ପୁଲିସ୍ ମନୋବଳ ବଢ଼ାଇଲେ
ନୟାଗଡ଼,(ବାଘୁଆବାର୍ତ୍ତା): କରୋନା ମୁକାବିଲା ପାଇଁ ରାଜ୍ୟ ପୁଲିସ ମହାନିର୍ଦ୍ଦେଶକ(ଡିଜିପି) ଅଭୟ ଆଜି ନୟାଗଡ଼ରେ ପହଞ୍ଚିଛନ୍ତି । ନୟାଗଡ଼ ଜିଲ୍ଲା ଇଟାମାଟି ଥାନାକୁ ଡିଜିପି ପ୍ରଥମେ ପଂହଚି ସେଠାକାର ସ୍ୱଚ୍ଛତା ଏବଂ କର୍ମଚାରୀଙ୍କ ସ୍ୱାସ୍ଥ୍ୟ ସଂମ୍ପର୍କରେ ପଚାରି ବୁଝିଥିବା ଜଣାଯାଇଛି । ସେହିଭଳି କରୋନା ମହାମାରୀ ରୋକିବା ପାଇଁ ପୁଲିସ କର୍ମଚାରୀମାନେ କେତେ ଦୂର ତତ୍ପର ଅଛନ୍ତି ସେ ନେଇ ଡିଜିପି ଅନୁଧ୍ୟାନ କରିଛନ୍ତି । ଏହା ପରେ ଡିଜିପି ନୟାଗଡ଼ ବସ୍ଷ୍ଟାଣ୍ଡରେ ଓହ୍ଲାଇ ସ୍ଥିତି ପରଖିବା ସହ ସ୍ୱେଚ୍ଛାକୃତ ଭାବେ କାର୍ଯ୍ୟକରୁଥିବା ନୟାଗଡ଼ ସ୍ୱୟଂଶାସିତ ମହାବିଦ୍ୟାଳୟର ଏନ୍ସିସି କ୍ୟାଡେଟ୍ ଛାତ୍ରଛାତ୍ରୀମାନଙ୍କ ସହ ଆଲୋଚନା କରିଛନ୍ତି । ପରେ ପୁଲିସ ମହାନିର୍ଦ୍ଦେଶକ ନୟାଗଡ଼ ପିଟିଏସ୍, ପୁଲିସ୍ ବାରାକ୍ ବୁଲି କରୋନାକୁ ନେଇ ବିଭାଗ କେତେଦୂର ତତ୍ପର ରହିଛି ତାହା ଅନୁଧ୍ୟାନ କରିଥିଲେ । ନୟାଗଡ଼ ଜିଲ୍ଲା ପୁଲିସ ମୁଖ୍ୟାଳୟରେ ଡିଜିପି ନୟାଗଡ଼ ଆରକ୍ଷୀ ଅଧିକ୍ଷକଙ୍କ ସହିତ ଆଲୋଚନା କରିଛନ୍ତି । ଜିଲ୍ଲାର କରୋନା ପରିସ୍ଥିତି, ନୟାଗଡ଼ ପୁଲିସ ବିଭାଗର କାର୍ଯ୍ୟ ଉପରେ ଆଲୋଚନା କରିଥିବା ଜଣାପଡିଛି । ନୟାଗଡ଼ ଜିଲ୍ଲାରେ କରୋନାର ପ୍ରଭାବ ନଥିଲେ ମଧ୍ୟ ପୁଲିସ ମହାନିର୍ଦ୍ଦେଶକ ବିଭିନ୍ନ ଜିଲ୍ଲା ଗସ୍ତ କରି କରୋନା ସମ୍ପର୍କରେ ସମୀକ୍ଷା କରୁଛନ୍ତି । ଆଜିର ଏହି ଗସ୍ତ ପୁଲିସ ବିଭାଗର ମନୋବଳକୁ ଦୃଢ଼ କରିବା ସହିତ ଆଗାମୀ ଦିନର ରଣନୀତି ବିଷୟରେ ଆଲୋଚନା ହୋଇଥିବା ଜଣାଯାଇଛି । ଜିଲ୍ଲାରେ ସାଧାରଣ ଜନତା କିଭଳି ସାମାଜିକ ଦୂରତା ଅବଲମ୍ବନ କରିବେ, କୈାଣସି ବି ସ୍ଥାନରେ ଜନଗହଳୀ ଲାଗି ରହିବ ନାହଁ ଏବଂ ଜରୁରୀ କାଳୀନ ସମୟରେ ଗ୍ରସ୍ତ କରୁଥିବା ବ୍ୟକ୍ତି କିଭଳି ହଇରାଣ ହେବେ ନାହିଁ ସେ ନେଇ ଡିଜିପି ଆଲୋଚନା କରିଥିବା ଜଣାଯାଇଛି । ଏଥିସହିତ ଜିଲ୍ଲାର ସମସ୍ତ ଥାନାରେ ସାନିଟାଇଜେସନ୍କୁ ଗୁରୁତ୍ୱ ଦେବା ସହ ପୁଲିସ ଅଧିକାରୀ ଓ କର୍ମଚାରୀଙ୍କ ସ୍ୱାସ୍ଥ୍ୟ ଗତ ସମସ୍ୟା ଏବଂ ବିଭିନ୍ନ ସୁବିଧା ଅସୁବିଧା ପରଖିଥିଲେ । ଆଜି ପୁଲିସ ମହାନିର୍ଦ୍ଦେଶକଙ୍କ ସହ କେନ୍ଦ୍ରାଞ୍ଚଳ ଡିଆଇଜି ଆଶିଷ ସିଂ ନୟାଗଡ଼ ଆସିଥିବା ବେଳେ ଏହି ଗ୍ରସ୍ତ ସମୟରେ ନୟାଗଡ଼ ଜିଲ୍ଲା ଆରକ୍ଷୀ ଅଧିକ୍ଷକ ପ୍ରତ୍ୟୁଷ ଦିୱାକର, ନୟାଗଡ଼ ଡିଏସ୍ପି, ଏସ୍ଡିପିଓ, ଆଇଆଇସି ଓ ବିଭାଗୀୟ ଅଧିକାରୀମାନେ ଉପସ୍ଥିତ ରହିଥିଲେ ।
