ନୟାଗଡ଼, (ବାଘୁଆବାର୍ତ୍ତା) : ଏକୁଟିଆ ଥିବା ଅବସ୍ଥାରେ ନିଜ ଶାଳୀକୁ ଦୁଷ୍କର୍ମ କରି ଗିରଫ ହୋଇଛନ୍ତି ଜଣେ ଯୁବକ । ଗଣିଆ ଥାନା ଅଂଚଳରେ ଏଭଳି ଘଟଣା ଘଟିଥିବା ବେଳେ ଅଭିଯୁକ୍ତ ପତ୍ନୀଙ୍କ ଏତଲାକୁ ଆଧାର କରି ଦୁଷ୍କର୍ମକାରୀଙ୍କୁ ପୁଲିସ ଗିରଫ କରି କୋର୍ଟ ଚାଲାଣ କରାଯାଇଥିବା ଜଣାପଡିଛି । ଘଟଣାରୁ ଜଣାପଡିଛି ଯେ ଗଣିଆ ବ୍ଲକ ଓସ୍ତିଆ ଗ୍ରାମର ଦୟାନିଧି ନାୟକଙ୍କ ପୁଅ ମୁନା ନାୟକ ଏହି ଥାନା ଅଂଚଳରେ ଜଣେ ଯୁବତୀଙ୍କୁ ପ୍ରେମ ବିବାହ କରି ୬ମାସ ତଳୁ କଟକରେ ରହୁଥିଲେ । ମୁନା କିଛିଦିନ ତଳେ ନିଜ ସ୍ତ୍ରୀଙ୍କୁ ଧରି ଶ୍ୱଶୁର ଘରକୁ ବୁଲି ଆସିଥିବା ବେଳେ ଲକ୍ଡାଉନ୍ ଯୋଗୁଁ ଉଭୟ ଆଉ କଟକ ଫେରି ପାରି ନଥିଲେ । ଶ୍ୱଶୁର ଘରେ ରହୁଥିବା ସମୟରେ ଗତ ୨୪ ତାରିଖ ଦିନ ଅଭିଯୁକ୍ତ ମୁନାର ଶାଳୀ ବାରିପଟକୁ ଝାଡ଼ା ଯାଇଥିବା ବେଳେ ତାକୁ ଏକୁଟିଆ ପାଇ ତା ସହିତ ଜୋର ଜବରଦସ୍ତି ଦୁଷ୍କର୍ମ କରିଥିଲା । ଏପରିକି ଘଟଣା ସମ୍ପର୍କରେ କାହାକୁ କହିଲେ ତତେ ଜୀବନରୁ ମାରିଦେବି ବୋଲି ଧମକ ଦେଇଥିଲେ । ଦୁଷ୍କର୍ମର ଶିକାର ହୋଇଥିବା ନାବାଳିକା ଜଣକ ଘଟଣା ସମ୍ପର୍କରେ ନିଜ ଭଉଣୀଙ୍କୁ ଜଣାଇଥିଲେ । ତେବେ ନାବାଳିକାର ଭଉଣୀ ଗଣିଆ ଥାନାରେ ନିଜ ସ୍ୱାମୀଙ୍କ ବିରୁଦ୍ଧରେ ଏତେଲା ଦେଇଥିଲେ । ଘଟଣା ସମ୍ପର୍କରେ ଅବଗତ ହେବା ପରେ ଗଣିଆ ପୋଲିସ ଅଭିଯୁକ୍ତ ମୁନାକୁ ଥାନାକୁ ଆଣି ପଚରାଉଚରା କରିଥିଲେ । ତେବେ ଅଭିଯୁକ୍ତ ସମସ୍ତ ଘଟଣା ପୋଲିସକୁ ଜଣାଇବା ସହିତ ନିଜ ଦୋଷ ସ୍ୱୀକାର କରିଥିଲେ । ପରେ ଅଭିଯୁକ୍ତର ଡାକ୍ତରୀ ମାଇନା କରିବା ପରେ ତାକୁ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ଦୀପକ କୁମାର ଖଣ୍ଡାୟତରାୟ ଜଣାଇଛନ୍ତି । ତେବେ ମୁନା ପ୍ରେମ ବିବାହ କରିଥିବା ବେଳେ ବିବାହର ୬ ମାସ ନପୁରୁଣୁ ଏଭଳି କାଣ୍ଡ ଘଟାଇବାର ରହସ୍ୟ ଜଣାପଡି ନାହିଁ ।
ନାବାଳିକା ଶାଳୀକୁ ଦୁଷ୍କର୍ମ କରି ଭିଣୋଇ ଗିରଫ
