ଉନ୍ନୟନ ମୂଳକ କାର୍ଯ୍ୟ, ପାନୀୟ ଜଳ ଓ କରୋନା ସଂକ୍ରମଣକୁ ନେଇ ଆଲୋଚନା

ଖଣ୍ଡପଡ଼ା ପଂଚାୟତ ସମିତି ବୈଠକ

ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଖଣ୍ଡପଡ଼ା ବ୍ଳକ ସମ୍ମିଳନୀ କକ୍ଷରେ ସୋମବାର ପୂର୍ବାହ୍ନରେ ପଂଚାୟତ ସମିତିର ୯ମ ସାଧାରଣ ବୈଠକ ବ୍ଳକ ଅଧ୍ୟକ୍ଷ ମନୋଜ କୁମାର ପ୍ରଧାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଖଣ୍ଡପଡ଼ା ବିଧାୟକ ସୈାମ୍ୟରଂଜନ ପଟ୍ଟନାୟକ, ବିଡିଓ ପ୍ରମୋଦ କୁମାର ନାୟକ, ଏବିଡିଓ ଦୁର୍ଗାମାଧବ ରଥ, ବ୍ଳକ ପ୍ରଶାସନର ବରିଷ୍ଠ ଅଧିକାରୀଗଣ, ପଂଚାୟତସ୍ତରୀୟ ଲୋକପ୍ରତିନିଧି ଓ ବିଭିନ୍ନ ବିଭାଗର ପଦସ୍ଥ ଅଧିକାରୀମାନେ ବୈଠକରେ ଉପସ୍ଥିତ ରହି ଆଲୋଚନାରେ ଅଂଶଗ୍ରହଣ କରିଥିଲେ । ବ୍ଳକ ପ୍ରଶାସନ ପକ୍ଷରୁ ସମସ୍ତ ପଂଚାୟତରେ ଚାଲିଥିବା ଉନ୍ନୟନମୂଳକ କାର୍ଯ୍ୟ ସଂପର୍କରେ ଆଲୋଚନା କରାଯାଇଥିଲା । ସମସ୍ତ ଉନ୍ନୟନମୂଳକ କାର୍ଯ୍ୟ ସରପଂଚ, ସମିତିସଭ୍ୟ, ସଭ୍ୟା ଓ ବ୍ଳକ ଅଧ୍ୟକ୍ଷଙ୍କ ନିଷ୍ପତି ଅନୁଯାୟୀ କରାଯିବ ବୋଲି ଆଲୋଚନାରେ ଅଂଶଗ୍ରହଣ କରି ବିଧାୟକ ମତ ଦେଇଥିବା ବେଳେ ସମସ୍ତେ ଏହାକୁ ସ୍ୱାଗତ କରିଥିଲେ । ସେହିପରି ପାନୀୟ ଜଳ ସମସ୍ୟାର ସମାଧାନ, ମହାମାରୀ କରୋନା ଭୂତାଣୁ ସଂକ୍ରମଣ ଉପରେ ସଚେତନତା, ଜାତୀୟ ଖାଦ୍ୟ ସୁରକ୍ଷା ଯୋଜନାରେ ପ୍ରତ୍ୟେକ ପଂଚାୟତରୁ ନୂତନ ଯୋଗ୍ୟ ହିତାଧିକାରୀଙ୍କୁ ଚୟନ କରି ରାସନକାର୍ଡ ପ୍ରଦାନ କରିବା ଉପରେ ବୈଠକରେ ଗୁରୁତ୍ୱାରୋପ କରାଯାଇଥିଲା । ଶାନ୍ତିପୂର୍ଣ୍ଣ ଭାବେ ବୈଠକ ଶେଷ ହୋଇଥିବା ଜଣାପଡିଛି ।