ନୟାଗଡ଼, (ବାଘୁଆବାର୍ତ୍ତା) : ଏକ ଜମିବାଡି ମାମଲାକୁ କେନ୍ଦ୍ର କରି କୋସକା ଫାଣ୍ଡି ଅଧିକାରୀ ନିକଟସ୍ଥ ଗୈାଡ଼ପାଟଣା ଗ୍ରାମର ରମେଶ ଚନ୍ଦ୍ର ସାହୁଙ୍କୁ ମାଡ଼ ମାରିଥିବା ନେଇ ଅଭିଯୋଗ ହୋଇଛି । ମାଡ଼ରେ ରମେଶ ଗୁରୁତର ଆହତ ହୋଇ ଆଶୁ ଚିକିତ୍ସା ନିମନ୍ତେ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତୀ ହୋଇଥିବା ଜଣାଯାଇଛି । ଏହି ଘଟଣାକୁ ନେଇ ବଳଭଦ୍ରପ୍ରସାଦ, ଗୈାଡ଼ପାଟଣା ଗ୍ରାମର ୫୦ରୁ ଉର୍ଦ୍ଧ ବ୍ୟକ୍ତି ରବିବାର ଅପରାହ୍ନରେ କୋସକା ଫାଣ୍ଡି ପରିସରରେ ପହଁଚି ପାଟିତୁଣ୍ଡ କରିବା ସହ ସଂପୃକ୍ତ ଫାଣ୍ଡି ଅଧିକାରୀଙ୍କ ବିରୁଦ୍ଧରେ ଆଇନ ଅନୁଯାୟୀ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି । ଘଟଣାକୁ ନେଇ ସୋମବାର ଦିନତମାମ ଫାଣ୍ଡି ପରିସରରେ ଉତେଜନା ପ୍ରକାଶ ପାଇଥିଲା । ଖବରପାଇ ଖଣ୍ଡପଡ଼ା ଥାନା ଆଇଆଇସି ବିମଳ କୁମାର ମଲ୍ଲିକ ସଦଳବଳେ ଘଟଣାସ୍ଥଳରେ ପହଁଚି ଉତ୍ୟକ୍ତ ଜନସାଧାରଣଙ୍କୁ ବୁଝାଶୁଝା କରିବାରେ ପରିସ୍ଥିତି ଶାନ୍ତ ପଡିଥିବା ଜଣାଯାଇଛି । ଅପରପକ୍ଷେ କୋସକା ଫାଣ୍ଡି ଅଧିକାରୀଙ୍କୁ ତୁରନ୍ତ ଅନ୍ୟତ୍ର ବଦଳି ଦାବିରେ କୋସକା, କୁମ୍ଭାରପଡା, ବଳଭଦ୍ରପ୍ରସାଦ, ରୟତଢୋଲମରା ପ୍ରଭୃତି ୪ଟି ପଂଚାୟତବାସୀ ଦାବି କରିଛନ୍ତି । ନୟାଗଡ଼ ଏସପି ଘଟଣାରେ ହସ୍ତକ୍ଷେପ କରିବାକୁ ସାଧାରଣରେ ଦାବିହେଉଛି ।
