ଖଣ୍ଡପଡ଼ା, (ବାଘୁଆବାର୍ତ୍ତା) : ଖଣ୍ଡପଡ଼ା ସହର ୧୧ନଂ ୱାର୍ଡ ଅଧିନ ବଢେଇସାହିରୁ ଜଣେ ନାବାଳିକାକୁ ଅପହରଣ ଘଟଣାରେ ଖଣ୍ଡପଡା ପୋଲିସର ସ୍ଥାଣୁତା, କାର୍ଯ୍ୟଦକ୍ଷତାକୁ ନେଇ ଅଭିଯୋଗକାରୀଙ୍କ ପରିବାରବର୍ଗ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି । ଏ ସଂପର୍କରେ ଖଣ୍ଡପଡ଼ା ଥାନାରେ ପୋଲିସ ଏକ ମାମଲା ରୁଜୁ କରି ହାତବାନ୍ଧି ବସିଥିବା ବେଳେ ଖୋଲାମେଲାରେ ଅଭିଯୁକ୍ତମାନେ ବୁଲୁଥିବା ନାବାଳିକର ପିତା ଅଭିଯୋଗ କରିଛନ୍ତି । ଗତ ଜୁଲାଇ ୧୭ ତାରିଖରେ ନୟଗଡ଼ ନିକଟସ୍ଥ ତୁଳସୀପୁର ଗ୍ରାମର ଯୁବକ ସିଦ୍ଧାର୍ଥ ପ୍ରଧାନ ଓରଫ୍ ଦିଲୁ ସଂପୃକ୍ତା ନାବାଳିକାକୁ ଖଣ୍ଡପଡ଼ାରୁ ଅପରଣ କରି ନେଇଥିବା ସଂପର୍କରେ ନାବାଳିକାର ପିତା ଗତ ଜୁଲାଇ ୨୨ ତାରିଖରେ ଖଣ୍ଡପଡ଼ା ଥାନାରେ ଲିଖିତ ଅଭିଯୋଗ କରିଥିଲେ । ମାତ୍ର ଅଭିଯୋଗ ସତ୍ୱେ ଖଣ୍ଡପଡା ପୋଲିସ ଜାଣିଶୁଣି କୈାଣସି ମାମଲା ରୁଜୁ ନକରିବାରୁ ପରବର୍ତୀ ସମୟରେ ଅଭିଯୋଗକାରୀ ନୟାଗଡ ଏସପିଙ୍କୁ ଭେଟି ଅଭିଯୋଗପତ୍ର ପ୍ରଦାନ କରିଥିଲେ । ଏସପିଙ୍କ ନିର୍ଦ୍ଦେଶକ୍ରମେ ଖଣ୍ଡପଡ଼ା ପୋଲିସ ଜୁଲାଇ ୩୦ ତାରିଖରେ ଏକ କେସ୍ ରୁଜୁ କରିଥିଲେ ହେଁ କୋହଳ ଦଫା ଲଗାଇ ମାମଲା ରୁଜୁ କରିଥିବା ଅଭିଯୋଗ ହେଉଛି । ପୋଲିସ ଅଭିଯୋଗପତ୍ର ଗ୍ରହଣ କରିବାର ୮ଦିନ ପରେ ମାମଲା ରୁଜୁ କରିବା ଯୋଗୁଁ ଘଟଣାରେ ସଂପୃକ୍ତ ମୁଖ୍ୟ ଅଭିଯୁକ୍ତ ଗ୍ରାମ ଛାଡ଼ି ଅନ୍ୟତ୍ର ଫେରାର ହୋଇଯିବାରେ ସକ୍ଷମ ହେଲା ବୋଲି ନାବାଳିକାର ପିତା ଅଭିଯୋଗ କରିଛନ୍ତି । ଏପରିକି ଘଟଣାର ୧ମାସ ପରେ ମଧ୍ୟ ପୋଲିସ ଅଭିଯୁକ୍ତମାନଙ୍କୁ ଗିରଫ କରିବାରେ ସଫଳ ହୋଇନଥିବା ବେଳେ ନାବାଳିକାକୁ ମଧ୍ୟ ସେମାନଙ୍କ କବଳରୁ ଉଦ୍ଧାର କରି ପାରିନଥିବା ଜଣାପଡିଛି । ଅପରପକ୍ଷେ ଅଭିଯୁକ୍ତମାନଙ୍କ ଠାରୁ ମୋଟା ଅଙ୍କର ହାତଗୁଞ୍ଜା ନେଇ ଖଣ୍ଡପଡ଼ା ପୋଲିସ ହାତବାନ୍ଧି ବସିଥିବା ନାବାଳିକାର ପରିବାରବର୍ଗ ଅଭିଯୋଗ କରିଛନ୍ତି । ଖଣ୍ଡପଡା ଆଇଆଇସି ବିମଳ କୁମାର ମଲ୍ଲିକ ଓ ଘଟଣାର ତଦନ୍ତ କରୁଥିବା ଏସଆଇ ସନ୍ତୋଷ କୁମାର ସୁବୁଦ୍ଧି ଜାଣିଶୁଣି ମାମଲାଟିକୁ ଚପାଇ ଦେବା ପାଇଁ ଉଦ୍ୟମ କରୁଥିବା ନେଇ ନାବାଳିକାର ପିତା ଗୁରୁତର ଅଭିଯୋଗ କରିବା ସହ ସଂପୃକ୍ତ ଆଇଆଇସି ଓ ଏଏସଆଇ ଙ୍କ ବିରୁଦ୍ଧରେ ଏକ ମାମଲା ରୁଜୁ ନିମନ୍ତେ ଏସପିଙ୍କ ନିକଟରେ ଲିଖିତ ଅଭିଯୋଗ କରିଥିବା ଜଣାଯାଇଛି ।
ନାବାଳିକା ଅପହରଣ ଘଟଣା, ଥାନା ଅଧିକାରୀଙ୍କ ବିରୁଦ୍ଧରେ ଏସ୍ପିଙ୍କୁ ଫେରାଦ
