ନୟାଗଡ଼, (ବାଘୁଆବାର୍ତ୍ତା): ଆପଣ ଚାଲିକରି ଗଲାବେଳେ ମୋବାଇଲ୍ରେ କଥା ହେଉଛନ୍ତି କି? ଗାଡ଼ି ଚଳାଇବା କିମ୍ବା ଗାଡ଼ିରେ ବସି ଯିବା ବେଳେ ମୋବାଇଲେ କଥା ହୋଇ ଯାଉଛନ୍ତି କି? ତେବେ ହୋଇଯାନ୍ତୁ ସାବଧାନ! ନଚେତ୍ କେଉଁ ସମୟରେ କିମ୍ବା କେଉଁ ମୂହୁର୍ତ୍ତରେ ମୋବାଇଲ ଲୁଟେରାଙ୍କ ଜାଲରେ ପଡ଼ିଯିବେ । ଆପଣଙ୍କ ମୋବାଇଲ ଯିବା ସହିତ ଜୀବନ ବି ଯାଇପାରେ । ଗତ ତିନିଦିନ ଧରି ନୟାଗଡ଼ ସହରରେ ଆତଙ୍କ ଖେଳାଇଛନ୍ତି ଏହି ଲୁଟେରା ଗୋଷ୍ଠୀ । ମୁଖ୍ୟତଃ କଲେଜ ରାସ୍ତା ଏବଂ ପିଟିଏସ୍ ରାସ୍ତାରେ ଏପରି ଅବସ୍ଥା ବିଶେଷତଃ ଦେଖିବାକୁ ମିଳିଛି । ଗତ କିଛି ଦିନ ମଧ୍ୟରେ ଦଶରୁ ଉର୍ଦ୍ଧ ଘଟଣା ଘଟିଲାଣି । ନୟାଗଡ଼ ଟାଉନଥାନାରେ ମଧ୍ୟ କିଛି ଲୋକ ଅଭିଯୋଗ କରିଛନ୍ତି । ନିଶାଖୋର ଯୁବକ, ବାଇକରେ ଆସି ମୋବଇଲ ଭିଢ଼ି ନେଉଛନ୍ତି । ଗାଡ଼ି ଚଳାଇବା ବେଳେ କିମ୍ବା ଚାଲିକରି କଥା ହୋଇ ଗଲା ବେଳେ ଏହି ଗୋଷ୍ଠୀ ପ୍ରଥମେ ନଜର କରିବା ସହ ଝାମ୍ପ ମାରୁଛନ୍ତି । ନୟାଗଡ଼ ସହରରେ ପୁଲିସ ପେଟ୍ରୋଲିଂ ବ୍ୟବସ୍ଥା ଢିଲା ରହିଲେ ଆଗକୁ ଆହୁରି ଅନେକ ଘଟଣା ଘଟିବାର ସମ୍ଭାବନା ରହିଛି ।
