ନୟାଗଡ଼, (ବାଘୁଆବାର୍ତ୍ତା): ଦୀର୍ଘ ପାଂଚ ବର୍ଷ ପରେ ଗୁରବାର ନୟାଗଡ଼ ଚିନିଶିଳ୍ପରୁ ତାଲା ଖୋଲିବ । କାରଖାନାରେ ଯନ୍ତ୍ରପାତି ଅଛି ନା ନାହିଁ, ସେ ନେଇ ଆକଳନ କରାଯିବ । ଜିଲ୍ଲା ପ୍ରଶାସନ ପକ୍ଷରୁ ଏନେଇ ସମସ୍ତ ପ୍ରସ୍ତୁତି ସରିଥିବା ବେଳେ ବ୍ୟାପକ ପୁଲିସ ମୁତୟନ କରାଯିବ ବୋଲି ଜଣାଯାଇଛି । ପରିସ୍ଥିତିର ଗମ୍ଭୀରତା ଦୃଷ୍ଟିରୁ ଦୁଇ ସେକ୍ସନ ଫୋର୍ସ ସହ ମାଜିଷ୍ଟେଡଙ୍କ ଉପସ୍ଥିତିରେ ଆକଳନ କରାଯିବ । ଏଥି ସହିତ ଚିନିଶିଳ୍ପ ଆକଳନ ସମୟରେ ପ୍ରତ୍ୟକ ଘଟଣାର ଭିଡିଓ ରେକଂର୍ଡି କରାଯିବ ବୋଲି ସୂଚନା ମିଳିଛି । ଏହି ଆକଳନ କରିବା ପାଇଁ ଜିଲ୍ଲା ପ୍ରଶାସନ ଗଞ୍ଜାମ ଜିଲ୍ଲାପାଳଙ୍କ ଜରିଆରେ ଆସ୍କା ଚିନିକଳରୁ ଦୁଇ ଜଣିଆ ବୈଷୟିକ ଟିମଙ୍କୁ ଜିଲ୍ଲା ପ୍ରଶାସନ ଡକାଇଥିବା ଜଣାଯାଇଛି । ସୂଚନାନୁସାରେ, ୧୯୮୮ ମସିହାରେ ନୟାଗଡ଼ ପାଣିପୋଇଲା ଠାରେ ପ୍ରତିଷ୍ଠା ହୋଇଥିବା ଚିନିକଳ ଜିଲ୍ଲାର ଆର୍ଥିକ ମେରୁଦଣ୍ଡ ରୂପେ ବିବେଚନା କରାଯାଏ । ଜିଲ୍ଲାର ଭାତହାଣ୍ଡି ରୂପେ ପରିଚିତ ଏହି ଶିଳ୍ପକୁ ସରକାର ୨୦୦୪ ମସିହାରେ ଶିଳ୍ପପତି ତ୍ରୈଲୋକ୍ୟ ମିଶ୍ରଙ୍କୁୁ ବିକ୍ରି କରିବା ନେଇ ଚୁକ୍ତି କରିଥିଲେ । ତେବେ ଶିଳ୍ପପତି ତ୍ରୈଲୋକ୍ୟ ମିଶ୍ରଙ୍କ କଂପାନୀ ନୟାଗଡ଼ ସୁଗାର କମ୍ପେ୍ଲକ୍ସ ଏହାର ପରିଚାଳନା ଦାୟିତ୍ୱ ନେବାପରେ ଆଖୁଚାଷୀ ଏବଂ କର୍ମଚାରୀଙ୍କ ଦରମା ବକେୟା ରଖି ୨୦୧୫ ମସିହାରୁ ମିଲ୍ରେ ବେଆଇନ ତାଲା ଝୁଲାଇ ଦେଇଛନ୍ତି ।
