ନୟାଗଡ଼,(ବାଘୁଆବାର୍ତ୍ତା): ରାଜ୍ୟ ସରକାରଙ୍କ ତ୍ରିଭଙ୍ଗୀ ନୀତି ପାଇଁ ପ୍ରଶାସନ ଅକଳରେ ପଡ଼ିଥିବା ବେଳେ ବିଭିନ୍ନ ସଂଗରୋଧ କେନ୍ଦ୍ରରେ ସଂଗରୋଧରୁ ମୁକ୍ତ କରାଯିବାକୁ ନେଇ ଅସନ୍ତୋଷ, ଉତ୍ତେଜନା ଏବଂ ଭିଡିଓ ଭାଇରାଲ୍ ଭଳି ଘଟଣା ସାମନାକୁ ଆସିଛି । ଚଳିତମାସ ପହିଲାରୁ ଆଜି ମଧ୍ୟାହ୍ନ ୧ଟା ମଧ୍ୟରେ ଜିଲ୍ଲାରେ ୪ ହଜାର ୯୯୮ ଜଣ ପ୍ରବାସୀଙ୍କୁ ସଂଗରୋଧରେ ରଖା ଯାଇଥିବା ଜଣାଯାଇଛି । ଏହି ସଂଖ୍ୟା ରାତି ସୁଦ୍ଧା ୫ ହଜାର ଅତିକ୍ରମ କରିଛି । ପ୍ରଥମେ ସରକାରଙ୍କ ନିୟମନୁସାରେ ପ୍ରବାସୀଙ୍କୁ ୧୪ ଦିନ ସଂଗରୋଧରେ ରଖାଯିବାର ବ୍ୟବସ୍ଥା କରାଯାଇଥିଲା । ମାତ୍ର କରୋନା ଆକ୍ରାନ୍ତଙ୍କ ଲକ୍ଷଣ ବିଳମ୍ବରେ ଆସୁଥିବାରୁ ପରମୂହୂର୍ତ୍ତରେ ଏହି ଅବଧିକୁ ୨୧ ଦିନକୁ ବୃଦ୍ଧି କରାଯାଇଥିବା ବେଳେ ଗୃହ ସଂଗରୋଧ ବ୍ୟବସ୍ଥା ୭ ଦିନ ଲାଗୁ କରାଯାଇଥିଲା । ଫଳରେ ଜିଲ୍ଲାରେ ୨୧ ଦିନିଆ ସଂଗରୋଧ ବ୍ୟବସ୍ଥାକୁ ପାଳନ ଚାଲିଥିବା ବେଳେ ଏବେ ପ୍ରଶାସନକୁ ଅକଳରେ ପକାଇଛି ସରକାରଙ୍କ ୭ ଦିନିଆ ସଂଗରୋଧ ଏବଂ ୭ ଦିନିଆ ଗୃହ ସଂଗରୋଧ ବ୍ୟବସ୍ଥା । ଜିଲ୍ଲାରେ ୨୧ ଦିନିଆ ସଂଗରୋଧ ଶେଷ କରି ୪୪୬ ଜଣ ପ୍ରବାସୀ ସଂଗରୋଧ ମୁକ୍ତ ହୋଇଥିବା ବେଳେ ଏବେ ୧୪ ଦିନ ସଂଗରୋଧ ଶେଷ କରିଥିବା ପ୍ରବାସୀମାନେ ସେମାନଙ୍କୁ ମୁକ୍ତ କରିବାକୁ ଚାପ ସୃଷ୍ଟି କରୁଛନ୍ତି । ଯାହାକୁ ନେଇ ଆଜି ଜିଲ୍ଲାର ରଣପୁର, ଓଡ଼ଗାଁ, ନୟାଗଡ଼ ଓ ଖଣ୍ଡପଡ଼ା ପ୍ରଭୃତି ବ୍ଲକ ଅଂଚଳରେ ଥିବା ସଂଗରୋଧରୁ ଏହି ଚାପର ଗନ୍ଧ ବାରି ହୋଇଛି । ଅନେକ ସଂଗରୋଧ କେନ୍ଦ୍ରରେ ପ୍ରବାସୀମାନେ ଖାଇବା ନିମ୍ନ ମାନର ଦିଆଯାଉଥିବା ଓ ଅବ୍ୟବସ୍ଥାରେ ରଖା ଯାଉଥିବା ବାହାନା ସୃଷ୍ଟି କରିଛନ୍ତି । ଏପରିକି ଓଡ଼ଗାଁ ବ୍ଲକ କୁରାଳ ସଂଗରୋଧ କେନ୍ଦ୍ରରେ କିଛି ପ୍ରବାସୀ ଅବ୍ୟବସ୍ଥା ନେଇ ଭିଡିଓ ଭାଇରାଲ କରିଥିବା ବେଳେ ନୟାଗଡ଼ ବ୍ଲକ ଲାଠିପଡ଼ାରୁ ପ୍ରବାସୀମାନେ ଖାଇବା ଫୋପାଡ଼ିବାର ଧମକ ଦେଇଛନ୍ତି । ଏହି ବାହାନା ପଛରେ ସେମାନେ ୧୪ ଦିନିଆ ଅବଧି ଶେଷ କରିଥିବାରୁ ତାଙ୍କୁ ମୁକ୍ତ କରିବାକୁ ଦାବି ରହିଥିବା ଜଣାଯାଇଛି । ଏଥିସହିତ ଅନେକ ସ୍ଥାନରେ ୭ ଦିନିଆ ସଂଗରୋଧ ଶେଷ କରିଥିବା କିଛି ପ୍ରବାସୀ ମଧ୍ୟ ମୁକ୍ତ କରିବା ନେଇ ମୁହଁ ଖୋଲିଛନ୍ତି । ସରକାରଙ୍କ ଏଭଳି ତ୍ରିଭଙ୍ଗୀ ନୀତି ପାଇଁ ଜିଲ୍ଲା ପ୍ରଶାସନ, ତଳିଆ କର୍ମଚାରୀ ଏବଂ ପଂଚାୟତ ସରପଂଚମାନେ ଏବେ ହରଣଘଣାରେ ପଡ଼ିଛନ୍ତି । ରାଜ୍ୟ ସରକାର ଏହି ସମସ୍ୟାକୁ ଦୃଷ୍ଟି ଦେଇ ଚିନ୍ତା କରିବାର ଆବଶ୍ୟକତା ରହିଛି ।
