ନୟାଗଡ଼,(ବାଘୁଆବାର୍ତ୍ତା): ଜିଲ୍ଲା ସଂସ୍କୃତି ପରିଷଦ ଏବଂ ନାଟ୍ୟଧାରା ଆୟୋଜିତ ରାଜ୍ୟ ସ୍ତରୀୟ ନାଟକ ମହୋତ୍ସବ ୨୦୨୦ ଦ୍ୱିତୀୟ ଦିବସ ଆଜି ପଠାଣି ସାମନ୍ତ ପ୍ରେକ୍ଷାଳୟରେ ଅନୁଷ୍ଠିତ ହୋଇଯାଇଛି । ଆଜିର ସଂନ୍ଧ୍ୟାରେ ଉଦଘାଟକ ଭାବେ ନୟାଗଡ଼ ଆରକ୍ଷୀ ଅଧିକ୍ଷକ ଦିଲ୍ଲୀପ ସାହାଣୀ ଯୋଗ ଦେଇଥିବା ବେଳେ ଅତିଥି ଭାବେ ମଞ୍ଚ ନିର୍ଦ୍ଦେଶକ ଶରତ ଚନ୍ଦ୍ର ମାଝୀ, ମହେଶ ହାଜରା ପ୍ରମୂଖ ଯୋଗ ଦେଇ ନୟାଗଡ଼ ଜିଲ୍ଲା ନାଟ୍ୟ ପରମ୍ପରାକୁ ବଜାୟ ରଖିବାରେ ଅଗ୍ରଣୀ ଜିଲ୍ଲା ଭାବେ ଆଗାମୀ ଦିନରେ ପରିଗଣିତ ହେବ ବୋଲି ବକ୍ତବ୍ୟ ଦେଇଥିଲେ । ଏଥିସହିତ ସଂସ୍କୃତି ପରିଷଦ ଏବଂ ନାଟ୍ୟଧାରର ଏ ଉଦ୍ୟମକୁ ଅତିଥିମାନେ ପ୍ରଶଂସା କରିଥିଲେ । ଦ୍ୱିତୀୟ ଦିବସରେ ଖୋର୍ଦ୍ଧା ଆନ୍ଦୋଳନ ଦ୍ୱାରା ପରିବେଷିତ ହୋଇଥିଲା ନାଟକ ‘ଏ ନୁହେଁ ଗପ’ । ନାଟ୍ୟକାର ଡା. ଧନେଶ୍ୱର ମହାନ୍ତିଙ୍କ ରଚିତ ଏବଂ ସନ୍ତୋଷ କୁମାର ମହାନ୍ତିଙ୍କ ନିର୍ଦ୍ଦେଶିତ ଏହି ନାଟକକୁ ଦର୍ଶକ ବେଶ ଉପଭୋଗ କରିଥିବା ବେଳେ ନାଟକର ବିଷୟ ବସ୍ତୁ ସହ ଚରିତ୍ରମାନେ ବେଶ ଖାପ ଖୁଆଉଥିବା ନେଇ ମତ ପ୍ରକାଶ ପାଇଛି । ନାଟ୍ୟଧାରାର ସଭାପତି ପ୍ରମୋଦ ପଟ୍ଟନାୟକ, ନିର୍ଦ୍ଦେଶକ ଡ. ବିଜୟ କୁମାର ଚୈାଧୁରୀ ଏବଂ ସଂପାଦକ ଲକ୍ଷ୍ମୀଧର ମହାପାତ୍ରଙ୍କ ପ୍ରତ୍ୟେକ୍ଷ ତଚ୍ଛ୍ୱାବଧାନରେ ଆୟୋଜିତ ହେଉଥିବା ରାଜ୍ୟ ସ୍ତରୀୟ ନାଟକ ମହୋତ୍ସବ ଚଳିତ ମାସ ୧ ତାରିଖରୁ ଆରମ୍ଭ ହୋଇଥିବା ବେଳେ ଏହା ଆସନ୍ତା ୭ ତାରିଖରେ ଉଦଯାପିତ ହେବ ବୋଲି ଜଣାପଡ଼ିଛି । ସାତ ଦିନରେ ସାତଟି ନାଟକ ନୟାଗଡ଼ ପଠାଣି ସାମନ୍ତ ପ୍ରେକ୍ଷାଳୟରେ ଅନୁଷ୍ଠିତ ହେବାକୁ ଥିବା ବେଳେ ଦର୍ଶକ ବେଶ ଉପଭୋଗ କରୁଥିବା ଜଣାଯାଇଛି ।
