ଭୁବନେଶ୍ୱର, (ବାଘୁଆବାର୍ତ୍ତା): ଏକତରଫା ପ୍ରେମ କରି ଯୁବକ ଗିରଫ। ଏକତରଫା ପ୍ରେମ କରି ଯୁବତୀଙ୍କ ଘରେ ଉତ୍ପାତ କରି ସୋସିଆଲ୍ ମିଡିଆରେ ଅଶ୍ଳୀଳ ଫଟୋ ଛାଡିବା ଜଣେ ଯୁବକଙ୍କୁ ମହଙ୍ଗା ପଡିଛି। ଏନେଇ ଯୁବତୀଙ୍କ ଘର ଲୋକ ମଞ୍ଚେଶ୍ୱର ଥାନାରେ ଏତଲା ଦେଲା ପରେ ପୁଲିସ୍ ପିପିଲି ସ୍ଥିତ ପାତାଡିଗୁଡିଆ ଗାଁର ସୁମିତ୍ କୁମାର ଜେନା (୨୬)ଙ୍କୁ ଗିରଫ କରି କୋର୍ଟ ଚାଲାଣ କରିଛି । ସୁମିତ୍ ଗତ କିଛି ତଳେ ରସୁଲଗଡ଼ ଅଞ୍ଚଳର ରହୁଥିବା ପୂର୍ଣ୍ଣିମା (ଛଦ୍ମାନାମ, ୨୫ ବର୍ଷ) ନାମକ ଜଣେ ଯୁବତୀଙ୍କୁ ପ୍ରେମ କରୁଥିଲେ । ପୂର୍ଣ୍ଣିମା ମଧ୍ୟ ତାଙ୍କୁ ଭଲ ପାଉଥିଲେ । କିଛି ମାସ ପରେ କ’ଣ ହେଲା କେଜାଣି ପୂର୍ଣ୍ଣିମା ତାଙ୍କୁ ଛାଡି ଦେଇଥିଲେ । ଏହା ପରେ ସୁମିତ୍ ଯୁବତୀଙ୍କୁ ବିଭିନ୍ନ ଅଶ୍ଳୀଳ ମେସେଜ୍ କରିବା ସହ ସୋସିଆଲ୍ ମିଡିଆରେ ଏଣୁ ତେଣୁ ଫଟୋ ଅପ୍ଲୋଡ୍ କରୁଥିଲେ । ଗତ ୫ ତାରିଖରେ ପୂର୍ଣ୍ଣିମା ରହୁଥିବା ଘର ପାଖରେ ପହଞ୍ଚି ଆତଙ୍କ ଖେଳାଇଥିଲେ ସୁମିତ୍ । ଏନେଇ ଯୁବତୀଙ୍କ ପରିବାର ଲୋକ ଥାନାରେ ଏତଲା ଦେଇଥିଲେ । ଅଭିଯୋଗ ଆଧାରରେ ପୁଲିସ୍ ଗତକାଲି ରାତିରେ ସୁମିତ୍କୁ ପିପିଲିରୁ ଗିରଫ କରିଥିଲା ।
