ଓଡ଼ଗାଁ, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଶରଣକୁଳ ଥାନା ଅନ୍ତର୍ଗତ ଭାଳିଆଡିହି ଗ୍ରାମରେ ଏକ ଅଭାବନୀୟ ଘଟଣା ଆଜି ଦେଖିବାକୁ ମିଳିଅଛି । ଶ୍ମଶାନକୁ ନେଇ ଗୋଷ୍ଠୀ ବିବାଦ ଥମିନଥିବା ବେଳେ ଦୀର୍ଘ ୨୨ ଘଣ୍ଟାରୁ ଉର୍ଦ୍ଧ୍ବ ସମୟ ଧରି ଗ୍ରାମ ମଝିରେ ଶବ ପଡିରହିଛି ।ସୂଚନା ଅନୁଯାୟୀ ଗତକାଲି ସନ୍ଧ୍ୟା ୬ ଘଟିକା ସମୟରେ ଭାଳିଆଡିହି ଉପର ସାହିର ନାଥ ପ୍ରଧାନ (୭୨)ଙ୍କ ଶବ ସତ୍କାର ନିମନ୍ତେ ସ୍ଥାନୀୟ ଶ୍ମଶାନକୁ ଯାଇଥିଲେ କିନ୍ତୁ ସେଠାରେ ଅନ୍ୟ ଏକ ଗୋଷ୍ଠୀ ଶବଦାହ କରିବା ପାଇଁ ମନା କରିବାରୁ ଏଭଳି କାଣ୍ଡ ଘଟିଅଛି । ଯାହା ଫଳରେ ଗୋଟିଏ ଗୋଷ୍ଠୀ ଶବକୁ ରାସ୍ତା ମଝିରେ ରଖି ପ୍ରତିବାଦ କରିଥିଲେ ।ଘଟଣା ସ୍ଥଳରେ ଶରଣକୁଳ ଥାନା ଆଇ.ଆଇ ସି,ଏସଡିପିଓ, ଓଡ଼ଗାଁ ତହସିଲଦାର ପହଞ୍ଚିଥିଲେ ସୁଦ୍ଧା ବର୍ତ୍ତମାନ ଯାଏଁ କୌଣସି ସୁଫଳ ମିଳିପାରିନାହିଁ । ଘଟଣାସ୍ଥଳରେ ଉଭୟ ଗୋଷ୍ଠୀର ୧୦୦୦ରୁ ଉର୍ଦ୍ଧ୍ବ ମହିଳା ଏବଂ ପୁରୁଷ ଉପସ୍ଥିତ ଥିବା ବେଳେ କ୍ରମାଗତ ଭାବେ ପରିସ୍ଥିତି ଅଧିକ ଜଟିଳ ହେଉଥିବା ପରିଲକ୍ଷିତ ହେଉଅଛି । ସୂଚନା ଅନୁଯାୟୀ ପୂର୍ବରୁ ମଧ୍ୟ ଭାଳିଆଡିହି ଉପର ସାହି, ତଳସାହି ଏବଂ ପାଇକ ସାହି, ନୂଆ ସାହି, କଜଳାଇ ସାହି, ଜଗନ୍ନାଥ ସାହି ଦୁଇ ଗୋଷ୍ଠୀ ମଧ୍ୟରେ ଶ୍ମଶାନକୁ କେନ୍ଦ୍ର କରି ୨ ବର୍ଷ ତଳେ ଗୋଷ୍ଠୀ ସଂଘର୍ଷ ଦେଖା ଦେଇଥିଲା ।
