ନୟାଗଡ଼, (ବାଘୁଆବାର୍ତ୍ତା) : ଖଣ୍ଡପଡା ବ୍ଳକ ଅଧିନ ବେଣାଗାଡିଆ ପଂଚାୟତର ପଥରଦ୍ୱାର ଗ୍ରାମରେ ଥିବା ଶ୍ମଶାନରେ ଶବଦାହକୁ ସ୍ଥାନୀୟ ବାସିନ୍ଦା ବିରୋଧ କରିବା ଯୋଗୁଁଏକ ଅଭାବନୀୟ ଘଟଣା ଘଟିଛି । ଏହାର ପ୍ରତିବାଦରେ ନିକଟସ୍ଥ ମୁରାରୀପୁର ଗ୍ରାମର ଶତାଧିକ ବ୍ୟକ୍ତି ଖଣ୍ଡପଡା ତହସିଲ କାର୍ଯ୍ୟାଳୟ ପରିସରରେ ମହିଳାଙ୍କ ଶବକୁ ପକାଇ ରଖି ହରତାଳ କରିବା ଘଟଣା ସାଧାରଣରେ ଚର୍ଚ୍ଚାର ବିଷୟ ପାଲଟିଛି । ଗୁରୁବାର ସଂନ୍ଧ୍ୟା ୬ଟାରେ ମୁରାରୀପୁର ଗ୍ରାମର ରତନ ରାଉତଙ୍କ ପତ୍ନୀ ତଅପୋଇ ରାଉତ(୭୫)ଙ୍କର ମୃତ୍ୟୁ ହୋଇଥିଲା । ମୃତକଙ୍କ ପରିବାର ବର୍ଗ ଶବଦାହ ନିମନ୍ତେ ପଥରଦ୍ୱାର ଗ୍ରାମ ନିକଟସ୍ଥ ଶ୍ମଶାନକୁ ମହିଳାଙ୍କ ଶବ ନେଇ ଯାଇଥିବା ବେଳେ ପଥରଦ୍ୱାର ଗ୍ରାମର କେତେକ ବ୍ୟକ୍ତି ସେଠାରେ ପହଁଚି ଶବଦାହକୁ ବିରୋଧ କରିଥିଲେ । ଫଳରେ ମୃତକଙ୍କ ପରିବାରବର୍ଗ ଓ ଆତ୍ମୀୟସ୍ୱଜନମାନେ ଶବଧରି ଗ୍ରାମକୁ ଫେରିଥିଲେ । ଗ୍ରାମରେ ଏ ନେଇ ଆଲୋଚନା ହେବା ପରେ ମୁରାରୀପୁର ଗ୍ରାମବାସୀ ଖଣ୍ଡପଡା ତହସିଲଦାର ଓ ଜିଲ୍ଲା ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ । ମାତ୍ର ତହସିଲ କର୍ତୃପକ୍ଷ କୈାଣସି ପଦକ୍ଷେପ ଗ୍ରହଣ ନକରିବାରୁ ପରିସ୍ଥିତିକ୍ରମେ ମୁରାରୀପୁର ଗ୍ରାମର ଶତାଧିକ ମହିଳା ଓ ପୁରୁଷ ଗୁରୁବାର ରାତି ୧୨ଟାରେ ଶବଧରି ଖଣ୍ଡପଡା ତହସିଲ କାର୍ଯ୍ୟାଳୟରେ ପହଁଚିଥିଲେ । ରାତିସାରା ଉଜାଗର ରହି ଶବ ସହ ଗ୍ରାମବାସୀ ଶୁକ୍ରବାର ପୂର୍ବାହ୍ନରେ ତହସିଲ କାର୍ଯ୍ୟାଳୟ ପରିସରରେ ଧାରଣା ଦେଇଥିଲେ । ଖଣ୍ଡପଡା ତହସିଲଦାର ପାର୍ଥସାରଥୀ ହାସଂଦା, ଅତିରିକ୍ତ ତହସିଲଦାର ସଞ୍ଜୟ କୁମାର ସାମନ୍ତରା, ପୋଲିସ ଆଇଆଇସି ବିମଳ କୁମାର ମଲ୍ଲିକ, ଏସଡିପିଓ ଶ୍ରୀନିବାସ ମହାନ୍ତି ପ୍ରମୁଖ ଘଟଣାସ୍ଥଳରେ ପହଁଚି ଧାରଣାରତ ଗ୍ରାମବାସୀଙ୍କୁ ବୁଝାଶୁଝା କରିଥିଲେ । ଆସନ୍ତା୧୪ ତାରିଖରେ ନୟାଗଡ ଅତିରିକ୍ତ ଜିଲ୍ଲାପାଳ, ଜିଲ୍ଲା ପ୍ରଶାସନର ବରିଷ୍ଠ ଅଧିକାରୀ ଓ ଖଣ୍ଡପଡା ତହସିଲ କର୍ତୃପକ୍ଷଙ୍କ ଉପସ୍ଥିତରେ ଉଭୟ ଗ୍ରାମର ମୁଖିଆମାନେ ଉପସ୍ଥିତ ରହି ଶ୍ମଶାନ ଜାଗାକୁ ନେଇ ଦେଖା ଦେଇଥିବା ବିବାଦର ଶାନ୍ତିପୂର୍ଣ୍ଣ ସମାଧାନ କରିବେ ବୋଲି ତହସିଲଦାର ପ୍ରତିଶୃତି ଦେବାପରେ ଗ୍ରାମବାସୀମାନେ ତହସିଲ କାର୍ଯ୍ୟାଳୟ ପରିସରରୁ ଶବ ଉଠାଇ ଧାରଣାରୁ ଓହରି ଯାଇଥିବା ଜଣାଯାଇଛି । ପୁରୀ ସ୍ୱର୍ଗଦ୍ୱାରଠାରେ ଶବଦାହ ନିମନ୍ତେ ତହସିଲ ପ୍ରଶାସନ ସମସ୍ତ ଖର୍ଚ୍ଚ ବହନ କରିଥିବା ବେଳେ ଜିଲ୍ଲା ରେଡକ୍ରସ ପାଣ୍ଠିରୁ ୧୦ ହଜାର ଟଙ୍କା ମୃତକଙ୍କ ପରିବାରବର୍ଗଙ୍କୁ ସହାୟତା ରାଶି ପ୍ରଦାନ କରାଯାଇଥିବା ଖଣ୍ଡପଡା ତହସିଲ କାର୍ଯ୍ୟାଳୟ ସୁତ୍ରରୁ ଜଣାପଡିଛି ।
