୧୯ରୁ ୨୨ ନୟାଗଡ଼ରେ ସର୍ବଭାରତୀୟ ହକି

ନୟାଗଡ଼,(ବାଘୁଆବାର୍ତ୍ତା): ରାଜ୍ୟ ସରକାର ବିଶ୍ୱ ହକି ଆୟୋଜନ କରି ଓଡ଼ିଶାର ମର୍ଜ୍ଜାଦା ବୃଦ୍ଧି କରିଥିବା ପ୍ରରିପ୍ରେକ୍ଷିରେ ନୟାଗଡ଼ରେ ଆୟୋଜିତ ହେଉଛି ସର୍ବଭାରତୀୟ ହକି । ନୟାଗଡ଼ ଖେଳ ପଡ଼ିଆରେ ଅନୁଷ୍ଠିତ ହେବାକୁ ଥିବା ଏହି ହକି ଖେଳ ଆସନ୍ତା ୧୯ ତାରିଖରୁ ଆରମ୍ଭ ହୋଇ ୨୨ରେ ଶେଷ ହେବ ବୋଲି ଆୟୋଜକଙ୍କ ପକ୍ଷରୁ ସୂଚନା ମିଳିଛି । ନୟାଗଡ଼ ଜିଲ୍ଲା ରଗ୍ବି ଆସୋସିଏସନ୍ ଦ୍ୱାରା ଆୟୋଜିତ ଏହି ହକି ଟୁନାମେଣ୍ଟରେ ୮ ଗୋଟି ଦଳ ଭାଗ ନେବେ । ୧୯ ତାରିଖ ଉଦ୍ଘାଟନି ମ୍ୟାଚରେ କଲିକତା ହକି ଏକାଡେମୀ ବନାମ୍ ସେଲ୍ ହକି ରାଉରକେଲା ସହିତ ଖେଳ ଅନୁଷ୍ଠିତ ହେବାକୁ ଯାଉଥିବା ବେଳେ ଢେଙ୍କାନାଳ ହକି ଆସୋସିଏସନ ବନାମ ବିଜୁ ପଟ୍ଟନାୟକ ହକି ଏକାଡେମୀ ନୟାଗଡ଼ ମଧ୍ୟରେ ମ୍ୟାଚ ଅନୁଷ୍ଠିତ ହେବ । ସେହିଭଳି ୨୦ ତାରିଖରେ ହାଇଦ୍ରାବାଦ ହକି ଏକାଡେମୀ ବନାମ କିଟ ଭୂବନେଶ୍ୱର ମଧ୍ୟରେ ପ୍ରଥମ ମ୍ୟାଚ ଅନୁଷ୍ଠିତ ହେବ । ଦ୍ୱିତୀୟ ମ୍ୟାଚରେ ଟିକମ୍ଗଡ଼ ହକି ଏକାଡେମୀ ମଧ୍ୟ ପ୍ରଦେଶ ବନାମ ପୂର୍ବତଟ ରେଳବାଇ ଭୂବନେଶ୍ୱର ମଧ୍ୟରେ ଖେଳ ଅନୁଷ୍ଠିତ ହେବ । ଏହି ଆଠଟି ଦଳ ମଧ୍ୟରୁ ବିଜୟୀ ଦଳଙ୍କୁ ନେଇ ୨୧ ତାରିଖରେ ସେମିଫାଇନାଲ ଏବଂ ୨୨ ତାରିଖରେ ଫାଇନାଲ ମ୍ୟାଚ ଅନୁଷ୍ଠିତ ହେବ ବୋଲି ସୂଚନା ମିଳିଛି । ପ୍ରତ୍ୟେକ ଦିନ ଖେଳ ଅପରାହ୍ନ ୨ଟା ୩୦ରୁ ଆରମ୍ଭ ହେବ ବୋଲି ନୟାଗଡ଼ ଜିଲ୍ଲା ହକି ଆସୋସିଏସନ ସଭାପତି ମିତାଲୀ ପ୍ରିୟଦର୍ଶନୀ ପ୍ରଧାନ ସୂଚନା ଦେଇଛନ୍ତି । ଉକ୍ତ ହକି ଖେଳର ଉପଦେଷ୍ଟା ଭାବେ ସାଂସଦ ପିନାକୀ ମିଶ୍ର ଏବଂ ମୁଖ୍ୟ ପୃଷ୍ଠପୋଷକ ଭାବେ ମନ୍ତ୍ରୀ ଡ. ଅରୁଣ କୁମାର ସାହୁ ଦାୟିତ୍ୱ ନିର୍ବାହ କରୁଛନ୍ତି ।