ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ବନ ବିଭାଗ ଅଧିନରେ ରହିଛି ୭ଟି ବନାଞ୍ଚଳ କାର୍ଯ୍ୟାଳୟ । ପଂଚରିଡା, ଓଡ଼ଗାଁ, ମହିପୁର, ଦଶପଲ୍ଲା, ଗଣିଆ, ଖଣ୍ଡପଡ଼ା ଓ ନୟାଗଡ଼ ବନାଞ୍ଚଳ କାର୍ଯ୍ୟାଳୟ ରହିଥିବା ବେଳେ ସେଥିରୁ ବର୍ତ୍ତମାନ ୪ଟି ବନାଞ୍ଚଳ କାର୍ଯ୍ୟାଳୟରୁ ୪ଜଣ ରେଞ୍ଜରଙ୍କୁ ଅନ୍ୟତ୍ର ବଦଳି କରାଯାଇଛି । ତେବେ ୪ଜଣ ରେଞ୍ଜ ଅଧିକାରୀଙ୍କୁ ଅନ୍ୟତ୍ର ବଦଳି କରାଯାଇଥିଲେ ମଧ୍ୟ ତାଙ୍କ ବଦଳରେ କାହାକୁ ମଧ୍ୟ ପୋଷ୍ଟିଂ ଦିଆଯାଇନାହିଁ । ତେଣୁ ବଡ଼ ଚିନ୍ତାରେ ପଡିଛି ନୟାଗଡ଼ ବନଖଣ୍ଡ । ସୂଚନାନୁସାରେ, ନୟାଗଡ଼ ବନଖଣ୍ଡ ଅଧିନରେ ଥିବା ପଂଚରିଡା, ଓଡ଼ଗାଁ, ମହିପୁର ଓ ଖଣ୍ଡପଡ଼ା ବନାଞ୍ଚଳ କାର୍ଯ୍ୟାଳୟରେ କାର୍ଯ୍ୟ କରିଆସୁଥିବା ବନାଞ୍ଚଳ ଅଧିକାରୀମାନଙ୍କୁ ଜିଲ୍ଲା ବାହାରକୁ ବଦଳି କରାଯାଇଛି । ତେବେ ପଂଚରିଡା ବନାଞ୍ଚଳ ଅଧିକାରୀ ଅର୍ଚ୍ଚନା ଗମାଙ୍ଗୋଙ୍କୁ ଫୁଲବାଣି ବନଖଣ୍ଡ ଅଧିନରେ ଥିବା ରାଇକିଆ ବନାଞ୍ଚଳକୁ ବଦଳି ହୋଇଥିବା ବେଳେ ଓଡ଼ଗାଁ ବନାଞ୍ଚଳ ଅଧିକାରୀ ଅମ୍ରିତ୍ କୁମାର ସାହୁଙ୍କୁ ସାତକୋଶିଆ ପାମ୍ପସର ବନାଞ୍ଚଳକୁ ବଦଳି କରାଯାଇଛି । ସେହିପରି ମହିପୁର ବନାଞ୍ଚଳ ଅଧିକାରୀ ପ୍ରମୋଦ ପଣ୍ଡାଙ୍କୁ ଆସ୍କା ବନାଞ୍ଚଳକୁ ବଦଳି କରାଯାଇଥିବା ବେଳେ ଖଣ୍ଡପଡ଼ା ବନାଞ୍ଚଳ ଅଧିକାରୀ ଶରତ କୁମାର ଶତପଥିଙ୍କୁ କୋଣାର୍କ ବନାଞ୍ଚଳକୁ ବଦଳି କରାଯାଇଥିବା ଜଣାପଡିଛି । ବଦଳି ହୋଇଥିବା ରେଞ୍ଜରମାନଙ୍କୁ ତୁରନ୍ତ ନିଯୁକ୍ତ କରାଯାଇଥିବା ସ୍ଥାନରେ ଯୋଗ ଦେବାକୁ ନିର୍ଦ୍ଦେଶ ରହିଛି । ଜିଲ୍ଲାର ୭ଟି ବନାଞ୍ଚଳରୁ ୪ଜଣ ରେଞ୍ଜରଙ୍କୁ ବଦଳି କରାଯାଇଥିବା ବେଳେ ସେମାନଙ୍କ ବଦଳ ନୟାଗଡ଼ ବନଖଣ୍ଡରେ କାହାକୁ ନିଯୁକ୍ତ ନଦେବା ପରିତାପର ବିଷୟ ବୋଲି ଆଲୋଚନା ହେଉଛି । ବଦଳି ହୋଇଥିବା ୪ଟି ବନାଞ୍ଚଳର ଅଧିକାରୀଙ୍କୁ ନିଯୁକ୍ତ ନଦେବା, ବନାଞ୍ଚଳ କାର୍ଯ୍ୟାଳୟ ଫାଙ୍କା ହୋଇଯିବ କି ବୋଲି ବଡ଼ ପ୍ରଶ୍ନବାଚୀ ସୃଷ୍ଟି କରିଛି ।
ଜିଲ୍ଲାରେ ୪ଜଣ ରେଞ୍ଜରଙ୍କୁ ଅନ୍ୟତ୍ର ବଦଳି: ଫାଙ୍କା ହୋଇଯିବ କି ବନାଞ୍ଚଳ କାର୍ଯ୍ୟାଳୟ!
