ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ବ୍ଲକ ଅନ୍ତର୍ଗତ ଇକିରି ପ୍ରାଥମିକ ବିଦ୍ୟାଳୟର କାର୍ଯ୍ୟରତ ଶିକ୍ଷକ ରତିକାନ୍ତ ନାୟକଙ୍କ କରୋନା ଜନିତ ଅକାଳ ମୃତ୍ୟୁ ହୋଇ ଯାଇଥିବା ବେଳେ ନୟାଗଡ଼ ଶିକ୍ଷକ ସମାଜ ପକ୍ଷରୁ ତାଙ୍କୁ ଅଶ୍ରୁଳ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି । ଏ ନେଇ ନୟାଗଡ଼ ରାଜାବଗିଚା ପ୍ରାଥମିକ ବିଦ୍ୟାଳୟ ପରିସରରେ ଏକ ଶୋକ ସଭା ଅନୁଷ୍ଠିତ ହୋଇଥିବା ବେଳେ ସ୍ୱର୍ଗତ ଆତ୍ମାର ସଦଗତି କାମନା କରାଯାଇ ଦୁଇ ମିନିଟ ନୀରବ ପ୍ରାର୍ଥନା କରାଯାଇଥିଲା । ତାଙ୍କ ସ୍ମୃତିଚାରଣ କରି ଉପସ୍ଥିତ ଶିକ୍ଷକମାନେ ସ୍ୱର୍ଗତ ନାୟକ ଜଣେ ସୁସଂଗଠକ,ମେଳାପି ତଥା ଛାତ୍ରବତ୍ସଳ ଶିକ୍ଷକ ଭାବରେ ସମଗ୍ର ନୟାଗଡ଼ ଜିଲ୍ଲାରେ ପରିଚିତ ଥିଲେ ବୋଲି ମତ ପ୍ରକାଶ କରିଥିଲେ । ଗତ ଏକମାସ ମଧ୍ୟରେ ତାଙ୍କ ବଡ଼ଭାଇଙ୍କ କରୋନାରେ ମୃତ୍ୟୁ ହୋଇଥିବା ବେଳେ ତାଙ୍କର ଏହି ଆକସ୍ମିକ ବିୟୋଗରେ ସମଗ୍ର ଶିକ୍ଷକ ସମାଜରେ ଶୋକାକୁଳ ପରିବେଶ ସୃଷ୍ଟି କରିଛି । ଏହି ଶ୍ରଦ୍ଧାଞ୍ଜଳି ଏବଂ ସ୍ମୃତିଚାରଣ ସଭାରେ ଶିକ୍ଷକ ସଂଗଠନ ପକ୍ଷରୁ ଶେଖ ଅବଦୁଲ ଖାଲିକ, ଲକ୍ଷ୍ମୀଧର ସାହୁ, ସୁରେଶ ସେଠି, ପୀତବାସ ପ୍ରଧାନ, ଅଶୋକ ମଲ୍ଲ, ମନ୍ମଥ କିଶୋର ନାୟକ, ଚିତ୍ତରଂଜନ ଦାଶ, ମନୋଜ ବେହେରା, ଶରତ ପାଳ ପ୍ରମୁଖ ଉପସ୍ଥିତ ରହି ସ୍ୱର୍ଗତ ଆତ୍ମାପ୍ରତି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ।
