ନୟାଗଡ଼,(ବାଘୁଆବାର୍ତ୍ତା): ଓଡ଼ିଶା ପାୱାର ଡିଷ୍ଟ୍ରିବ୍ୟୁସନ ଫ୍ରାଞ୍ଚାଇଜ୍ ନୟାଗଡ଼ ଶାଖା ପକ୍ଷରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଦାବିପତ୍ର ନୟାଗଡ଼ ଅତିରିକ୍ତ ଜିଲ୍ଲାପାଳ ବିଧାନଚନ୍ଦ୍ର ରାୟଙ୍କୁ ପ୍ରଦାନ କରାଯାଇଛି । ନୟାଗଡ଼ ଡିଫ୍କୋ ଅଧିନରେ କାର୍ଯ୍ୟରତ ୪ଶହରୁ ଊର୍ଦ୍ଧ୍ୱ କର୍ମଚାରୀ ୮ଦଫା ସମ୍ବଳିତ ଦାବିପତ୍ର ପ୍ରଦାନ କରାଯାଇଛି । ଫ୍ରାଞ୍ଚାଇଜ୍ ଅଧିନରେ ସେସୁରେ କାର୍ଯ୍ୟ କରୁଥିବା ରାଜ୍ୟର ୮ହଜାରରୁ ଊର୍ଦ୍ଧ୍ୱ କର୍ମଚାରୀମାନଙ୍କ ଶିକ୍ଷାଗତ ଯୋଗ୍ୟତା ଏବଂ କାର୍ଯ୍ୟଦକ୍ଷତାକୁ ଦେଖି ଚାକରିରେ ସ୍ଥାୟୀ ନିଯୁକ୍ତି କରାଯିବା ଦାବି ରଖାଯାଇଛି । ଏଥିସହିତ କୋଭିଡ୍-୧୯ ପରିସ୍ଥିତିରେ ଯେତେବେଳେ କେନ୍ଦ୍ର ସରକାର କୌଣସି କର୍ମଚାରିଙ୍କୁ ଜୀବିକା ନହରାଇବାର ଆହ୍ୱାନ ଦେଇଛନ୍ତି ସେହି ସମୟରେ ଚାକିରିରୁ ଛଟେଇ ପାଇଁ ନୋଟିସ୍ କରାଯାଇଛି । ରାଜ୍ୟ ସରକାର ଫେରନ୍ତା ପ୍ରବାସୀମାନଙ୍କୁ କାମ ଯୋଗାଇବା ପାଇଁ କାର୍ଯ୍ୟ କରୁଥିବା ବେଳେ ଏଭଳି ଘଡ଼ିସନ୍ଧି ମୁହୂର୍ତ୍ତରେ ଜିଲ୍ଲାରେ କାର୍ଯ୍ୟରତ ଫେଡ୍କୋ କର୍ମଚାରୀମାନଙ୍କୁ ଛଟେଇ କରିବା ନିନ୍ଦନୀୟ ବୋଲି ଦାବି କରିଛନ୍ତି । ଅଧିକାଂଶ କର୍ମଚାରୀ ୧୦ରୁ ୧୨ବର୍ଷ ଧରି କାର୍ଯ୍ୟ କରିଆସୁଛନ୍ତି । ନୂତନ ଚାକିରି ପାଇଁ ସେମାନଙ୍କର ବୟସ ମଧ୍ୟ ହରେଇ ସାରିଲେଣି । ଏଭଳି ସମୟରେ ଛଟେଇ ନକରିବାକୁ ସଂଘ ଦାବି କରିଛି । ସେସୁ କର୍ମଚାରୀମାନେ ବହୁଦିନ ଧରି କାର୍ଯ୍ୟରୁ ନିବୃତ୍ତ ରହିଥିଲେ । ସେମାନଙ୍କୁ ଟାଟା ଗ୍ରହଣ କରି ସ୍ଥାୟୀ ଚାକିରି ପାଇଁ ସୁଯୋଗ ଦେଉଥିବା ବେଳେ ଫ୍ରାଞ୍ଚାଇଜ୍ କର୍ମଚାରୀମାନଙ୍କୁ ସେଥିରେ ସାମିଲ କରାଯାଉନାହିଁ । ସେସୁ ଅଧିନରେ ଅନ୍ୟ ଫ୍ରାଞ୍ଚାଇଜ୍ କର୍ମଚାରିମାନଙ୍କୁ ଚାକିରି ପାଇଁ ବିଚାରକୁ ନିଆଯାଉଥିବା ସ୍ଥଳେ ଫେଡକୋ କର୍ମଚାରୀମାନଙ୍କୁ କାହିଁକି ସେଥିରୁ ନିବୃତ୍ତ କରାଯାଉଛି ଏହି ଦାବିପତ୍ରରେ ଉଲ୍ଲେଖ କରାଯାଇଛି । ଫେଡକୋ କର୍ମଚାରୀଙ୍କ ଭବିଷ୍ୟତକୁ ଆଖିଆଗରେ ରଖି ଫ୍ରାଞ୍ଚାଇଜ୍ ସଂସ୍ଥା ହେଉ ଅଥବା ଟାଟା ପାୱାରରେ ସ୍ଥାୟୀ ନିଯୁକ୍ତି ପାଇଁ ଦାବି କରିଛନ୍ତି । ଦୀର୍ଘବର୍ଷ ଧରି କାର୍ଯ୍ୟ କରୁଥିବା ଅନେକ କର୍ମଚାରୀ ଦୁର୍ଘଟଣାରେ ଜୀବନ ହରାଇଛନ୍ତି ଏବଂ ଅନେକ କର୍ମଚାରୀ ସାରା ଜୀବନ ବିକଳାଙ୍ଗ ହୋଇଛନ୍ତି । ସେମାନଙ୍କର ପରିସ୍ଥିତି ପ୍ରତି ଦୃଷ୍ଟି ଆକର୍ଷଣ କରିବା ପାଇଁ ଏହି ଦାବିପତ୍ର ପ୍ରଦାନ କରାଯାଇଛି । ଫେଡ୍କୋ କର୍ମଚାରୀମାନଙ୍କୁ ଚାକିରିରୁ ନହଟାଇବା ପାଇଁ ନୟାଗଡ଼ ଶାଖା ପକ୍ଷରୁ ଶିଲାଦିତ୍ୟ ପଟ୍ଟନାୟକଙ୍କ ନେତୃତ୍ୱରେ ନୟାଗଡ଼ ଡିଭିଜନ୍ ତରଫରୁ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଅତିରିକ୍ତ ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଛି । ରାଜ୍ୟ ସରକାର ଉକ୍ତ ଦାବିଗୁଡିକୁ ବିଚାରକୁ ନନେଲେ ରାଜ୍ୟ ସଂଘ ପକ୍ଷରୁ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି ।
