ଜାତୀୟ ଲୋକ ଅଦାଲତ ଅନୁଷ୍ଠିତ

ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଆଇନସେବା ପ୍ରାଧିକରଣଙ୍କ ପକ୍ଷରୁ ଆଜି ସମଗ୍ର ଜିଲ୍ଲାର ବିଚାର ବିଭାଗୀୟ ଅଦାଲତ ପରିସରରେ ଜାତୀୟ ଲୋକ ଅଦାଲତ ଅନୁଷ୍ଠିତ ହୋଇଯାଇଛି । ଏହି ଲୋକ ଅଦାଲରେ ମୋଟ ୭୭୧ ଗୋଟି ମାମଲା ଆଗତ କରାଯାଇ ୧୦୮ ଗୋଟି ମାମଲାର ଫଇସଲା କରାଯାଇଛି । ସେହିପରି ୨୦୯୬ ଗୋଟି ବ୍ୟାଙ୍କ ଋଣ ଅନାଦେୟ ମାମଲାର ଆଗତ କରାଯାଇ ୧୦୧ ଗୋଟି ମାମଲାର ସମାଧାନ କରାଯାଇଛି । ଏହା ଦ୍ୱାରା ୩୭ ଲକ୍ଷ ୮୩ ହଜାର ୧୨ଟଙ୍କା ବ୍ୟାଙ୍କ ଋଣ ଆଦାୟ କରାଯିବା ନେଇ ରାଜିନାମା ସ୍ୱାକ୍ଷର କରାଯାଇଥିଲା । ଏହି ଅବସରରେ ନୟାଗଡ଼ ଜିଲ୍ଲା ଜଜ କୋର୍ଟ ପକ୍ଷରୁ ୯ ଗୋଟି ଗାଡ଼ି ମୋଟର ଦୁର୍ଘଟଣା ମାମଲାର ଫଇସଲା ହୋଇ ୩୩ ଲକ୍ଷ ୯୦ ହଜାର ଟଙ୍କା ଆଦାୟ କରାଯାଇଛି । ସେହିଭଳି ୫୦ଟି ବୈବାହିକ ମାମଲା, ୭ଟି ସିଭିଲ ମାମଲା, ୮ଟି ଚେକ୍ ବାଉନ୍ସ ମାମଲାର ଫଇସଲା କରାଯାଇଥିବା ଜଣାପଡ଼ିଛି । ଉକ୍ତ ଲୋକ ଅଦାଲତରେ ଜିଲ୍ଲାଜଜ୍ ଗୋପାଳ ଚନ୍ଦ୍ର ପଟ୍ଟନାୟକଙ୍କ ସମେତ ବିଚାର ବିଭାଗୀୟ ଜଜ ମାନେ ଉପସ୍ଥିତ ରହି ବିବାଦ ସମାଧାନ କରାଇଥିଲେ । କୋର୍ଟ ମ୍ୟାନେଜର ସଂଗ୍ରାମ କେଶରୀ ଜେନା ଏବଂ କୋର୍ଟ କର୍ମଚାରୀମାନେ ସହଯୋଗ କରିଥିଲେ । ଏଥି ସହିତ ପରବର୍ତ୍ତୀ ଲୋକ ଅଦାଲର ଅପ୍ରେଲ ୧୧ ତାରିଖରେ ଅନୁଷ୍ଠିତ ହେବ ବୋଲି ଆଇନସେବା ପ୍ରାଧିକରଣ ସଚିବ ରଂଜୁଲତା ପଣ୍ଡା ପ୍ରକାଶ କରିଛନ୍ତି ।