ନୟାଗଡ଼, (ବାଘୁଆବାର୍ତ୍ତା) : କରୋନା ମହାମାରୀ ପାଇଁ ବ୍ୟବସାୟୀଙ୍କ ବ୍ୟବସାୟ ବିପର୍ଯ୍ୟୟ ହୋଇ ପଡ଼ିଥିବା ବେଳେ ଜିଲ୍ଲାରେ ଲଗାଯାଇଥିବା କଟକଣା ଆହୁରି ପୀଡ଼ା ସୃଷ୍ଟି କରୁଛି । ବ୍ୟବସାୟୀମାନେ ସେମାନଙ୍କ ରୋଜଗାର ହରାଇ ହାତ ବାନ୍ଧି ବସିଥିବା ବେଳେ ଗୋଡ଼ିପଡ଼ା ଅଂଚଳରେ ବ୍ୟବସାୟ ପ୍ରତିଷ୍ଠାନ ସଂମ୍ପୂର୍ଣ୍ଣ ବନ୍ଦ କରାଯିବା ନେଇ ନିଷ୍ପତ୍ତି ବ୍ୟବସାୟୀଙ୍କୁ କଷ୍ଟ ଦେଇଛି । ସୂଚନାନୁସାରେ, ନୟାଗଡ଼ ଜିଲ୍ଲା ଶରଣକୂଳ ଥାନା ଅନ୍ତର୍ଗତ ଗୋଡ଼ିପଡ଼ା ଅଂଚଳର ବ୍ୟବସାୟୀମାନେ ସକାଳୁ ୧ ଘଣ୍ଟା ପର୍ଯ୍ୟନ୍ତ ଦୋକାନ ଖୋଲାଯିବା କାରଣରୁ ନାହିଁ ନଥିବା ଦୁର୍ଦ୍ଦଶା ଭୋଗୁଥିବା ବେଳେ ଏବେ ୧୭ ଦିନ ହେବ ଏହି ଅଂଚଳକୁ କଣ୍ଟେନ୍ମେଣ୍ଟ କରାଯାଇଛି । ଫଳରେ ଏହି ଅଂଚଳରେ ସମସ୍ତ ଦୋକାନ ବଜାର ୧୭ ଦିନ ହେବ ସଂମ୍ପୂର୍ଣ୍ଣ ବନ୍ଦ ହୋଇଯାଇଥିବା ବେଳେ ବ୍ୟବସାୟୀମାନେ ଦୁର୍ଦ୍ଦଶା ଭୋଗିବା ସହ ପରିବାର ଚଳାଇବା କଷ୍ଟକର ହୋଇପଡ଼ିଛି । ଯାହାକୁ ନେଇ ଆଜି ଗୋଡ଼ିପଡ଼ା ବଣିକ ସଂଘର ତରଫରୁ କିଛି କର୍ମକର୍ତ୍ତା ଜିଲ୍ଲାପାଳଙ୍କ କାର୍ଯ୍ୟାଳୟକୁ ଆସି ଲିଖିତ ଅଭିଯୋଗ କରିଛନ୍ତି । ଏହି ଅଂଚଳରେ କିଭଳି ବ୍ୟବସାୟ ପ୍ରତିଷ୍ଠାନ ଖୋଲାଯିବା ସହ ପୂର୍ବବତ ସେମାନେ ରୋଜଗାର କରି ପାରିବେ ସେ ନେଇ ଜିଲ୍ଲାପାଳ ଦୃଷ୍ଟି ଦେବାକୁ ଅନୁରୋଧ କରିଛନ୍ତି ।
