟଣା ଘଟିଛି ଦେବଗଡ଼ ଜିଲ୍ଲା ଖଡ଼ିନାଳି ଗାଁରେ । ଅଭିଯୁକ୍ତ ଯୁବକଙ୍କୁ ଅଟକ ରଖି ପଚରାଉଚରା କରୁଛି ପୋଲିସ । ଅଭିଯୋଗ ଅନୁସାରେ, ଖଡ଼ିନାଳି ଗାଁର ବିବାହିତ ଯୁବକ ଓମ ପ୍ରକାଶ ପ୍ରଧାନ ସେହି ଗାଁର ଯୁଗଳ ବେହେରାଙ୍କ ଝିଅ ସ୍ବିଟିଙ୍କୁ ଏକତରଫା ପ୍ରେମ କରୁଥିଲେ । ତେବେ ସ୍ବିଟି ଓମଙ୍କ ପ୍ରେମ ନିବେଦନକୁ ଅସ୍ବୀକାର କରିଆସୁଥିଲେ । ଏହାକୁ ନେଇ ଓମଙ୍କ ମୁଣ୍ଡକୁ ପିତ ଚଢ଼ିଯାଇଥିଲା । ଗତକାଲି ସନ୍ଧ୍ୟା ପ୍ରାୟ ୭ଟାରେ ସେ ଯୁଗଳଙ୍କ ଘରେ ପହଞ୍ଚି ଯାଇଥିଲେ । ଏହାପରେ ସ୍ବିଟିଙ୍କୁ ବଳ ପୂର୍ବକ ବାଡି ପଟକୁ ନେଇ ଏକ ପନିକିରେ ଗଳା କାଟି ଦେଇଥିଲେ । ଫଳରେ ଘଟଣା ସ୍ଥଳରେ ସ୍ବିଟିଙ୍କ ମୃତ୍ୟୁ ଘଟିଥିଲା । ଖବର ପାଇ ପୋଲିସ ଏସଡିପିଓ ସୌମ୍ୟରଞ୍ଜନ ମଲ୍ଲିକ ଏବଂ ଥାନା ଅଧିକାରୀ ସତ୍ୟବ୍ରତ ରାଉତ ସଦଳବଳେ ଗାଁରେ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି । ଏହାସହ ସ୍ବିଟିଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛନ୍ତି । ସାଇଣ୍ଟିଫିକ ଟିମ ଘଟଣା ସ୍ଥଳରେ ପହଞ୍ଚି ଯାଞ୍ଚ ଆଣମ୍ଭ କରିଛି । ପୋଲିସ ଅଭିଯୁକ୍ତ ଓମକୁ ଅଟକ ରଖି ପଚରାଉଚରା କରୁଥିବା ବେଳେ ତାଙ୍କ ପାଖରୁ ହତ୍ୟାରେ ବ୍ୟବହୃତ ପନିକି ଜବତ କରିଛି । ସୂଚନାଯୋଗ୍ୟ, ଓମ ପ୍ରକାଶ ବିବାହିତ ହୋଇଥିବା ବେଳେ ତାଙ୍କର ଦୁଇଟି ସନ୍ତାନ ରହିଛି ।