ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲାପାଳ ଡ. ପୋମା ଟୁଡୁଙ୍କ ଅଧ୍ୟକ୍ଷତାରେ ରାଷ୍ଟ୍ରୀୟ ପୋଷଣ ମାହ ପାଳିତ ହୋଇଯାଇଛି । ଭିସି ମାଧ୍ୟମରେ ଆୟୋଜିତ ଏହି କାର୍ଯ୍ୟକ୍ରମରେ ପଞ୍ଚାୟତରାଜ ବିଭାଗ, ଜଳ ଓ ପରିମଳ ବିଭାଗ ଏବଂ ମହିଳା ଓ ଶିଶୁ ବିକାଶ, ମିଶନ୍ ଶକ୍ତି ବିଭାଗ ଯୋଗ ଦେଇ ଅପପୃଷ୍ଟିକୁ କିଭଳି ରୋକା ଯାଇ ପାରିବ ସେ ନେଇ ପଦକ୍ଷେପ ଆଲୋଚନା କରିଥିଲେ । ବାହାର ରାଜ୍ୟରୁ ଫେରିଥିବା ପ୍ରବାସୀଙ୍କ ପରିବାର ରୋଜଗାର ହରାଇ ଥିବା ବେଳେ ସେମାନଙ୍କ ପରିବାରରେ ପୋଷଣ ଅଭାବ ଦେଖା ଯିବାର ସମ୍ଭାବନା ଥିବାରୁ ଜିଲ୍ଲାପାଳ ଜିଲ୍ଲାର ସମସ୍ତ ସିଡିପିଓଙ୍କୁ ପୃଷ୍ଟି ହୀନତା ପିଲାଙ୍କ ସଠିକ୍ ତାଲିକା ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛନ୍ତି । ଏହି କାର୍ଯ୍ୟକ୍ରମରେ ଜୀବିକା ମିଶନ୍ ଏବଂ ମନରେଗା ଦ୍ୱାରା ପରିଚାଳିତ ମୋ ଉପକାରୀ ବଗିଚା ଉପରେ ଜିଲ୍ଲାପାଳ ଗୁରୁତ୍ୱ ଦେଇ ଆଲୋଚନା ବେଳେ ଜିଲ୍ଲାରେ ୧୩ ହଜାର ମୋ ଉପକାରୀ ବଗିଚା ନିର୍ମାଣ କରିବାକୁ ଥିବା ପ୍ରକାଶ କରିଥିଲେ । ଏଥିସହିତ ପ୍ରତି ବ୍ଲକର ୫ଟି ଅଙ୍ଗନବାଡ଼ି କେନ୍ଦ୍ରରେ ମୋ ଉପକାରୀ ବଗିଚା କରିବାକୁ ଜିଲ୍ଲାପାଳ ସିଡିପିଓମାନଙ୍କୁ ନିର୍ଦ୍ଦେଶ ଦେଇଛନ୍ତି । ଏହା ମାଧ୍ୟମରେ ଅପପୃଷ୍ଟି ରୋକା ଯାଇ ପାରିବ ବୋଲି ପ୍ରକଳ୍ପ ନିର୍ଦ୍ଦେଶକ ମତ ଦେଇଥିବା ବେଳେ ବିଡିଓମାନଙ୍କ ସହଯୋଗରେ ମନରେଗା ଦ୍ୱାରା ଏହା କରିବାକୁ ନିର୍ଦ୍ଦେଶ ଦେଇଛନ୍ତି । ଏଥିସହିତ କାର୍ଯ୍ୟକ୍ରମରେ ୬ ମାସ ପର୍ଯ୍ୟନ୍ତ ଶିଶୁଙ୍କୁ ସ୍ତନ୍ୟପ୍ରାଣ୍ୟ ଏବଂ ୬ ମାସ ପରେ ଅନ୍ୟ ଖାଦ୍ୟ ଉପରେ ଗୁରୁତ୍ୱ ଦେବା ଲାଗି ଜନସଚେତନତା କରିବାକୁ ନିର୍ଦ୍ଦେଶ ଦିଆଯାଇଛି । ଅଙ୍ଗନବାଡ଼ି କେନ୍ଦ୍ରରେ ପିଲାଙ୍କ ଓଜନ ସହିତ ଅନ୍ୟାନ ବିଷୟ ଉପରେ ଗୁରୁତ୍ୱ ଦେବାକୁ ଆଲୋଚନା ହୋଇଛି । ଏହି ବୈଠକରେ ଜିଲ୍ଲା ସମାଜ ମଙ୍ଗଳ ଅଧିକାରୀଙ୍କ ସମେତ, ବହୁ ଜିଲ୍ଲା ଓ ବ୍ଲକ ସ୍ତରୀୟ ଅଧିକାରୀ ମାନେ ଯୋଗ ଦେଇଥିବା ବେଳେ ପ୍ରକଳ୍ପ ନିର୍ଦ୍ଦେଶକ ଶ୍ରୀଯୁକ୍ତ ରାୟ ଧନ୍ୟବାଦ ଅପଣ କରିଥିଲେ ।
