ନୟାଗଡ଼, (ବାଘୁଆବାର୍ତ୍ତା) : କଲଡାଉନ୍ ଓ ସଟଡାଉନ୍ ଫାଇଦା ଉଠାଉଛନ୍ତି କେତେକ ଅସାଧୁ ବ୍ୟବସାୟୀ । ଚୋରା ଲୁଚାରେ ବିଭିନ୍ନ ସାମଗ୍ରୀ ବ୍ୟବସାୟ କରୁଥିବା ବେଳେ ଚୋରା ମଦ ବ୍ୟବସାୟୀ ମାନେ ଏହାର ସଂପୂର୍ଣ୍ଣ ଫାଇଦା ଉଠାଇ ବ୍ୟବସାୟ କରୁଛନ୍ତି । ଚୋରା ଦେଶୀ ମଦ ବ୍ୟବସାୟ କରୁଥିବା ନେଇ ପୁଲିସ ବିଶେଷ ସୁତ୍ରରୁ ଖବର ପାଇ ବ୍ୟବସାୟୀର ଘରେ ଚଢଉ କରି ମଦ ଜବତ କରିବା ସହିତ ବ୍ୟବସାୟୀକୁ ଗିରଫ୍ କରିଛି । ସୂଚନାନୁସାରେ, ନୟାଗଡ଼ ଜିଲ୍ଲା ନୂଆଗାଁ ଥାନା ଅନ୍ତର୍ଗତ ପାରାଢିପି ଗାଁର ମନୋରଂଜନ ରାଉତ(୪୦) ଗାଁରେ ଚୋରା ଲୁଚାରେ ଦେଶୀ ମଦ ବ୍ୟବସାୟ କରୁଥିବା ନେଇ ନୂଆଗାଁ ପୁଲିସ୍ ଖବର ପାଇଥିଲା । ଆଜି ଅପରାହ୍ନରେ ନୂଆଗାଁ ପୁଲିସ୍ ଅଚାନକ୍ ଯାଇ ପାରାଢିପି ଗାଁର ମନୋରଂଜନଙ୍କ ଘରେ ଚଢଉ କରିଥିଲା । ଚଢଉ ସମୟରେ ୬ଲିଟର ଦେଶୀ ମଦ ଜବତ ହୋଇଥିଲା । ଥାନାରେ କେସ୍ ନଂ ୬୦/୨୧ରେ ମାମଲା ଋଜୁ କରି ମନୋରଂଜନକୁ ଗିରଫ୍ କରିଥିବା ନେଇ ଥାନା ଅଧିକାରୀ ରମେଶ କୁମାର ଦେବତା ସୂଚନା ଦେଇଛନ୍ତି ।
