ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଏକ ପାହାଡ଼ ଓ ଜଙ୍ଗଲ ପୂର୍ଣ୍ଣ ଜିଲ୍ଲା ହୋଇଥିବା ବେଳେ ସ୍ୱାଧିନତାର ୭୨ ବର୍ଷ ପରେ ମଧ୍ୟ ଏହି ଜିଲ୍ଲାର ଅନେକ ଗ୍ରାମ ଅବହେଳିତ ଏବଂ ଉପାନ୍ତ ଜିଲ୍ଲା ଭାବେ ପରିଗଣିତ ହେଉଛି । ନୟାଗଡ଼ ଜିଲ୍ଲାର ଦଶପଲ୍ଲାରେ ଶତାଧିକ ଗାଁ ଆଜି ବି ବିଚ୍ଛିନ୍ନାଞ୍ଚଳ ଭାବେ ପରିଚୟ ଲାଭ କରିଛି । ମାତ୍ର ଜିଲ୍ଲାର ଏକ ସହର ତଥା ବିଜ୍ଞାପିତ ଅଂଚଳ ପରିଷଦ(ଏନ୍ଏସି)ମଧ୍ୟରେ ରହିଛି ଏକ ଉପାନ୍ତ ଗ୍ରାମ । ଭୈାଗଳିକ ସ୍ଥିତିରେ ଏହି ଗାଁଟି ଖଣ୍ଡପଡ଼ା ବିଜ୍ଞାପିତ ଅଂଚଳ ପରିଷଦ ମଧ୍ୟରେ ଥିଲେ ମଧ୍ୟ ଆଜି ପର୍ଯ୍ୟନ୍ତ ମୈାଳିକ ସୁବିଧା ପାଇବାରୁ ବଚିତ ହୋଇଛି ।
ସୂଚନାନୁସାରେ, ଜିଲ୍ଲା ସଦରମହକୁମାରୁ ମାତ୍ର ୨୦ କିଲୋମିଟର ନୟାଗଡ଼ ଖଣ୍ଡପଡ଼ା ପୂର୍ତ୍ତ ବିଭାଗ ରାସ୍ତାରୁ ଜଙ୍ଗଲ ଭିତରୁକୁ ଗଲେ ପଡ଼ିଥାଏ ଗୋଳାପୋଖରୀ ଗ୍ରାମ । ଖଣ୍ଡପଡ଼ା ଏନ୍ଏସି ଅନ୍ତର୍ଗତ ୧୨ ନଂ ୱାର୍ଡ଼ରେ ରହିଥିବା ବେଳେ ଗ୍ରାମବାସୀ ସାଧାରଣ ସୁବିଧାଠାରୁ ବହୁ ଦୂରରେ ବୋଲି ଜଣାଯାଇଛି । ୧୯୮୯ ମସିହାରେ ଗଠିତ ଖଣ୍ଡପଡ଼ା ବିଜ୍ଞାପିତ ଅଂଚଳ ପରିଷଦରେ ଏହି ଗାଁକୁ ସାମିଲ କରାଯାଇଥିଲା । ଗ୍ରାମରେ ୧୫ଟି ପରିବାର ବସବାସ କରୁଛନ୍ତି । ଶହେରୁ କମ ଜନସଂଖ୍ୟା ବିଶିଷ୍ଟ ଗ୍ରାମରେ ପ୍ରାୟତଃ ସମସ୍ତେ ଆଦିବାସୀ ଏବଂ ଦାରିଦ୍ର୍ୟ ସୀମାରେଖା ତଳେ ବାସ କରୁଛନ୍ତି । ଗ୍ରାମବାସୀଙ୍କ ପାଖରେ ବିକାଶ ଅପହଂଚ ହୋଇ ରହିଛି । ଗାଁକୁ ଆଜି ପର୍ଯ୍ୟନ୍ତ ଭଲ ରାସ୍ତା ଖଣ୍ଡିଏ ନାହିଁ । ଖଣ୍ଡପଡ଼ା ନୟାଗଡ଼ ପୂର୍ତ୍ତ ବିଭାଗ ରାସ୍ତା ସୁନାମୁହଁ ଡ୍ୟାମ ନିକଟରୁ ୩ କିଲୋମିଟର କଚ୍ଚା ମାଟି ମୋରମ ରାସ୍ତାରେ ଲୋକମାନେ ଯାଆସ କରୁଥିବା ଜଣାଯାଇଛି । ଗାଁର ପ୍ରମୂଖ ସମସ୍ୟା ହେଉଛି ସୁନାମୁହିଁ ଡ୍ୟାମରେ ମିଶିଥିବା ଏକ ନାଳ । ଗାଁକୁ ଯିବାକୁ ହେଲେ ଏହି ନାଳଟି ପଡ଼ିଥାଏ । ଏଠାରେ ପୋଲ ନଥିବାରୁ ବଢ଼ି ସମୟରେ ଗାଁ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡ଼ୁଥିବା ଜଣାଯାଇଛି । ଝାଟି ମାଟିର ନୂଆଣିଆ ନଡ଼ା ଓ ଘାସ ଛପର ଘର ହେଉଛି ସେମାନଙ୍କର ସମ୍ବଳ । ୧୫ଟି ପରିବାର ୬ଟି ପରିବାର ଆବାସ ଯୋଜନାରେ ସାମିଲ ହୋଇଛନ୍ତି । ଗାଁ ପୂର୍ବରୁ ବାହ୍ୟ ମଳମୁକ୍ତ ଗ୍ରାମର ଫଳକ ଲଗା ଯାଇଥିବା ବେଳେ ଏହି ଗ୍ରାମରେ ଅଧିକାଂଶ ଲୋକଙ୍କର ପାଇଖାନା ନାହିଁ । ଗାଁ ଲୋକମାନେ ନିକଟସ୍ଥ ପଦା ଜମିରେ କଟକି ପୋଟଳ ଚାଷ କରି ଦୁଇ ପଇସା ଉପାର୍ଜ୍ଜନ କରିବା ସହ ମହିଳାମାନେ ଖଲି ସିଇବା ଏବଂ ଜଙ୍ଗଲଜାତ ଦ୍ରବ୍ୟ ସଂଗ୍ରହ କରନ୍ତି । ଏବେ ପଲିଥିନ ଏବଂ ପେପର ଥାଳି ଯୁଗ ଚାଲିଥିବାରୁ ଶାଳପତ୍ର ଖଲିର ମଧ୍ୟ ଆଉ ଆଗ୍ରହ ନଥିବା ମହିଳା ମାନେ କହିଛନ୍ତି । ପିଇବା ପାଣିର ଦୁଃଖ କହିଲେ ନସରେ । ନିକଟସ୍ଥ ସୁନାମୁହିଁ ଡ୍ୟାମରୁ ଗ୍ରାମବାସୀ ପାନୀୟ ଜଳ ସଂଗ୍ରହ କରୁଥିବା ବେଳେ କେତେକ ପରିବାର କୂଅ ଓ ନଳକୂପ ଉପରେ ନିର୍ଭର କରନ୍ତି । ଗାଁ ପାଇଁ ଏକ ପାନୀୟ ଜଳ ଯୋଗାଣ ପ୍ରକଳ୍ପ ମଂଜୁର ହୋଇ କାମ ସରିଥିଲେ ମଧ୍ୟ ତିନିବର୍ଷ ହେବ ବିଦ୍ୟୁତ୍ ସଂଯୋଗ ନଥିବାରୁ ଜଳଯୋଗାଣ ହୋଇପାରୁ ନାହିଁ । ଅନେକ ସମୟରେ ବନଜନ୍ତୁ ଆସି ଗ୍ରାମବାସୀଙ୍କ ଫସଲକୁ ନଷ୍ଟ କରି ଚାଲି ଯାଉଛନ୍ତି । ଗାଁରେ ସ୍ୱାସ୍ଥ୍ୟ ଖରାପ ହେଲେ ୫ କିଲୋମିଟର ଦୂର ଖଣ୍ଡପଡ଼ା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ସୁବିଧା ରହିଥିଲେ ମଧ୍ୟ ସେମାନଙ୍କ ପାଇଁ ସୁନାମୁହିଁ ନାଳ କାଳ ପାଲଟିଥିବା ଜଣାଯାଇଛି । ବଢ଼ି ସମୟରେ ରୋଗୀକୁ ଡାକ୍ତରଖାନା ନେଇ ହେଉନଥିବା ଗାଁ ଲୋକେ କହିଛନ୍ତି । ନତୁବା ୨୦ କିଲୋମିଟର ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟ ଉପରେ ଗ୍ରାମବାସୀ ନିର୍ଭର କରନ୍ତି । ଗ୍ରାମର ପ୍ରତିଟି ପରିବାର ଖାଦ୍ୟ ସୁରକ୍ଷା ଯୋଜନାରେ ସାମିଲ ହୋଇଥିବା ବେଳେ ଖଣ୍ଡପଡ଼ା ସହରରୁ ରାସନ୍ ସାମଗ୍ରୀ ସଂଗ୍ରହ କରିବାକୁ ପଡ଼ୁଥିବା ଗ୍ରାମବାସୀ କହିଛନ୍ତି । ଏହି ଗ୍ରାମକୁ ବିଦ୍ୟୁତ ସଂଯୋଗ ଦିଆଯାଇଥିଲେ ମଧ୍ୟ ମାସକ ମଧ୍ୟରୁ ଅଧା ସମୟ ଅନ୍ଧାରରେ କଟି ଥାଏ । ଅନ୍ୟପକ୍ଷେ, ଗ୍ରାମଟି ଶିକ୍ଷା ବ୍ୟବସ୍ଥାଠାରୁ ବହୂ ଦୂରରେ । ଗ୍ରାମରେ ଅଙ୍ଗନୱାର୍ଡ଼ କେନ୍ଦ୍ର ଓ ପ୍ରାଥମିକ ବିଦ୍ୟାଳୟ ରହିଥିଲେ ମଧ୍ୟ ଉଚ୍ଚଶିକ୍ଷା ପାଇଁ ଦୂର ଗ୍ରାମରେ ଥିବା ଉଚ୍ଚ ବିଦ୍ୟାଳୟ ଉପରେ ନିର୍ଭର କରିବାକୁ ପଡ଼େ । ଜିଲ୍ଲା ପ୍ରଶାସନ ଏହି ଗାଁ ପାଇଁ କିଛି ସ୍ୱତନ୍ତ୍ର ବ୍ୟବସ୍ଥା କରିବାକୁ ଦାବି ହେଉଛି ।
