ଅମାନିଆଙ୍କୁ ଛାଟ, ଓଡଗାଁ ଏନଏସିରେ ଝାମ୍ପିଲେ ଅଧିକାରୀ, ଦଣ୍ଡ ଗଣିଲେ ଦୋକାନି

ନୟାଗଡ଼ (ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ କୋଭିଡ ସଂକ୍ରମଣ ଦିନକୁ ଦିନ ବୃଦ୍ଧି ପାଉଛି । ଗଞ୍ଜାମ ଜିଲ୍ଲା ସିମାନ୍ତରେ ଥିବା ଓଡଗାଁ ଅଞ୍ଚଳରେ ଦୈନିକ ସଂକ୍ରମଣ ବୃଦ୍ଧି ପାଉଛି । ଏହି ଅବସରରେ ଓଡଗାଁ ବିଜ୍ଞାପିତ ଅଞ୍ଚଳର କିଛି ଅମାନିଆ ଦୋକାନି କୋଭିଡ ନିୟମକୁ ଉଲଂଘନ କରି ବ୍ୟବସାୟ କରୁଛନ୍ତି । ଏହାକୁ ନଜରରେ ରଖି ପ୍ରଶାସନ ପକ୍ଷରୁ କଡା ଆଭିମୁଖ୍ୟ ଗ୍ରହଣ କରାଯାଇଛି । ଓଡଗାଁ ବଜାରରେ ଥିବା ରଘୁନାଥ ବସ୍ତ୍ରାଳୟ ଉପରେ ଚଢ଼ଉ କରାଯାଇ ପାଞ୍ଚ ହଜାର ଟଙ୍କା ଜୋରିମାନା କରାଯାଇଛି । ସେହିପରି ଭାବେ ଆଜିର ଚଢ଼ଉରେ ମୋଟ ୧୦ ଜଣଙ୍କ ଠାରୁ ୧୩,୫୦୦ ଟଙ୍କା ଆଦାୟ କରାଯାଇଛି । ଆଜିର ଚଢ଼ଉରେ ତହସିଲଦାର ବିଜୟୀତା ସାମନ୍ତ ସିଂହାର, ବିଜ୍ଞାପିତ ଅଞ୍ଚଳର କାର୍ଯ୍ୟନିର୍ବାହୀ ଅଧିକାରୀ ସ୍ୱାତି ମିଶ୍ର, ଓଡଗାଁ ଆଦର୍ଶ ଥାନା ଅଧିକାରିଣୀ ପ୍ରଜ୍ଞାପରମିତା ଜେନା ପ୍ରମୁଖ ସାମିଲ ଥିବା ବେଳେ ଓଡଗାଁ ଏନଏସିର କର୍ମଚାରୀମାନେ ଏହି ଚଢ଼ଉରେ ସାମିଲ ହୋଇଥିଲେ । ଆଗାମୀ ଦିନରେ ଅମାନିଆମାନେ ଜଦି ସାବାଡ ନହେବେ ପ୍ରଶାସନ ପକ୍ଷରୁ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜଣାପଡିଛି ।