ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ ଶିକ୍ଷା ଅବ୍ୟବସ୍ଥା ଚିନ୍ତା ଜନକ ସ୍ଥିତି ସୃଷ୍ଟି କରିଛି । ଜିଲ୍ଲାରେ ବିଗତ ୪ ବର୍ଷର ମାଟ୍ରିକ ପରୀକ୍ଷା ଫଳକୁ ଲକ୍ଷ କଲେ ଏହା ଜଳଜଳ ଦେଖାଯାଉଛି । ୨୦୨୨ ମସିହାରେ ୨୨୪ ଛାତ୍ରଛାତ୍ରୀ ଏ୧ ପାଇଥିଲେ । ୨୦୨୩ ମସିହାରେ ୧୪୦, ୨୦୨୪ ମସିହାରେ ୩୩, ୨୦୨୫ ମସିହାରେ ୪୪ ଜଣ ଏ୧ ପାଇଛନ୍ତି । ଏହି ୪୪ ମଧ୍ୟରୁ ସରକାରୀ ଉଚ୍ଚ ବିଦ୍ୟାଳୟରୁ ୩୩ ଜଣ ଛାତ୍ରଛାତ୍ରୀ ଏ୧ ପାଇଥିବା ବେଳେ ଘରୋଇ ଶିକ୍ଷାନୁଷ୍ଠାନରୁ ୧୧ ଜଣ ଛାତ୍ରଛାତ୍ରୀ ଏ୧ ପାଇଛନ୍ତି । ଚଳିତ ବର୍ଷ ନୟାଗଡ଼ ସହରରେ ଥିବା ସରସ୍ୱତୀ ଶିଶୁ ବିଦ୍ୟା ମନ୍ଦିର ୬ ଜଣ ଏ୧ ପାଇଥିବା ସୂଚନା ମିଳିଛି । ସେହିଭଳି ଭାବେ ଶରଣକୁଳ ସରସ୍ୱତୀ ଶିଶୁ ବିଦ୍ୟା ମନ୍ଦିରର ଜଣେ ଛାତ୍ର, ନୟାଗଡ଼ ଶ୍ରୀ ଅରବିନ୍ଦ ବିଦ୍ୟାଳୟର ଜଣେ, ଶରଣକୁଳ କେଏସବି ପବ୍ଲିକ ସ୍କୁଲରୁ ୨ ଜଣ ଛାତ୍ରଛାତ୍ରୀ ଏ୧ ପାଇଛନ୍ତି । ନୟାଗଡ଼ ରାମକୃଷ୍ଣ ଶିକ୍ଷା କେନ୍ଦ୍ରର ଜଣେ ଛାତ୍ର ଏ୧ ପାଇଥିବା ଜଣାପଡ଼ିଛି । ଜିଲ୍ଲାରେ ୫ଟି ଘରୋଇ ବିଦ୍ୟାଳୟର ୧୧ ଜଣ ଛାତ୍ରଛାତ୍ରୀ ଏ୧ ପାଇଥିବା ବେଳେ ସରକାରୀ ବିଦ୍ୟାଳୟ ଏ୧ ପାଇଥିବା ଛାତ୍ରଛାତ୍ରୀଙ୍କ ସଂଖ୍ୟା ୩୩ ବୋଲି ଜଣାପଡ଼ିଛି । ଜିଲ୍ଲାରେ ମୋଟ ୪୪ ଜଣ ଛାତ୍ରଛାତ୍ରୀ ଏ୧ ପାଇଥିବା ବେଳେ ସେମାନଙ୍କ ମଧ୍ୟରୁ ସରକାରୀ ଉଚ୍ଚ ବିଦ୍ୟାଳୟ ଛାତ୍ରଛାତ୍ରୀ ୩୩ ଜଣ । ନୟାଗଡ଼ ଜିଲ୍ଲାର ୮ଟି ବ୍ଲକକୁ ଅନୁଧ୍ୟାନ କଲେ କେବଳ ଭାପୁର ବ୍ଲକ ଏ୧ ଶୁନ୍ୟ ବୋଲି ଜଣାପଡ଼ିଛି । ନୟାଗଡ଼ ଜିଲ୍ଲାର ପ୍ରତ୍ୟେକ ବ୍ଲକରୁ ଏ୧ ଛାତ୍ରଛାତୀ ରହିଥିବା ବେଳେ ଭାପୁର ଖାତା ଖୋଲି ନପାରିବା ବଡ଼ ପ୍ରଶ୍ନ ସୃଷ୍ଟି କରିଛି । ସରକାରୀ ବିଦ୍ୟାଳୟ ଓ ଘରୋଇ ବିଦ୍ୟାଳୟ ମଧ୍ୟରେ ତାରତମ୍ୟକୁ ଲକ୍ଷ କଲେ ସରକାରୀ ବିଦ୍ୟାଳୟ ପାଠ ପଢ଼ା ଅତ୍ୟନ୍ତ ଅବ୍ୟବସ୍ଥିତ ବୋଲି ଅନୁମାନ କରାଯାଉଛି । ବିଦ୍ୟାଳୟ ଗୁଡ଼ିକର ଗୁଣବତ୍ତାପୂର୍ଣ୍ଣ ଶିକ୍ଷାର ଅଭାବ ଜଳଜଳ ଦେଖାଯାଉଛି । ଅନେକ ବିଦ୍ୟାଳୟରେ ଶିକ୍ଷକମାନେ ଶିକ୍ଷାଦାନ କରିବା ପରିବର୍ତ୍ତେ ରାଜନୀତି କରିବା ଦ୍ୱାରା ଏଭଳି ପରିସ୍ଥିତି ସୃଷ୍ଟି ହେଉଛି । ନୟାଗଡ଼ ଜିଲ୍ଲାରେ ଅନେକ ଶିକ୍ଷକ ବିଦ୍ୟାଳୟ ମାଟି ମାଡ଼ୁନଥିବା ବେଳେ ଅନେକ ନିଜ ନାଁ କିଭଳି ପ୍ରଚାର ଓ ପ୍ରସାର କରିବେ ତାହା ଚିନ୍ତା କରୁଛନ୍ତି । ନୟାଗଡ଼ ସହର ପ୍ରମୂଖ ଶିକ୍ଷାନୁଷ୍ଠାନ ବଜେନ୍ଦ୍ର ଉଚ୍ଚ ବିଦ୍ୟାଳୟ ଓ ବାଳିକା ଉଚ୍ଚ ବିଦ୍ୟାଳୟ ଚଳିତ ବର୍ଷ ଏ୧ରୁ ବଞ୍ଚିତ ହୋଇଛି । ସମାନ ଭାବେ ଜିଲ୍ଲାର ଅନେକ ପ୍ରମୂଖ ଶିକ୍ଷାନୁଷ୍ଠାନ ଏ୧ରୁ ବଞ୍ଚିତ ହୋଇଛି । ପ୍ରାଥମିକ ବିଦ୍ୟାଳୟଠାରୁ ଉଚ୍ଚ ବିଦ୍ୟାଳୟ ପର୍ଯ୍ୟନ୍ତ ଶିକ୍ଷା ବ୍ୟବସ୍ଥାରେ ଅନେକ ତ୍ରୃଟି ରହିଥିବା ସମସ୍ତ ଅନୁଭବ କରୁଥିଲେ ମଧ୍ୟ ଏହାକୁ ସୁଧାରିବାକୁ ପ୍ରୟାସ କରାଯାଉନାହିଁ । ଉଚ୍ଚ ବିଦ୍ୟାଳୟ ଗୁଡ଼ିକୁ ପରୀକ୍ଷା ଫଳାଫଳକୁ ନେଇ ଟାର୍ଗେଟ ଦିଆଯାଉନାହିଁ । ଯାହା ଦ୍ୱାରା ବେଫିକର ଭାବେ ଶିକ୍ଷାଦାନ କରାଯିବା, ଛାତ୍ରଛାତ୍ରୀଙ୍କ ଉପରେ ଅଙ୍କୁଶ ନରହିବା ଭଳି ସ୍ଥିତି ସୃଷ୍ଟି ହେଉଛି । ନୟାଗଡ଼ ଜିଲ୍ଲାରେ ଗୋଟିଏ ଗୋଟିଏ ବିଦ୍ୟାଳୟରେ ବର୍ଷ ବର୍ଷ ଧରି କାର୍ଯ୍ୟ କରୁଥିବା ଶିକ୍ଷକ ଓ ଶିକ୍ଷା କର୍ମଚାରୀଙ୍କୁ ବଦଳି କରାଯିବା ଉପରେ ଜିଲ୍ଲା ଶିକ୍ଷା ବିଭାଗ ଆଦୈା ଗୁରୁତ୍ୱ ଦେଉନାହିଁ । ଯାହା ଦ୍ୱାରା ଶିକ୍ଷା ବିଭାଗ ଅଧିକାରୀଙ୍କ ପ୍ରତି ଶିକ୍ଷକଙ୍କ ମନରେ ଭୟ ରହୁନାହିଁ । ବିଭିନ୍ନ ସଂଘ ନାଁରେ କିଛି ଶିକ୍ଷକ ଶିକ୍ଷା ବ୍ୟବସ୍ଥା ପ୍ରତି ଚ୍ୟାଲେଞ୍ଜ ସୃଷ୍ଟି କରୁଥିବା ଦେଖାଯାଉଛି । ଜିଲ୍ଲା ଶିକ୍ଷା ଅଧିକାରୀ ଏ ଦିଗରେ ଧ୍ୟାନ ଦେବା ସହ ଆଗାମୀ ବର୍ଷ ପାଇଁ ବିଭିନ୍ନ ବିଦ୍ୟାଳୟକୁ ଟାର୍ଗେଟ ଦେବାକୁ ଦାବି ହେଉଛି ।
