ନୂଆଦିଲ୍ଲୀ, (ବାଘୁଆବାର୍ତ୍ତା): ଏବେ ଅଯୋରେ ଆଉ ବିକ୍ରି ହେବନି ଆମିଷ । ଅଯୋଧ୍ୟାକୁ ମାଂସ ଏବଂ ମଦ ମୁକ୍ତ କରିବାକୁ ପ୍ରସ୍ତୁତି ଚଳାଇଛି ଉତ୍ତରପ୍ରଦେଶ ପ୍ରଶାସନ । ଅଯୋଧ୍ୟାରେ ରାମନଗରୀର ପବିତ୍ରତା ବଜାୟ ରଖିବା ଲକ୍ଷ୍ୟରେ, ପ୍ରଶାସନ ଏଭଳି ନିଷ୍ପତ୍ତି ନେଇଛି । ରାମ ପଥ, ଧର୍ମ ପଥ, ୧୪ କୋଶୀ ଏବଂ ପଞ୍ଚକୋଶୀ ପରିକ୍ରମା ରୁଟରେ ନିରାମିଷ ଖାଦ୍ୟ ସାମଗ୍ରୀର ବିକ୍ରୟକୁ ସମ୍ପୂର୍ଣ୍ଣ ରୂପେ ନିଷେଧ କରାଯାଇଛି । ଏନେଇ ଖାଦ୍ୟ ସୁରକ୍ଷା ବିଭାଗ ପକ୍ଷରୁ କଡ଼ା କାର୍ଯ୍ୟାନୁଷ୍ଠାନ ଆରମ୍ଭ କରାଯାଇଛି । ଆମିଷ ବିକ୍ରି କରୁଥିବା ଦୋକାନକୁ ୭ ଦିନ ମଧ୍ୟରେ ବନ୍ଦ କରିବାକୁ ନିର୍ଦ୍ଦେଶ ଦିଆଯାଇଛି । ନିର୍ଦ୍ଦେଶ ନମାନିଲେ ମହାନଗର ପକ୍ଷରୁ ନିଆଯିବ କାର୍ଯ୍ୟାନୁଷ୍ଠାନ ବୋଲି ଘୋଷଣା କରାଯାଇଛି । ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଜନତା ଦରବାର ଓ ସିଏମ ପୋର୍ଟାଲ୍ରେ ଶ୍ରୀରାମ ଜନ୍ମଭୂମିରେ ଆମିଷ ବିକ୍ରି ନ କରିବା ନେଇ ଅଭିଯୋଗ ହୋଇଆସୁଥିଲା । ଡେପୁଟି କମିଶନର ଯାଞ୍ଚ ସମୟରେ ରାମ ପଥ ସମୀକ୍ଷା କରିଥିଲେ ଏବଂ ପରିଷ୍କାର ପରିଚ୍ଛନ୍ନତା, ଧାର୍ମିକ ମର୍ଯ୍ୟାଦା ଏବଂ ଭକ୍ତଙ୍କ ଭାବନାକୁ ଧ୍ୟାନରେ ରଖି ମାର୍ଗଦର୍ଶିକା ଦେଇଥିଲେ । ସେ କହିଥିଲେ ଯେ, ଏହି ଅଞ୍ଚଳ ଧାର୍ମିକ ଦୃଷ୍ଟିକୋଣରୁ ଅତ୍ୟନ୍ତ ସମ୍ବେଦନଶୀଳ ଏବଂ ଏଠାରେ ନନ୍-ଭେଜ୍ ବିକ୍ରୟ କେବଳ ବିଶ୍ୱାସ ବିରୋଧୀ ନୁହେଁ ବରଂ ଆଇନ ଶୃଙ୍ଖଳା ଦୃଷ୍ଟିକୋଣରୁ ମଧ୍ୟ ଅନୁପଯୁକ୍ତ । କହିରଖୁ କି, ପୂର୍ବରୁ ଏହି ସମ୍ପର୍କରେ ମୁଖ୍ୟମନ୍ତ୍ରୀ ପୋର୍ଟାଲରେ ଅନେକ ଥର ଅଭିଯୋଗ ଦାଖଲ କରାଯାଇଥିଲା । ଲୋକମାନେ ରାମ ପଥ ଏବଂ ପରିକ୍ରମା ପଥଗୁଡ଼ିକରେ ଆମିଷ ଦୋକାନ ରହିବାକୁ ବିରୋଧ କରିଥିଲେ । ଏହା ବ୍ୟତୀତ, ଅଯୋଧ୍ୟା ନଗର ନିଗମ ମଧ୍ୟ ପୂର୍ବରୁ ଏକ ପ୍ରସ୍ତାବ ପାସ୍ କରି ଏହି ଅଞ୍ଚଳଗୁଡ଼ିକରେ ନନ୍-ଭେଜ୍ ବିକ୍ରୟ ଉପରେ ନିଷେଧକୁ ସମର୍ଥନ କରିଥିଲା । ପ୍ରଶାସନର ଏହି କାର୍ଯ୍ୟକୁ ଅଯୋଧ୍ୟାର ଧାର୍ମିକ ମର୍ଯ୍ୟାଦା ବଜାୟ ରଖିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ । ଆଗାମୀ ଦିନରେ, ପ୍ରଶାସନର ଏହି ନିର୍ଦ୍ଦେଶ ପାଳନ ହେଉଛି କି ନାହିଁ ତାହା ନିଶ୍ଚିତ କରିବା ଲାଗି ନିୟମିତ ଭାବେ ଯାଞ୍ଚ କରାଯିବ ।
