ଓଡ଼ଗାଁ, (ବାଘୁଆବାର୍ତ୍ତା): କିଛିଦିନ ଧରି ଚର୍ଚ୍ଚାରେ ଥିବା ନୟାଗଡ ବନଖଣ୍ଡ ଓଡ଼ଗାଁ ବନପାଳ ସରିତା ବରାଳ ଆଉ ଏକ ଉପାଧି ହାସଲ କରିଛନ୍ତି। ଭୁବନେଶ୍ୱର ଜୟଦେବ ଭବନ ଠାରେ ଆୟୋଜିତ ଝାନସିରାଣୀ ଲକ୍ଷ୍ମୀବାଇ ସମ୍ବର୍ଦ୍ଧନା ଉତ୍ସବରେ ତାଙ୍କୁ ସମ୍ବର୍ଦ୍ଧିତ କରାଯାଇଛି। ବନପାଳ ଶ୍ରୀମତୀ ବରାଳ ତାଙ୍କ କାର୍ଯ୍ୟକାଳ ସମୟରେ କାଠ ମାଫିଆଙ୍କୁ ସାବାଡ କରି ଜେଲରେ ପୁରାଇବା, ଶିକାରୀମାନଙ୍କୁ ଗୋଡେଇ ଗୋଡେଇ ଧରିବା ଓ ବିଭିନ୍ନ ସ୍ଥାନରେ ଚଢାଉ କରି କାଠ ଜବତ କରିବାରେ ବେଶ ପାରଙ୍ଗମ।ତାଙ୍କର ଏଭଳି ପଦକ୍ଷେପ ପାଇଁ ତାଙ୍କୁ ବିଭିନ୍ନ ସମୟରେ ସମ୍ବର୍ଦ୍ଧିତ କରାଯାଇଛି।ତାଙ୍କୁ ଏବେ ଓଡ଼ଗାଁ ବନାଞ୍ଚଳରେ ଅବସ୍ଥାପିତ କରାଯାଇଛି।କିଛିଦିନ ତଳେ ଦୁର୍ଗମ ଜଙ୍ଗଲରେ ପଶି ଶିକାରୀଙ୍କୁ କାବୁ କରିବା ସହିତ ଦେଶୀ ବନ୍ଧୁକ ଜବତ କରିଛନ୍ତି।ତାଙ୍କର ଏଭଳି ସାହସିକତା ପାଇଁ ଝାନସିରାଣୀ ଲକ୍ଷ୍ମୀବାଇ ଆୱାର୍ଡ଼ ପ୍ରଦାନ କରାଯାଇଛି।
ଗତକାଲି ଜୟଦେବ ଭବନ ଠାରେ ଆୟୋଜିତ ଓଡ଼ିଶା ଓମେନ କନକ୍ଲେଭ ଉତ୍ସବରେ ଶ୍ରୀମତୀ ବରାଳଙ୍କୁ ସମ୍ବର୍ଦ୍ଧିତ କରାଯାଇଛି।ତାଙ୍କୁ ନାଚୁରାଲ ୟୁଥ ଇଭର ଗ୍ରୀନର ପ୍ରେସିଡେଣ୍ଟ ଡ଼. ପ୍ରକାଶ ଚନ୍ଦ୍ର ଜେନା, ଭାଇସ ପ୍ରେସିଡେଣ୍ଟ ଡ଼. ମିଲି ପାଣିଗ୍ରାହୀ, ଅତିଥି ଭାବେ ଯୋଗଦେଇ ଶ୍ରୀମତୀ ବରାଳଙ୍କୁ ଉତ୍ତରୀୟ ଓ ମାନପତ୍ର ପ୍ରଦାନ କରିଥିଲେ।ସୂଚନାଯୋଗ୍ୟ, ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ଶ୍ରୀମତୀ ବରାଳଙ୍କୁ ଚୟନ କରାଯାଇଥିଲା।
